KʼUSITIK CHICHʼ JAKʼEL TA SVENTA VIVLIA

¿Kʼu yuʼun lek ti jpastik orasione?

Li Diose tskʼan ti nopajtik noʼox jkʼopontike xchiʼuk ti xkalbetik li kʼusi ta jvul-o koʼontontike (Lucas 18:1-7). Li stuke ta xaʼibutik yuʼun oyutik ta yoʼonton. Li Jtotik ta vinajele ta slekil yoʼonton chalbutik ti akʼo jkʼopontike. ¿Mi muʼyuk oy ta avoʼonton chachʼam li takel ta ikʼel taje? (Kʼelo Filipenses 4:6.)

Li orasione maʼuk noʼox sventa ta jkʼantik-o koltael, yuʼun jaʼ chijnopajutik-o ta stojolal Dios (Salmo 8:3, 4). Kʼalal chkalbetik jujukoj ti kʼu yelan chkaʼi jbatike tstsatsub ti kʼu yelan xkil jbatik jchiʼuktike. (Kʼelo Santiago 4:8.)

¿Kʼu yelan skʼan jpastik orasion?

Kʼalal ta jpastik orasione li Diose mu skʼan ti toj tsotsik ta aʼiel li kʼusi chkaltike o ti komem xa ta joltike. Jech xtok, muʼyuk tskʼanbutik kʼu yelan skʼan xkakʼ jbatik kʼalal ta jpastik orasione. Li kʼusi tskʼane jaʼ ti ta sjunuluk koʼontontik jpastike (Mateo 6:7). Jun skʼelobile jaʼ li ta skʼakʼalil j-israeletike, li Anae la spas orasion ta skoj ti la snuptan tsots vokolil ta yutsʼ yalale. Ta tsʼakale, kʼalal chʼabal xaʼox li svokole, la spas jun orasion sventa tstoj ta vokol. (Kʼelo 1 Samuel 1:10, 12, 13, 26, 27; 2:1.)

Ti xuʼ xkalbetik jvokoltik li Jpasvanej kuʼuntike, ¡jaʼ jun mukʼta matanal! Jech xtok xuʼ jkʼupil kʼoptatik xchiʼuk jtojbetik ta vokol skotol li kʼusi ta spase. Epuk me sbalil xkiltik li kʼupil sba mantal akʼbilutike, li orasione. (Kʼelo Salmo 145:14-16.)