Ta jchʼaybe toʼox kaʼi skʼoplal ti muʼyuk tukʼilale xchiʼuk li majbaile

LI JKUXLEJAL TOʼOXE:

Te likemun ta Rmeich jun lum ta Líbano ti stsʼakinoj Israele. Jaʼo lichʼi kʼalal yorail paskʼope. Xvul to lek ta jol ti kʼu yelan chtʼomanuk vombaetik ti mukajtik ta balumil ti chakʼbe ep svokol li krixchanoetik ti muʼyuk smulike, yuʼun mokajtik chkom li yok skʼobike. Solel toj tsots li kuxlejale; li milbaile xchiʼuk li majbaile ta buyuk noʼox oy.

Li kutsʼ kalale oyik toʼox ta jun relijion ti Maronita sbie, ti jaʼ jtos relijion katolika te ta slokʼeb Kʼakʼale. Li jtote batem yoʼonton ta saʼel li kʼusi chtun kuʼunkutik ta kutsʼ kalalkutike, yuʼun lajchaʼvoʼunkutik. Pe li jmeʼe chikʼunkutik onoʼox batel ta chʼulna. Ta mas tsakale, laj kakʼ venta ti chʼulnae muʼyuk tskoltaik li buchʼutik oy svokolike jech kʼuchaʼal tspasik li yan krixchanoetike.

Kʼalal jaʼo chex jchʼielune lik ayanuk ta koʼonton xchanel kung fu (ti xkoʼolaj kʼuchaʼal karatee). Tsots laj kakʼbe yipal xchanel, vaʼun la jchan lek yakʼel majel, yakʼel patada xchiʼuk la jchan stunesel jaytosuk abtejebal sventa karate. Xi laj kalbe jbae: «Mu spajes kuʼun li paskʼope, pe xuʼ jpajes li krixchanoetik ti chmajvanike». Kʼalal oy bu chkil tsmaj sbaik chaʼvoʼ krixchanoe ta jtikʼ jba ta anil ek. Toj anil jnaʼ xi-ilin xchiʼuk jlikeluk noʼox mi la sabeikun jole. Li krixchanoetik ta sural Libanoe xiʼemik ta jtojolal, yuʼun ta jchʼaybe toʼox kaʼi skʼoplal ti muʼyuk tukʼilale xchiʼuk li majbaile.

Li ta 1980 li-och ta jun grupo sventa kung fu ta Beirut. Akʼo mi skotol kʼakʼal chtʼomanuk vomba xchiʼuk tukʼetik chibat onoʼox ta xchanilanel kung fu. Li kʼusi noʼox ta jpase jaʼ noʼox chiveʼ, chivay jech kʼuchaʼal li xkuxlejal Bruce Lee, jun vinik ti lek ojtikinbil chlokʼ ta television ti jaʼ chino li stote pe te vokʼ ta Estados Unidos xchiʼuk jaʼ jun bankilal jpas kanal ta kung fu. Jech ta jtus jol kʼuchaʼal stuke, ti kʼu yelan chanave, ti kʼu yelan chi-avan kʼalal ta jpas kʼope. Muʼyuk bu chitseʼin jutebuk.

TI KʼU YELAN LA SJEL JKUXLEJAL LI VIVLIAE:

Li kʼusi oy ta koʼontone jaʼ ti xkichʼ lek ojtikinel ta China ti xitojob lek ta kung fue. Oy jun kʼakʼal, kʼalal jaʼo solel tsots ta jchanilan kung fu yoʼ jchapan jba sventa chibat ta Chinae, laj kaʼi ti tstijik li tiʼ nae. Jaʼo jlapoj jtraje sventa kung fu ti ikʼ skolorale xchiʼuk solel xichikʼinaj. Kʼalal la jam li tiʼ nae, jaʼ jun kamigo ti yikʼoj kʼotel chaʼvoʼ stestigo Jeovae. Tskʼan ox chalbeikun skʼoplal Vivlia, pe laj kalbeik ti mu jnaʼ jsetʼuk maʼ ta sventa li Vivliae. Muʼyuk bu la jnop jsetʼuk mi te chlik jeluk li jkuxlejale.

Li stestigotak Jeovae laj yakʼbeikun kil ta Vivlia ti kʼu yuʼun mu xlaj skʼoplal yuʼunik majbail xchiʼuk muʼyuk tukʼilal li krixchanoetike. Laj yalbeikun smelolal ti jaʼ chakʼ skotol vokolil li Satanase (Apocalipsis 12:12). Toj labal sba laj kil ti jun yoʼontonik li stestigotak Jeovae xchiʼuk ti solel xchʼunojik li kʼusi laj yalbeikune. Jech xtok, kʼot ta koʼonton kʼalal laj kaʼi ti oy sbi li Diose (Salmo 83:18). Laj yakʼbeikun kil xtok li 1 Timoteo 4:8, ti xi chale: «Li bochʼo ta snopes sbecʼtal ta jchopuc tajimole, lec ta xtun ta sventa jaychopuc noʼox. Yan li bochʼo ta snopes sba ta yichʼel ta mucʼ Diose, jaʼ chtun ta sventa scotol. Oy cʼusi ta jtatic yuʼun ta sventa jcuxlejaltic liʼ ta ora xchiʼuc ta sventa sbatel osil». Li teksto taje jaʼ la sjelbun-o li jkuxlejale.

Kʼux ta alel, pe muʼyuk xa bu la jta ta chiʼinel ta loʼil yan velta li stestigotak Jeovae, yuʼun li kutsʼ kalale laj yalbeik ti mu xa sutik tale. Akʼo mi jech, la jnop ti chkikta xchanilanel li kung fu sventa xlik jchan li Vivliae. Li jchiʼiltak ta vokʼele muʼyuk bu lek laj yaʼiik, pe jpʼel ta koʼonton la jsaʼ li stestigotak Jeova yoʼ xi xchanubtasik mas ta Vivliae.

Ep ta velta la jsaʼ li stestigotak Jeovae pe muʼyuk bu la jta. Kʼalal jaʼo yakal ta jsaʼilanike anil cham li jtote xchiʼuk oy kʼusi tsots kʼot ta stojolalik li kutsʼ kalaltake. Li kʼusitik kʼot ta pasel taje li ipaj-o tajek ta at-oʼonton yuʼun. Jech xtok, jsaʼoj xaʼox kabtel ta jun empresa sventa svaʼanel naetik. Oy jun kʼakʼal li ta kabtele la xchiʼinun ta loʼil jun jchiʼil ta abtel ti Adel sbie, la sjakʼbun ti kʼu yuʼun chkat tajek koʼontone. Lik yalbun li spatobil oʼontonal chal Vivlia ta sventa li chaʼkuxesele. Jaʼ to chkaʼie jaʼ stestigo Jeova. Li baluneb u echʼe li xchanubtas ta Vivlia li Adele. Oy lek smalael yuʼun xchiʼuk laj yakʼ ta ilel slekil yoʼonton ta jtojolal.

Kʼalal yakal ta jchan batel mas li Vivliae, laj kakʼ venta ti ep kʼusitik skʼan jel li ta jkuxlejale, pe mu kʼunuk laj kaʼi. Toj anil jnaʼ xi-ilin, pe li ta Vivliae la jchan kʼuxi xuʼ jpajes li skapemal jole xchiʼuk ti mu jujulikeluk xi-iline. Li ta Mateo 5:44 te chal li tojobtasel laj yal Jesuse: «Cʼuxubino avajcontraic; cʼopanbeic Dios ta stojol li bochʼotic chayutsʼintaoxuque». Li ta Romanos 12:19, xi chpʼijubtasvane: «Mu me xapac acʼoplal atuquic. [...] Yuʼun jech tsʼibabil ta scʼop Dios: ‹Vuʼun oy ta jventa ta xcacʼbe spacol; vuʼun jtuc ta xcacʼbe stoj›, xi li Cajvaltic Diose». Koliyal li tekstoetik taje xchiʼuk yan tekstoetike, jaʼ la skoltaun ta kʼunkʼun sventa xlekub batel mas li jtalelale.

KʼUSITIK SBALIL JTAOJAN:

Akʼo mi chopol laj yaʼiik kutsʼ kʼalal ti lik jchan Vivlia xchiʼuk li stestigotak Jeovae, pe li avie chichʼik xa ta mukʼ. Yuʼun li jun jchiʼil ta vokʼele och ta stestigo Jeova ek. Jech xtok, li jmeʼe la spakbe skʼoplal li kʼusi jchʼunojkutik jaʼ to ti kʼuxi chame.

Li Jeovae yakʼojbun bendision yuʼun li linupun xchiʼuk li Anita ti jaʼ jun lekil ajnilal xchiʼuk tukʼ yakʼoj sba. Ep jchʼakojbekutik yorail sventa koʼol ta jcholkutik mantal. Leʼ xa ta sjabilal 2000 te nakalunkutik ta Eskilstuna (Suecia), li tee ta jkoltakutik ta xchanubtasel ta Vivlia li krixchanoetik ti chkʼopojik ta arabee.

Jech-o ta jnopilan ta stojolal li krixchanoetik ti chil svokolike. Pe ti laj xa jnaʼ ti kʼu yuʼun oy vokolil xchiʼuk ti poʼot xa chakʼbe slajeb li Diose ta xakʼbun jun oʼontonal xchiʼuk muyubajel (Salmo 37:29).