¿Kʼuxi chichʼ akʼbel slajeb li lajelale?

AKʼO mi la jkuchintik mulil xchiʼuk chijchamutik ta skoj ti la stoy sbaik li Adan xchiʼuk Evae, muʼyuk jelem-o li kʼusi oy ta yoʼonton tspas Dios ta stojolal li krixchanoetike. Li Vivliae jamal chalbutik ti Diose jech-o li kʼusi oy ta yoʼontone.

• «Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o» (Salmo 37:29).

• «Jech noxtoc jʼechʼel ta slajesbe o scʼoplal li lajele; ta scusbe loqʼuel yaʼlel sat scotolic; [...]. Jaʼ jech yaloj stuc li Mucʼul Diose» (Isaías 25:8).

• «Li slajeb jkontrainvanej ti chichʼ lajesele, jaʼ li lajelale» (1 Korintios 15:26).

• «Muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel» (Apokalipsis 21:4).

¿Kʼusi ta spas Dios sventa «slajesbe o scʼoplal» li lajelale? Jech kʼuchaʼal laj xa kiltike, li Vivliae chal ti «bochʼo tucʼ yoʼntonique [...] jech jun yoʼnton te chnaquiic o» ta balumil. Pe akʼo mi jech, chal xtok ti «muʼyuc bochʼo liʼ ta banamil ti batsʼi ven tuqʼue ti me jutuc mu sta smule» (Eclesiastés 7:20). ¿Mi jaʼ van skʼan xal ti mu xa persauk jchʼunbetik skotol li smantaltak Dios kʼalal mu xa ox jnaʼ xijlajutike? Mu jechuk. Yuʼun li Diose «mu snaʼ sjut [kʼop]» (Tito 1:2). Vaʼun chaʼa, ¿kʼusi tspas sventa xkʼot ta pasel li kʼusi tskʼan ta stojolal li krixchanoetike?

CHICHʼ AKʼBEL SLAJEB LI LAJELALE

Ta skoj ti skʼanojutik li Jeovae, laj yakʼ jun matanal sventa spojutik lokʼel li ta lajelale. Li ta Vivliae, li jun pojelale jaʼ stojol li kʼusi yichʼoj sokesele o sventa xichʼ chʼunel li kʼusi chal mantaletike. Li jun pojelale skʼan jechuk yepal sbalil li kʼusi laj yichʼ sokesele. Ta skoj ti muʼyuk buchʼu tukʼ kuʼuntik xchiʼuk ti jkotoltik chijchamutike, xi jamal ta xal li Vivliae: «Pero mu xuʼ yuʼun tscolta o xchiʼilic; mu xuʼ chacʼbeic xqʼuexolin xchiʼilic ta stojol li Diose. Yuʼun li stojol jcuxlejaltique batsʼi toyol stojol; me junuc muʼyuc bochʼo xuʼ tsman» (Salmo 49:7, 8).

Kʼalal ta xcham li jun krixchanoe, jaʼ noʼox xtoj yuʼun li smultake. Mu stakʼ spoj sba stuk mi jaʼuk xuʼ stojbe smul yan krixchano (Romanos 6:7). Jaʼ yuʼun, skʼan jun tukʼil krixchano ti chʼabaluk smul sventa xakʼ xkuxlejale, maʼuk ti tstoj smul stuke, yuʼun skʼan stoj li jmultike (Evreos 10:1-4).

Taje jaʼ li kʼusi la spas li Diose. La stak talel ta balumil li Jesus kʼuchaʼal jun tukʼil krixchanoe (1 Pedro 2:22). Li Jesuse laj yal ti «tal yakʼ xkuxlejal sventa tspoj epal [krixchanoetike]» (Markos 10:45). Laj yakʼ xkuxlejal sventa xakʼbe slajeb li lajelale xchiʼuk ti xuʼ jtatik kuxlejal sbatel osile (Juan 3:16).

¿BAKʼIN CHICHʼ AKʼBEL SLAJEB LI LAJELALE?

Li avie yakal xa chkʼot ta pasel li albil kʼopetik ta Vivliae. Toj echʼ noʼox xibal sba li kuxlejale, taje jaʼ jech chvinaj ti «ta slajebal xa [kʼakʼal]» kuxulutik li ta chopol balumil liʼe (2 Timoteo 3:1). Taje jaʼo chlaj skotol «mi sta yorail li chapanele xchiʼuk ti chichʼik lajesel li krixchanoetik ti toj chopolike» (2 Pedro 3:3, 7). Pe li buchʼutik skʼanojik li Diose kuxul chkomik xchiʼuk tskʼupinik li kuxlejal sbatel osile (Mateo 25:46).

Ta smilal xa noʼox krixchanoetik xuʼ staik li kuxlejal sbatel osil mi laj yichʼik chaʼkuxesele. Li Jesuse oy sjuʼel sventa xchaʼkuxes li buchʼutik chamemike. Kʼalal bat li ta jteklum Naine, la xchaʼkuxesbe li skerem jun meʼon ants ta skoj ti kʼuxubaj ta yoʼontone (Lukas 7:11-15). Xi laj yal li jtakbol Pabloe: «Oy spatobil koʼonton ta stojolal Dios [...] ti chchaʼkuxi li buchʼutik tukʼike xchiʼuk li buchʼutik muʼyuk tukʼike». Li kʼusi laj yichʼ alel taje, jaʼ te chakʼ ta ilel ti skʼanojutik tajek li Diose (Echos 24:15).

Xuʼ xkuxiik sbatel osil li epal mil krixchanoetike. Xi chal li Vivliae: «Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o» (Salmo 37:29). Vaʼun xuʼ jech jun yoʼonton xalik li kʼusi oy xa van ta chaʼmil jabil laj yal li jtakbol Pabloe: «¿Bu oy li atsatsale lajelal? ¿Bu oy li avenenoe lajelal?» (1 Korintios 15:55). Vaʼun laj xa ox me yichʼ akʼbel slajeb li yajkontra krixchanoetike.