KʼUSITIK CHICHʼ JAKʼEL TA SVENTA VIVLIA

¿Mi likem tal ta stojolal Dios skotol li relijione?

Kʼalal ta jchikintatik li notisiae xuʼ van oy kakʼojtik venta ti jaʼ tspakʼtaik relijion sventa tspasik kʼusitik toj chopol. Pe mu skotoluk relijion likem tal ta stojolal Dios (Mateo 7:15). Jutuk mu skotoluk krixchano lajemik ta loʼlael. (Kʼelo 1 Juan 5:19.)

Akʼo mi jech, li Diose snaʼoj ti oy krixchanoetik ti skʼanojik li kʼusi tukʼe xchiʼuk li kʼusi melele (Juan 4:23). Jaʼ yuʼun li Diose yakal tstak ta ikʼel li krixchanoetik taje, sventa xchanik li kʼusi melel ta Skʼope, li Vivliae. (Kʼelo 1 Timoteo 2:3-5.)

¿Kʼuxi xuʼ jnaʼtik bu junukal li melel relijione?

Li Jeovae jmoj xa tsobol yuʼun krixchanoetik ti jeltos toʼox srelijionike. ¿Kʼuxi pasem yuʼun? Jaʼ ti chchanubtas ta sventa li kʼusi melele xchiʼuk ti akʼo skʼan sbaik ta jujuntale (Miqueas 4:2, 3). Ti kʼuxi xuʼ jnaʼtik bu junukal li melel relijione jaʼ ti tskʼan sbaik ta jujun tale. (Kʼelo Juan 13:34, 35.)

Li melel yajtuneltak Diose xchʼunojik li kʼusi chal Vivliae xchiʼuk chakʼ ta xkuxlejalik li kʼusi chale (2 Timoteo 3:16). Chichʼbeik ta mukʼ li sbi Diose (Salmo 83:18, TNM). Jech xtok, chalbeik skʼoplal ti jaʼ noʼox xuʼ xichʼ talel lekilal ta stojolal krixchanoetik li Ajvalilal yuʼun Diose (Daniel 2:44). Ta xojobajik kʼuchaʼal lus kʼalal tskoltaik li xchiʼiltakik jech kʼuchaʼal la spas li Jesuse (Mateo 5:16). Ta melel toj kʼun ta ojtikinelik ta skoj ti tsvulaʼan slakʼnaik sventa chbat yalbeik li kʼusitik lek chichʼ talel li Ajvalilal yuʼun Diose. (Kʼelo Mateo 24:14; Hechos 5:42; 20:20.)