¿Kʼusi spatobil oʼontonal oy ta stojolal li jmoltotak ta voʼnee?
OY XA kʼuk sjalil ti oy kʼusi toj labal sba la yichʼ alel ta jlik periodiko ta Corea ti jaʼ sbi The chosun Ilbo ti xi chale: «¿Mi bat van ta kʼatinbak li Shim Cheong ti jaʼ jun ants lek stalel ti muʼyuk kʼusi snaʼ ta sventa li Jesuse?».
Toj vokol tajek li kʼusi laj yichʼ alel taje, yuʼun li Shim Cheongee jaʼ jun tseb ti lek kʼanbil ti laj yakʼ ta vokol xkuxlejal ta skoltael stot ti maʼsate, ti te chalbe skʼoplal ta livroetik ti lek ojtikinbile. Ep jabil lek laj yichʼ albel skʼoplal li kʼusitik la spase xchiʼuk kʼot kʼuchaʼal skʼelobil yuʼunik li tsebetik ta Coreae.
Li periodiko taje te chalbe skʼoplal ti la xchiʼinik ta loʼil jun palee. Kʼalal laj yichʼ jakʼbel mi ta kʼatinbak batik li buchʼutik muʼyuk laj yojtikinik Jesús jlom krixchanoetik ti chamemik xae, xi la stakʼ li palee: «Mu jnaʼtik. Jaʼ noʼox ta jnop ti oy kʼusi ch-akʼbatik yuʼun Dios [li krixchanoetik taje]».
JAʼ SVENTA TA JTATIK-O KOLEBAL
Li livro The New Catholic Encyclopedia xi chale: «Li ichʼvoʼe tsots skʼoplal sventa xijkolutik. Jech kʼuchaʼal laj yal stuk li Jesuse, li buchʼu muʼyuk chchaʼvokʼ ta sventa voʼ xchiʼuk ta sventa Chʼul Espiritue, mu xuʼ chichʼ ventainel yuʼun Dios (Jn 3:5)». Ta skoj taje, ep buchʼutik xchʼunojik ti ta onoʼox xil svokolik o ti chbatik ta kʼatinbak mi muʼyuk yichʼojik voʼ kʼalal chchamike.
Akʼo mi jech, ep buchʼutik xchʼunojik xtok ti mu la sta-o chaʼiik li chanubtasel taje. Ta smiyonal noʼox krixchanoetik muʼyuk laj yojtikinik kʼusi chal Vivlia kʼalal chamike. ¿Mi sta-o van ta melel ti xichʼik kastigo ta kʼatinbake? ¿Kʼusi van chal Vivlia ta sventa taje?
LI SPATOBIL OʼONTONAL CHAL VIVLIAE
Li Vivliae jamal chal ti Diose muʼyuk tspʼaj li krixchanoetik ti muʼyuk bu laj yojtikinbeik li smantaltake. Li ta Hechos 17:30 xi chalbutik ta melele: «Ta voʼonee muc toʼox xacʼ ta venta cʼu xʼelan sbol talelic li cristianoetique». Jaʼ yuʼun chaʼa, ¿kʼusi van spatobil oʼontonal oy ta sventa li buchʼutik chamemik xa ti muʼyuk laj yojtikinik li Diose?
Te ta jtabetik stakʼobil li kʼusi laj yal Jesuse, ti jaʼ laj yalbe jun jpasmulil vinik ti te cham ta xokone. Li vinike xi la skʼanbe vokol li Jesuse: «Naʼun me ti cʼalal chlic apas mantale». ¿Kʼusi la stakʼ li Jesuse? «Ta melel chkalbot avaʼi li avie: Te chachiʼinun ta Paraiso.» (Lucas 23:39-42; 23:43, TNM.)
¿Mi yuʼun van albat yuʼun Jesús ti chbat ta vinajele? Moʼoj, yuʼun li vinike muʼyuk toʼox vokʼem ta achʼ, jech xtok muʼyuk toʼox vokʼem ta voʼ xchiʼuk ta sventa li chʼul espiritue, yuʼun persa skʼan pasel sventa x-och li ta Ajvalilal ta vinajele (Juan 3:3-6). Li kʼusi albat yuʼun Jesuse jaʼ ti chkuxi yan velta li «ta Paraisoe». Li judío vinik taje yaʼiojbe onoʼox van skʼoplal li Paraiso ta voʼnee, li nichimaltik Edén ti te chalbe skʼoplal li ta slivroal Genesise (Génesis 2:8). Li Jesuse laj yakʼbe spatobil yoʼonton ta melel, ti chichʼ chaʼkuxesel kʼalal mi kʼatajem xaʼox ta paraiso li Balumile.
Jamal chalbutik Vivlia ti «ta xchaʼcuxiic li bochʼotic lequique xchiʼuc li bochʼotic chopolique» (Hechos 24:15). Li buchʼutik «chopolique» jaʼik li buchʼutik muʼyuk la spasbeik stukʼil mantaltak Dios ta skoj ti muʼyuk bu laj yojtikinik jsetʼuke. Li Jesuse ta xchaʼkuxes ta jun paraiso Balumil li jpasmulil vinike xchiʼuk ta smiyonal xa noʼox krixchanoetik ti muʼyuk laj yojtikinik Dios kʼalal chamike. Taje te chchanbeik li smantaltak Diose xchiʼuk jaʼ te xuʼ xakʼik ta ilel ti chchʼunbeik li smantale, vaʼun jaʼ jech chakʼik ta ilel ti skʼanojike.
¿KʼUSI CHKʼOT TA PASEL KʼALAL MI CHAʼKUXIIK LI BUCHʼUTIK «CHOPOLIQUE»?
Mi chaʼkuxiemik xaʼox li buchʼutik «chopolique», ¿mi jaʼ van chichʼik-o chapanel ta skoj li kʼusitik spasojik ta voʼnee? Moʼoj, yuʼun li ta Romanos 6:7 xi chale: «Yuʼun li bochʼo icham xae, icol xa ta mozoinel yuʼun li mulile». Jech kʼuchaʼal chkiltike, li buchʼutik «chopolique» jaʼ xa te tstoj-o smulik kʼalal chchamike, jaʼ yuʼun kʼalal chichʼik chapanele maʼuk ta skoj li kʼusitik la spasik kʼalal muʼyuk toʼox chamemike, moʼoj, jaʼ chichʼik-o chapanel li kʼusitik tspasik kʼalal mi chaʼkuxiemik xaʼoxe. ¿Kʼu yuʼun mas lek ti jech taje?
Yuʼun xuʼ to xchanbeik li smantaltak Diose, ti te chichʼ akʼel ta ilel li balbal vunetike, ti ta babakʼop chichʼ albel skʼoplale. Vaʼun chichʼik chapanel ti «cʼu xʼelan yabtelique», jaʼ xkaltik, mi la xchʼunik o mi muʼyuk li mantaletike (Apocalipsis 20:12, 13). Ep li buchʼutik taje maʼuk ti xchibal xa velta chchanike, moʼoj, sba to velta chchanik xchiʼuk sba to velta tspasbeik kʼusi tskʼan yoʼonton Dios sventa xuʼ sta xkuxlejalik sbatel osil liʼ ta Balumile.
Li chanubtasel ta Vivlia taje skoltaoj epal krixchanoetik sventa xakʼ xchʼunel yoʼontonik yan velta ta stojolal li Diose. Jaʼ jech kʼot ta stojolal li Yeong Suge. Te laj yichʼ tsʼitesel talel ta katoliko xchiʼuk stsakoj lek ta mukʼ li kʼusi xchʼunoje. Li junantik yutsʼ yalale jaʼ paleetik. Ta skoj ti tskʼan chkʼot ta monjae och ta konvento; pe muʼyuk bu jalij te yuʼun chibaj-o yoʼonton li kʼusitik chichʼ pasel tee. Jech xtok mu xchʼun ti te chil svokolik ta kʼatinbak li krixchanoetike; maʼuk jech smelolal xchiʼuk chopol tajek laj yaʼi.
Ta mas tsʼakale akʼbat yil jun teksto ta Vivlia yuʼun jun stestigo Jeova, ti xi chale: «Li bochʼotic cuxulic toe snaʼic ti ta onoʼox xchamique, pero li bochʼotic chamenic xae mu xa cʼusi snaʼic o» (Eclesiastés 9:5). Albat lek smelolal ti muʼyuk bu yakal chil svokolik ta kʼatinbak li smoltotake, ti jaʼ noʼox chvayik ta lajelal ti smalaojik chichʼik chaʼkuxesele.
Li Yeong Suge snaʼoj ti oy epal krixchanoetik ti mu xojtikinik li melel chanubtasel ta Vivliae, jaʼ yuʼun lik spas li kʼusi laj yal Jesús ti te chal ta Mateo 24:14: «Persa baʼyuc ta xichʼ cholel ta sbejel banamil li Lequil Aʼyej ta jventae; jaʼ to ta xtal li slajebal cʼacʼale». Li avi une chalbe lekil aʼyejetik li krixchanoetike xchiʼuk tsloʼiltabe li jun yutsil spatobil oʼontonal ti te la xchan ta Vivliae.
«MUC TʼUJBILUC BOCHʼO CHCʼUXUBIN LI DIOSE»
Xi chal li Vivliae: «Muc tʼujbiluc bochʼo chcʼuxubin li Diose. Buyuc noʼox banamilal oy li cristianoetique lec ta xʼilatic yuʼun Dios me ta xichʼic ta muqʼue, me tspasic cʼusi tuqʼue» (Hechos 10:34, 35). Taje jaʼ li kʼusi lek tukʼ ti jech onoʼox jmalaojtik tspas li Diose. ¿Kʼu yuʼun? Yuʼun «li Mucʼul Diose jaʼ lec chil li cʼusi tuqʼue» (Salmo 33:5).
[Lokʼol ta pajina 11]
¿Kʼusi la skʼan laj yal Jesús ti xi laj yale: «Te chachiʼinun ta Paraiso»?