¿Kʼusi tspas ta jtojolaltik li Ajvalilal yuʼun Diose?

LI KʼUSITIK SPASOJ LI AJVALILAL YUʼUN DIOSE

Li ta yan mantal echʼe te laj kalbetik skʼoplal li senyailtak laj yal Jesuse. Li senyailtak taje jaʼ sprevail ti laj xa stsak yabtel ta Ajvalil li Jesukristoe.

Li Vivliae chal ti kʼalal och ta Ajvalil li Jesuse, la sjip yalel ta balumil li Satanas xchiʼuk spukujtake. Ta skoj ti liʼ xa oyik ta balumile, sokem xa tajek yuʼunik li jkuxlejaltik ti te lik talel ta 1914 (Apokalipsis 12:7, 9).

Akʼo mi yantik sok batel li jkuxlejaltike, li Ajvalilal yuʼun Dios ti jaʼ li Jesuse ep kʼusi lekik spasoj ta stojolal li krixchanoetike. Jaʼ tsbeiltas li chanubtasel ta Vivlia yakal chichʼ akʼel ti skoltaoj ta smiyonal xa noʼox krixchanoetik yoʼ xakʼ ta xkuxlejalik li beiltaseletik ta Vivliae (Isaias 2:2-4). Li krixchanoetik taje xchanojik xa ti muʼyuk tsmil sbaik ta abtele, mas xa lek oy xchiʼuk yutsʼ yalalik xchiʼuk tskʼupinik li kʼusi x-ayan yuʼunike, maʼuk ti jaʼ xa batem-o ta yoʼontonike. Staojik koltael ta Vivlia sventa lekuk li kʼusi tspas ta xkuxlejalike xchiʼuk chkoltaatik sventa jechuk stalelalik jech kʼuchaʼal tskʼan li Diose.

¿KʼUSI TI JUTUK XA SKʼAN SPAS LI AJVALILAL YUʼUN DIOSE?

Akʼo mi yakal xa tspas mantal ta vinajel li Jesuse, jaʼ li’ to yakal tspasik mantal ta balumil li krixchanoetike. Pe xi albat yuʼun Dios li Jesukristoe: «Paso batel mantal ta stojolal li avajkontratake» (Salmos 110:2). Jutuk xa skʼan slajesbe skʼoplal yajkontratak li Jesuse xchiʼuk jutuk xa skʼan slajesbe skʼoplal svokoltak li yajtuneltak Diose.

Mi sta yoraile, li Ajvalilal yuʼun Diose oy kʼusitik chlik spas.

• Tslajesbe skʼoplal li jecheʼ relijione. Li Vivliae tskoʼoltas ta jun jchonbail ants li jecheʼ relijion ti jutuk xa skʼan xichʼ lajesele. Jaʼ yuʼun, li relijionetik ti muʼyuk jamal chchanubtasvanik ta sventa li Diose xchiʼuk ti jaʼ noʼox yakʼojbe svokol li krixchanoetike ta me xichʼik lajesel. Ep buchʼutik labal sba chilik mi laj yichʼ lajesele (Apokalipsis 17:15, 16).

• Chakʼbe slajeb li ajvaliletik liʼ ta balumile. Li Ajvalilal yuʼun Diose chakʼbe slajeb li ajvaliletik liʼ ta balumile (Apokalipsis 19:15, 17, 18).

• Chakʼbe slajeb li chopol krixchanoetike. ¿Kʼusi chkʼot ta stojolalik li buchʼutik jaʼ noʼox batem ta yoʼontonik spasel li kʼusi chopole ti mu skʼan xchʼunbeik li smantal Diose? «Li buchʼutik toj chopolike ta xichʼik kʼokel lokʼel li ta balumile» (Proverbios 2:22).

• Chakʼbe slajeb li Satanas xchiʼuk spukujtake. Li Satanas xchiʼuk spukujtake muʼyuk xa tsloʼla li lumetike (Apokalipsis 20:3, 10).

¿Kʼusi chkʼot ta stojolalik li buchʼutik chakʼ sbaik ta ventainel yuʼun li Ajvalilal yuʼun Diose?

¿KʼUSI TSPAS TA STOJOLAL KRIXCHANOETIK LI AJVALILAL YUʼUN DIOSE?

Akʼo mi ta vinajel to tspas mantal li Jesuse, mas to ep kʼusitik tspas kʼuchaʼal li ajvaliletik liʼ ta balumile. Jech xtok, chkoltaat yuʼun li 144 mil ti laj yichʼik tʼujel lokʼel ta stojolal krixchanoetik ti ch-ochik ta ajvalilale (Apokalipsis 5:9, 10; 14:1, 3). Chakʼ kʼotuk ta pasel li kʼusi oy ta yoʼonton Dios ta sventa li balumile. ¿Kʼusi tspas ta stojolal krixchanoetik li Ajvalilal yuʼun Diose?

• Tslajesbe skʼoplal li chameletik xchiʼuk lajelale. «Mi junuk jnaklej ta balumil xi chale: ‹Toj ipun›» xchiʼuk «muʼyuk xa lajelal» (Isaias 33:24; Apokalipsis 21:4).

• Chakʼ jun oʼontonal xchiʼuk muʼyuk xa kʼusi chijxiʼo. «Ta x-epaj li jun oʼontonal chaʼiike» xchiʼuk «ta jujuntal te chchoti ta yolon steʼel s-uvaik xchiʼuk ta yolon steʼel s-igoik, muʼyuk buchʼu tsibtasatik» (Isaias 54:13; Mikeas 4:4).

• Chakʼ kʼupil sba kabteltik. «Ta skʼupinik lek yabtel skʼobik li buchʼutik jtʼujoje. Mu jecheʼuk noʼox ti tsots ch-abtejike» (Isaias 65:22, 23).

• Tslekubtas li osil balumile. «Li takixokol balumile xchiʼuk li takin balumile ta xmuyubajik, li stenlejaltik ti takin tajeke xkuxet noʼox yoʼonton likel xchiʼuk chnichin kʼuchaʼal li asafran nichime» (Isaias 35:1).

• Chchanubtas kʼusi skʼan spasik li krixchanoetik yoʼ xkuxiik sbatel osile. «Jaʼ skʼoplal kuxlejal sbatel osil liʼe: ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe» (Juan 17:3).

Li Diose tskʼan ti akʼo xakʼupin li bendisionetik taje (Isaias 48:18). Li ta yan mantal chtale te chavakʼ venta kʼusi xuʼ xapas avi sventa xakʼupin li bendisionetik chtal ta tsʼakale.