Jun kʼupil sba kuxlejal ti xuʼ xichʼ taele

LI Diose maʼuk ox jech ta yoʼonton ti jechuk li kuxlejal kʼuchaʼal avie. Li kʼusi ox tskʼane jaʼ ti akʼo nojuk ta krixchanoetik ti lek snaʼ xchʼunik mantale, ti stabeikuk sbalil li tojobtasel chakʼe xchiʼuk ti jechuk xchanbeik stalelale. Yuʼun tskʼan ox ti junuk yoʼonton xkuxiik li krixchanoetike, ti xmuyubajikuk li ta yutsʼ yalalike, ti oyuk kʼusi xchanik spasele xchiʼuk ti spasik ta paraiso spʼejel li balumile.

LI DIOSE CHAL TA JAMAL TI CHTAL JUN KUXLEJAL KʼUCHAʼAL TSKʼANE

• «Jaʼ tspajes scotol li pleito cʼalal to ta jujujot stiʼ banamile» (Salmo 46:9).

• «Kʼot yorail sventa [...] chalajes li buchʼutik yakal tsokesik li balumile» (Apokalipsis 11:18).

• «Mu jbejuc ta na jech chal: ‹Toj ipun›» (Isaías 33:24).

• «Li bochʼotic tʼujbilic cuʼune ta to scʼupinic lec li yabtel yoc scʼobique» (Isaías 65:22).

¿Kʼuxi van chkʼot ta pasel li albil kʼopetik taje? Li Diose la stikʼ ta Ajvalil li Jesus sventa spas talel mantal liʼ ta balumile. Li Vivliae chal ti jaʼ li Ajvalilal yuʼun Diose (Daniel 2:44). Xi to chal Vivlia ta sventa li Jesuse: «Te chchotanat yuʼun Jeova Dios li ta chotlebal sventa [...] muʼyuk bu chlaj skʼoplal li Ajvalilal yuʼune» (Lukas 1:32, 33).

Kʼalal ay ta balumile, li Jesuse la spas epal skʼelobil juʼelal sventa chakʼbe yil krixchanoetik ti chlekub li xkuxlejalik mi jaʼ xa ox tspas mantale.

LAJ YAKʼ TA ILEL JESUS KʼUSI TSPAS TA STOJOLAL LI BUCH’U CHCH’UNIK MANTALE

• La xpoxta jeltos chameletik, taje jaʼ te laj yakʼ ta ilel ti xuʼ xakʼbe slajeb ta j-echʼel li chameletike (Mateo 9:35).

• La spajes tsatsal ikʼal voʼ, taje jaʼ te laj yakʼ ta ilel ti xuʼ spajes li kʼusitik stalel onoʼox chkʼotanuk ta pasel ta balumile (Markos 4:36-39).

• Laj yakʼbe sveʼel epal mil krixchanoetik, taje jaʼ te laj yakʼ ta ilel ti chakʼbutik li kʼusi chtun kuʼuntike (Markos 6:41-44).

• La skʼatajes ta vino li voʼ ta jun skʼinal nupunele, taje jaʼ te laj yakʼ ta ilel ti chakʼ akʼo jkʼupin jkuxlejaltik mi tspas xa ox mantale (Juan 2:7-11).

¿Kʼusi skʼan xapas sventa xakʼupin skotol li kʼusitik snopoj tspas Dios ta stojolal li krixchanoetike? Oy jun be ti skʼan te xabate. Li Vivliae chal ti jaʼ li «sbelel kuxlejale» xchiʼuk ti jutuk tajek li buchʼutik tstaik ta saʼele (Mateo 7:14).

JUN BE TI CH-IKʼVAN BATEL TA LEKIL KUXLEJALE

¿Kʼusi skʼan xal li be ti ch-ikʼvan batel ta kuxlejal sbatel osile? Li be taje jaʼ skʼan xal li kʼusitik tskʼan Dios ti akʼo jpastike. Xi chalbutike: «Vuʼun ta jchanubtasot cʼusi lec ta pasel ta sventa alequilal; vuʼun ta jtojobtasot bu beal tscʼan chatam batel» (Isaías 48:17). Kʼalal te chijxanavutik li ta be taje, muʼyuk kʼusi xkoʼolaj-o.

Li Jesuse xi laj yale: «Voʼon li beune, voʼon li melelune xchiʼuk voʼon li kuxlejalune» (Juan 14:6). Mi ta jchʼuntik li kʼusi laj yakʼ ta chanel li Jesus xchiʼuk mi ta jchanbetik li stalelale, jaʼ me tsnopajesutik ta stojolal li Diose xchiʼuk mas me chlekub li jkuxlejaltike.

¿Kʼuxi xuʼ xata li be taje? Akʼo mi oy epal relijionetik o beetik, xi chpʼijubtasvan li Jesuse: «Mu skotoluk ch-ochik ta Ajvalilal ta vinajel li buchʼutik ‹Kajval, Kajval›, xiyutikune, jaʼ noʼox ch-ochik li buchʼutik tspasik kʼusi tskʼan yoʼonton li Jtot ta vinajele» (Mateo 7:21). Xi to chale: «Ta sventa yabtelik chavojtikinik» (Mateo 7:16). Li Vivliae xuʼ skoltaot sventa xanaʼ bu junukal li melel relijione (Juan 17:17).

¿Kʼusi stakʼ xapas sventa te xaxanav li ta be taje? Skʼan xavojtikin li buchʼu yakʼoj li jkuxlejaltike. Skʼan jnaʼtik buchʼu jaʼ, kʼusi sbi, kʼu yelan stalelal, kʼusi yakal tspas xchiʼuk kʼusi tskʼan ti akʼo jpastike.a

Li Diose mu skʼan ti jaʼ noʼox xij-abtejutik, xijveʼutik, jchʼay koʼontontik xchiʼuk ti x-ayan kutsʼ kalaltike. Li kʼusi oy ta yoʼontone jaʼ ti xkojtikintike xchiʼuk ti xijkʼot ta yamigoe. Kʼalal ta jchʼunbetik smantale, jaʼ te chkakʼbetik yil ti jkʼanojtike. Xi laj yal li Jesuse: «Jaʼ skʼoplal kuxlejal sbatel osil liʼe, ti ta xojtikinikote, li jun noʼox melel Diosote» (Juan 17:3).

OYUK XA NOʼOX ME KʼUSI XAPAS

Sventa xkakʼtik akʼo xmuyubaj li jun noʼox melel Diose, xuʼ van oy kʼusi skʼan xajel ta akuxlejal. Akʼo mi vokol ta pasel yileluk, pe mi lik xanavan li ta be taje xkoʼolaj ta jun kʼupil sba xanbal, jaʼ noʼox skʼan xlik xanavan batel. Mi oy kʼusi chajakʼbe aba ta stojolal Diose, kʼano junuk chanubtasel ta Vivlia li ta jpajinakutik ta Internet www.jw.org. Li stestigounkutik Jeovae oy tajek ta koʼontonkutik ta jvulaʼanotkutik ti bu chakʼane xchiʼuk ti jayib ora xokolote.