¿Mi oy kʼusi chopol ta sventa li skʼinal Svokʼel Ninyoe?

Ta jujun jabile ta smiyonal xa noʼox krixchanoetik tspasik li skʼinal Svokʼel Ninyoe (Navidad). Oy junantike chalik ti jaʼ la yorail sventa jmoj oyik xchiʼuk yutsʼ yalalik xchiʼuk yamigoike; pe oy yantik xtoke jaʼ la yorail tsnopik ta sventa Dios xchiʼuk tskoltaik li buchʼutik abol sbaike. Akʼo mi toj lek li kʼusitik tspasik taje, oy onoʼox kʼusi chopol li ta skʼinal Svokʼel Ninyoe.

Ep buchʼutik tsnopik ti jaʼ la sventa spasbel skumpleanyo Jesús li skʼinal Svokʼel Ninyoe. Akʼo mi jech, jutuk mu skotoluk li j-al-loʼiletike chalik ti mu la buchʼu snaʼ kʼusi mero kʼakʼalil vokʼ li Jesuse. Li livro The Christian Book of Why (Ti kʼu yuʼun jech xchʼunojik li yajtsʼaklomtak Cristoe) chal ti «baʼyel yajtsʼaklom Cristoe muʼyuk la skʼan laj yakʼbeik lek jun skʼakʼalil sventa li svokʼel Jesuse», yuʼun la mu skʼan xkapijik xchiʼuk li «kʼusitik nopem xaʼiik spasel li buchʼutik maʼuk yajtsʼaklomtak Cristoe». Jech xtok, li Vivliae mu jsetʼuk bu chal ti la spasbe skʼinal kumpleanyo li Jesuse, mi jaʼuk li skumpleanyo stuke. Li kʼusi noʼox laj yalbe komel ti akʼo spasik li yajtsʼaklomtake, jaʼ ti akʼo stabeik ta naʼel li slajele (Lucas 22:19).

Jech xtok, jlom krixchanoetik ti lek chanemike, yakʼojik venta ti maʼuk te likem tal ta stojolal yajtsʼaklom Cristo li kʼusitik nopem xaʼiik spasel ta skʼinal Svokʼel Ninyo li krixchanoetike xchiʼuk li buchʼutik te chvinajike, jech kʼuchaʼal li árbol de Navidad, Santa Claus, ti chakʼbe sba smotonike, li kantelaetike, li sonetike, li lusetike xchiʼuk li jeltos veʼliletike. Jun livro sventa li relijion katolikae chal: «Ti chkakʼbe jba jmotontik ta skʼinal Svokʼel Ninyo xchiʼuk ti ta jpakʼtik corona ta stiʼ jnatik xchiʼuk ta chʼulnaetike, ¿jayvoʼ jnaʼojtik ti maʼuk likem talel ta stojolal yajtsʼaklomtak Cristoe?» (The Externals of the Catholic Church).

Xuʼ van xi chanop li voʼote: «¿Pe muʼyuk kʼusi chopol tspas li kʼinetike taje?». Xuʼ van jech. Pe ¿kʼusi van tsnop li Dios une? Li Vivliae chal ti toj chopol chil Dios ti tskap sba li melel relijion xchiʼuk li kʼusitik nopem xaʼiik spasel li buchʼutik maʼuk yajtsʼaklom Cristoe. Li ta Amós 5:21 xchiʼuk 23 xi chal li kʼusi albatik yuʼun Jeova li jtoyba israeletike: «Toj chopol chquil, contra chquil li qʼuinetic chapasique». Xchiʼuk xi to laj yale: «¡Loqʼuesic ta jtojol li epal qʼueoj xavochetic ta sqʼuejintaele!».

¿Kʼu yuʼun ti jech tsots kʼopoj li Diose? Jkʼeltik li kʼusi kʼotem toʼox ta pasele. Li ta Israele oy toʼox jun ajvalil ti Roboam sbi ti laj yakʼ slokʼol chʼiom tot vakaxetik ta oro li ta lumetik Dan xchiʼuk Betele. Jech xtok, laj yalbe krixchanoetik ti akʼo stunesik li chʼiom tot vakax sventa xichʼik-o ta mukʼ li Jeovae, vaʼun jaʼ jech mu persauk chbatik kʼalal ta Jerusalén. La slikes achʼ kʼinetik xtok xchiʼuk la stʼuj paleetik sventa jaʼ spasik li kʼinetik taje (1 Reyes 12:26-33).

Xuʼ van lek li kʼusi oy ox ta yoʼontonik li j-israeletike. Yuʼun ta alele jaʼ snopoj tspasik sventa chichʼik ta mukʼ li Jeovae. Li kʼusi tsots laj yal Amós xchiʼuk yan j-alkʼopetike, jamal laj yakʼik ta ilel li kʼusi oy ta yoʼonton Diose. Te van jayibuk siglo ta mas tsʼakale la svulesbe ta sjol li jteklume: «Vuʼun li Mucʼul Diosune mu jnaʼ jel o coʼnton» (Malaquías 3:6). Li Jeovae muʼyuk bu jelem-o. Jaʼ yuʼun, ¿kʼu van yelan chaʼi sba ta sventa li skʼinal Svokʼel Ninyoe?

Ta smiyonal xa noʼox krixchanoetik muʼyuk tspasbeik skʼinal Svokʼel Ninyo kʼalal chchanbeik skʼoplal li kʼusitik laj xa kaltik tale. Pe jun yoʼonton tstsob sbaik xchiʼuk yutsʼ yalalik, yamigoik xchiʼuk oy kʼusi tspasik ta stojolal li buchʼutik abol sbaike. Jaʼ noʼoxe ta kʼusiuk noʼox kʼakʼalil jech tspasik.