KʼUSITIK CHICHʼ JAKʼEL TA SVENTA VIVLIA

¿Kʼuxi xuʼ xlik skʼanik Dios li ololetike?

A parent teaching his child using lessons from creation — Sventa skʼanik Dios li avalab anichʼnabe, tuneso li kʼusitik spasojan Diose

Li avalab anichʼnabe jaʼ noʼox me xuʼ xlik skʼanik Dios mi snaʼojik ti oy ta melele xchiʼuk mi chakʼik venta ti kʼanbilik yuʼune. Sventa skʼanik li Diose skʼan me xojtikinik (1 Juan 4:8). Jech kʼuchaʼal liʼe, li stukike skʼan snaʼik ti kʼu yuʼun la spas krixchanoetik li Diose, ti kʼu yuʼun yakʼoj to oyuk vokolile xchiʼuk li kʼusi tspas Dios ta stojolal krixchanoetik ta jelavele. (Kʼelo Filipenses 1:9.)

Sventa xakolta yoʼ skʼanik Dios li avalab anichʼnabe, baʼyel me skʼan xavakʼ ta ilel ti akʼanoj li Diose. Kʼalal chakʼik venta ti jech chapase, jech me tspasik ek. (Kʼelo Deuteronomio 6:5-7; Proverbios 22:6.)

¿Kʼuxi xuʼ xkʼot ta yoʼontonik li avalab anichʼnabe?

Li Skʼop Diose oy stsatsal (Hebreos 4:12). Jaʼ yuʼun, akʼbo xchan li kʼusitik mas tsotsik skʼoplale. Jun skʼelobile jaʼ li Jesuse, sventa xkʼot ta yoʼontonik mantal li yajtsʼaklomtake, li stuke la stunes sjakʼobiltak, lek la xchikinta xchiʼuk laj yalbe smelolal li Skʼop Diose. Jaʼ jech ek, sventa xkʼot ta yoʼontonik mantal li avalab anichʼnabe xuʼ me jech xapas kʼuchaʼal la spas li Jesuse. (Kʼelo Lucas 24:15-19, 27, 32.)

Jech xtok, ti kʼu yelan laj yil Dios li krixchanoetik ti te chal ta Vivliae, jaʼ xuʼ xkoltaatik-o sventa xojtikinik xchiʼuk skʼanik Dios li ololetike. Li kʼusitik xuʼ skoltaot sventa xachanubtas li avalab anichʼnabike, xuʼ xayales ta www.jw.org/tzo. (Kʼelo 2 Timoteo 3:16.)

Mi chakʼanbe to mas yaʼyejale kʼelo li kapitulo 14 ta livro liʼe, ¿Kʼusi chchanubtasvan ta melel li Vivliae? ti pasbil yuʼun stestigotak Jeovae

Xuʼ xayales ta moton ta www.jw.org/tzo o tsʼibajan batel yoʼ bu chichʼ alel ta pajina 2