MANTAL TA SLIKEBALTIK PAJINA: ¿MI OY BUCHʼU SNAʼ LI KʼUSI CHKʼOT TA PASEL TA JELAVELE?

Jlom noʼox kʼotem ta pasel li kʼusitik albile

¿Mi chakʼan chanaʼ kʼusi chkʼot ta atojolal ta jelavel? Oy ep krixchanoetik ti tskʼan tsnaʼike. Jaʼ yuʼun oy ep buchʼutik chakʼik persa sabel smelolal li kʼusi chkʼot ta pasel ta jelavele, pe oy muʼyuk chkʼot ta pasel li kʼusi chalike:

LI SIENTIFIKOETIKE ta slajesik epal takʼin xchiʼuk tstunesik li kʼusitik achʼ chlokʼanuk yoʼ chalik li kʼusitik chkʼot ta pasel ta jelavele. Jech kʼuchaʼal ti kʼuxi ta sokes Balumil ta jelavel li yikʼubtasel osil-balumile, mi ta xakʼ voʼ o mi moʼoj o yan kʼusitik.

LI BUCHʼU CHCHANBEIK SKʼOPLAL POLITIKA XCHIʼUK PʼOLMAJELE chalbeik skʼoplal li kʼusi chkʼot ta pasel ta sventa li pʼolmajele xchiʼuk li politikae. Oy ep jkʼulejetik ta spʼejel Balumil, li june jaʼ Warren Buffett. Ep buchʼutik tsnopik ti chalbe skʼoplal kʼusi jtosuka pʼolmajebal xuʼ spasik-o lek kanale. Oy yan vinik ti Nate Silver sbi ti chalbe skʼoplal li kʼusitik chkʼot ta pasel sventa politika ta Estados Unidos xchiʼuk ti buchʼu tspas kanal li ta pelikula sventa Hollywood.

JUNANTIK VOʼNE TSʼIBETIK albil smelolal kʼuchaʼal albilkʼopetik. Li kʼusi la stsʼiba Michel de Notredame (Notradamus) ta siglo 16 ti mu stakʼ aʼibel lek smelolale, oy jlom chalik ti yakal chkʼot ta pasel li avie. Ta skoj li kʼusi chal li skalendario maya ti tsuts ta 21 yuʼun disiembre ta 2012, ep buchʼu la snopik ti oy kʼusitik tsots chkʼot ta pasele.

JNITVANEJETIK TA RELIJIONE bakʼintike chalbeik skʼoplal kʼusitik toj xibal sba chkʼot ta pasel ta spʼejel Balumil yoʼ tspʼijubtasik li krixchanoetike xchiʼuk yoʼ oyuk buchʼu mas xtal ta stojolalik. Li buchʼu chalbe skʼoplal li kʼusitik xibal sba chkʼot ta pasel ti Harold Camping sbie lik yal xchiʼuk sviniktak ti chlaj li Balumil ta 2011. Pe muʼyuk xkʼot ta pasel li kʼusi laj yale.

KRIXCHANOETIK TI XTOJOBIK LA TA YALEL LI KʼUSI CHKʼOT TA PASELE chalik ti xtojobik la sventa chalbeik skʼoplal li kʼusi chkʼot ta pasel ta jelavele. Li Edgar Cayce xchiʼuk Jeane Dixone oy kʼusitik tukʼ laj yalbeik skʼoplal ti kʼot ta pasel ta siglo 20. Pe oy kʼusi laj yalbeik skʼoplal xtok ti muʼyuk kʼot ta pasele. Jech kʼuchaʼal liʼe, li Dixone laj yal ti chlik la Yoxibal Mukʼta Paskʼop ta spʼejel Balumil li ta 1958. Li Cayce eke laj yal ti chmuk la ta nab li Nueva York ta sjabilaltik 1970.

¿Mi oy kʼuxi xuʼ jnaʼtik ta melel li kʼusi chkʼot ta pasel ta jelavele? Skʼan jnabetik stakʼobil maʼ taje. Yuʼun ti jnaʼtikuk li kʼusi chtal ta jelavele, chjel li jkuxlejaltike.