¿Buchʼu la spas li Diose?

Li totile xi chalbe li yuni kerem ti vukub sjabilale: «Oy xa ta epal jabiletike li Diose la spas li Balumile xchiʼuk skotol li kʼusitik oy tee. Jech xtok la spas li Kʼakʼale, li Ue xchiʼuk li kʼanaletike». Li uni kʼoxe tsnopbe skʼoplal uni jlikeluk taje, vaʼun xi tsjakʼe: «Tot... ¿buchʼu la spas li Diose?».

Xi tstakʼ li totile: «Muʼyuk buchʼu pasat, li stuke te xa onoʼox oy». Ti kʼu yelan takʼbat yuʼun stot li uni kʼox kereme jun yoʼonton kom-o. Pe kʼalal mi chʼi batele tskʼan-o tsnaʼ bu lik talel li Diose. Yuʼun toj vokol ta aʼiel chaʼi kʼuxi vul ta lokʼel li Dios ti chʼabal slikebe. Xi tsnope: «¿Kʼuxi xa noʼox jech?». Yuʼun kʼalal ta vinajelbalumil oy slikeb. Muʼyuk takʼbil-o li kʼusi la sjakʼe: ¿bu lik talel li Diose?

¿Kʼusi chal li Vivliae? Li Vivliae jech chalbe smelolal kʼuchaʼal laj yal li totile. Xi laj yalbe Jeova li Moisese: «Cajval, [...] cʼalal muʼyuc toʼox ch-ayin li vitsetique, cʼalal muʼyuc toʼox ch-ayin li banamil xchiʼuc li cʼusitic oye, voʼot onoʼox Diosot o; sbatel osil te oyot o» (Salmo 90:1, 2). Li j-alkʼop Isaiase jech laj yal ek: «¿Me yuʼun mu xanaʼic, me muʼyuc avaʼyojic? Li Dios ti te oy o sbatel osile, jaʼ li Mucʼul Diose, jaʼ la spas sbejel li banamile» (Isaías 40:28). Li skarta Judase chal ek ti «sbatel osil» oy-o li Diose (Judas 24, 25).

Li tekstoetik taje chakʼ kiltik ti jaʼ «Mucʼta Ajvalil cuʼuntic ta sbatel [osil]» li Diose, jech kʼuchaʼal laj yal li jtakbol Pabloe (1 Timoteo 1:17). Taje chakʼ jnatik ti te xa onoʼox oy-o li Diose, mu ventauk jaylajunebuk jabil echʼem talel. Jech xtok oy-o sbatel osil (Apocalipsis 1:8). Li Diose muʼyuk slikeb xchiʼuk slajeb, yuʼun jaʼ jech-o li stuke.

¿Kʼu yuʼun toj vokol ta aʼibel smelolal taje? Yuʼun li voʼotike mu jaluk chijkuxi, jech oxal solel jelel chkiltik ti kʼu yelan chil Jeova li kʼakʼaletike. Yuʼun li jmil jabile koʼol kʼuchaʼal jun kʼakʼal chil xchiʼuk te kuxul-o sbatel osil (2 Pedro 3:8). Kalbetik junuk skʼelobil, li jkot xkʼajbene o pʼilix jaʼtik noʼox 50 kʼakʼal chkuxi, ¿mi chaʼibe van smelolal ti chijkuxi 70 o 80 jabile? Xuʼ van mu xaʼi. Li voʼotik eke xijkoʼolaj kʼuchaʼal jkot xkʼajben kʼalal ta jkoʼoltas jbatik xchiʼuk li Jpasvanej kuʼuntike. Mu jechuk tajek ta jnoptik jech kʼuchaʼal tsnop li stuke (Isaías 40:22; 55:8, 9). Jech oxal mu labaluk chkaʼitik ti oy kʼusi mu xkaʼibetik smelolal li kʼusitik tsnop li Jeovae.

Akʼo mi toj vokol ta aʼiel ti kuxul-o sbatel osil li Diose, pe oy srasonal. Ti oyuk buchʼu pasat yuʼun li Diose, jaʼ Jpasvanej chkʼot ti jechuke. Pe li Vivliae chal ti jaʼ noʼox stuk Jeova la ‹spas skotol li kʼusitik oye› (Apocalipsis 4:11). Jech xtok, jnaʼojtik ti chʼabal toʼox li vinajelbalumile (Génesis 1:1; 1: 2, TNM). ¿Kʼuxi lik ayanuk? Ta melel jaʼ baʼyel lik ayanuk li Jpasvaneje. Yuʼun li stuke te xa onoʼox oy kʼalal muʼyuk toʼox pasbil jtosuk kuxlejale, jech kʼuchaʼal li baʼyel Xnichʼone xchiʼuk li anjeletike (Job 38:4, 7; Colosenses 1:15). Lek jamal xvinaj ti stuk toʼox li Dios kʼalal chʼabal toʼox spasoj li kʼusitike. Ta melel muʼyuk buchʼu pasat, yuʼun chʼabal toʼox kʼusi x-ayan kʼalal te xa onoʼox oye.

Ti laj kichʼtik pasel xchiʼuk ti laj yichʼ pasel li vinajelbalumile jaʼ sprevail ti oy jun Dios ti kuxul-o sbatel osile. Jaʼ yuʼun, mi jaʼ la spas li vinajelbalumil xchiʼuk ti jaʼ chakʼ ti lek abtejuk skotole, jaʼ svinajeb ti te xa noʼox oye. Jech oxal, jaʼ noʼox stuk laj yakʼbe xkuxlejal skotol li kʼusitik kuxajtike (Job 33:4).