¿Kʼusi tspas li Diose?

Li jun lekil amigoile jaʼ li buchʼu tskoltautik kʼalal oy kʼusi ta jnuptantike. Jaʼ yuʼun oy junantik chalik ti maʼuk kamigotik li Diose, yuʼun tsnopik ti muʼyuk la kʼusi tspas ta jtojolaltike. Pe mu jechuk maʼ taje, yuʼun ep xa kʼusitik spasoj ta jtojolaltik xchiʼuk jutuk xa skʼan slajes li jvokoltike xchiʼuk li kʼusitik ta jnuptantike. ¿Kʼusi tspas li Diose?

CHAKʼBE SLAJEB LI CHOPLEJALE

Li Diose chakʼbe slajeb li buchʼu la slikes li choplejale. Xi chalbe skʼoplal li Vivliae: «Skotol li krixchanoetike oyik ta sjuʼel li buchʼu toj chopole» (1 Juan 5:19). Li buchʼu «toj chopole» jaʼ li Satanase, jaʼ onoʼox ti xi laj yalbe skʼoplal li Jesuse: «Li ajvalil ta balumil liʼe» (Juan 12:31). Skotol li kʼusitik tspas Diabloe jaʼ ch-akʼbat-o svokol li krixchanoetike. ¿Kʼusi van tspas li Dios une?

Li Jeovae jutuk xa skʼan stunes Xnichʼon sventa xakʼbe slajeb «ta jyalel li buchʼu xuʼ yuʼun chmilvane, jaʼ xkaltik, li Diabloe» (Evreos 2:14; 1 Juan 3:8). Li Vivliae chal «ti snaʼoj ti toj komkom xa li [yorail]» sventa xichʼ lajesel li Diabloe (Apokalipsis 12:12). Li Diose chakʼbe slajeb xtok li chopol krixchanoetike (Salmo 37:9; Proverbios 2:22).

TSKʼATAJES TA PARAISO LI BALUMILE

Mi laj xa ox yakʼbe slajeb choplejal li Jpasvanej kuʼuntike, ta xakʼ kʼotuk ta pasel li kʼusi tskʼan yoʼonton ta stojolal li krixchanoetike xchiʼuk ta sventa li balumile. ¿Kʼu van yelan xanaʼ li kuxlejal mi kʼot ta pasel taje?

Oy-o jun oʼontonal xchiʼuk muʼyuk kʼusi chijxiʼo yuʼun. «Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o» (Salmo 37:11).

Ch-epaj jeltos veʼliletik. «Acʼo oyuc ep trigo liʼ ta banamil; acʼo nojuc batel ta trigo li joljolvitse» (Salmo 72:16).

Lekil naetik xchiʼuk abtel ti ta jkʼupintike. «Chlic spas lec snaic, chlic naquiicuc stuquic; chlic stsʼunic lec stsʼusubic, ta sloʼbeic sat stuquic. [...] Li bochʼotic tʼujbilic cuʼune ta to scʼupinic lec li yabtel yoc scʼobique» (Isaías 65:21, 22).

¿Mi chakʼan chanaki ta jun balumil kʼuchaʼal taje? Jutuk xa onoʼox skʼan xkʼot ta pasel.

CHLAJ SKʼOPLAL LI CHAMELETIKE XCHIʼUK LI LAJELALE

Li avie jkotoltik chij-ipajutik xchiʼuk chijchamutik, pe taje mu jechuk-o sbatel osil. Koliyal ti laj yakʼ xkuxlejal Jesus ta jtojolaltike, li Jeovae chal ti «buchʼu chakʼ xchʼunel yoʼonton ta stojolale, [...] tsta-o xkuxlejal sbatel osil» (Juan 3:16). ¿Kʼu van yelan xanaʼ li kuxlejal mi kʼot ta pasel taje?

Chlaj skʼoplal li chameletike. «Mu jbejuc ta na jech chal: ‹Toj ipun›, muʼyuc xi, yuʼun tspasbatic perdón yuʼun smulic» li krixchanoetike (Isaías 33:24).

Chlaj skʼoplal li lajelale. «Ta slajesbe o scʼoplal li lajele; ta scusbe loqʼuel yaʼlel sat scotolic» (Isaías 25:8).

Chkuxiik sbatel osil li krixchanoetike. «Li matanal chakʼ Diose jaʼ kuxlejal sbatel osil ta stojolal li Kristo Jesus ti jaʼ Kajvaltike» (Romanos 6:23).

Chchaʼkuxiik li buchʼutik chamemike. «Chchaʼkuxi li buchʼutik tukʼike xchiʼuk li buchʼutik muʼyuk tukʼike» (Echos 24:15). Li buchʼutik chamemike ta me stabeik sbalil ek li pojelal laj yakʼ Diose.

¿Kʼusi van tspas Dios sventa xkʼot ta pasel skotol taje?

TSVAʼAN JUN TUKʼIL AJVALIL

Li Diose tspas li kʼusi oy ta yoʼonton ta stojolal li krixchanoetike xchiʼuk ta sventa li balumile, ti tstunes jun ajvalil ta vinajel ti jaʼ li Jesukristoe (Salmo 110:1, 2). Taje jaʼ onoʼox li Ajvalilal yuʼun Dios ti la xchanubtas yajchankʼoptak Jesus ti akʼo xi skʼanik ta orasione: «Jtotik ta vinajel, [...] akʼo taluk li Ajvalilal avuʼune» (Mateo 6:9, 10).

Jaʼ tspas mantal liʼ ta balumil li Ajvalilal yuʼun Diose xchiʼuk chakʼbe slajeb skotol li vokoliletik oy avie. Taje jaʼ jun lekil ajvalil ti chventainatik yuʼun li krixchanoetike. Jaʼ yuʼun li Jesuse laj yakʼ persa ta xcholel «li lekil aʼyejetik ta sventa li Ajvalilal» kʼalal liʼ toʼox oy ta balumile xchiʼuk laj yalbe li yajchankʼoptak ti akʼo jech spasike (Mateo 4:23; 24:14).

Ta skoj ti skʼanojutik tajek li Jeovae chal li kʼusitik kʼupil sba chakʼbutik ta jelavele. ¿Mi mu jechuk ti tstij avoʼonton sventa xavojtikin mas xchiʼuk ti xakʼot ta yamigoe? ¿Kʼusitik sbalil chata mi jech la apase? Jkʼeltik li ta yan mantal chtale.