Snaʼoj bu sbelel

LI Guy Hollis Pierce, ti jaʼ li ta Jtsop Jbeiltasvanej yuʼun Stestigotak Jeovae, tsuts yabtel ta stojolal Jeova ta Balumil ta martes 18 yuʼun marso ta 2014 kʼalal 79 xaʼox sjabilale. Ta skoj ti jaʼ yermano Cristoe laj yichʼ chaʼkuxesel sventa te xkuxi ta vinajel (Heb. 2:10-12; 1 Ped. 3:18).

Li Guy Pierce vokʼ ta Auburn (California, Estados Unidos) ta 6 yuʼun noviembre ta 1934 xchiʼuk laj yichʼ voʼ ta 1955. Li ta 1977 nupun xchiʼuk li skʼanbil ajnil ti Penny sbie, vaʼun koʼol la stsʼites yalab xnichʼnabik. Jech oxal jech tajek stalel kʼuchaʼal jun totil. Li ta 1982 ochik ta prekursor xchiʼuk li yajnile. Ta jelavel jutuke, li ta 1986, lik tunikuk ta jkʼelvanej ta sirkuito ta Estados Unidos, vaʼun tunik buluchib jabil.

Li ta 1997 laj yichʼ takel ta ikʼel sventa xtun ta Betel ta Estados Unidos, ti bu abtej ta Departamento sventa cholmantale. Li ta 1998 lik tunuk kʼuchaʼal ta yajkoltaobba Komite sventa Jtuneletik yuʼun Jtsop Jbeiltasvanej. Vaʼun, li ta 2 yuʼun oktuvre ta 1999, laj yichʼ alel ti laj yichʼ biiltasel li ta Jtsop Jbeiltasvanej li ermano Pierce li ta tsobajeletik tspasik jujun jabil li Watch Tower Bible and Tract Society of Pennsylvania. Achʼtik toe tun ta jeltos komiteetik: Komite sventa Jtuneletik, Komite sventa Stsʼibael vunetik, Komite sventa Vunetik xchiʼuk ta Komite yuʼun Jbabeetik.

Ta skoj ti stseʼet noʼox sat xchiʼuk ti lek noʼox xkʼopoje toj lek chaʼiik xchiʼinel ta loʼil li krixchanoetik ti jelel stalelal xkuxlejalike. Ti kʼanbil tajeke jaʼ ta skoj ti kʼanvaneme, ti bikʼit yakʼoj sbae, ti tstsak ta venta li mantaletike xchiʼuk li beiltaseletik yakʼoj Jeovae xchiʼuk ti spatoj yoʼonton ta melel ta stojolale. Ta snop noʼox li Guy Pierce xuʼ jaʼ mu xlokʼ talel li Kʼakʼale, pe jaʼuk li kʼusi yaloj tspas Jeovae persa chkʼot ta pasel, jaʼ yuʼun tskʼan ti snaʼikuk skotol li krixchanoetike.

Mi jsetʼuk bu chlub ta spasbel yabtel Jeova li ermano Pierce. Sob chlik xchiʼuk ep ta velta ti nax akʼobal ch-abteje. Xanav ta spʼejel Balumil sventa tspatbe yoʼonton ermanoetik, jech xtok xokob noʼox ta skʼelel li buchʼutik te ch-abtej ta Betele xchiʼuk jaʼ jech tspasbe li yantik ti chbat skʼanbeik koltael o tojobtasele, o kʼalal jaʼ noʼox ta saʼik sventa xchiʼinik ta loʼile. Ti lek snaʼ xchʼamvan, ti lek snaʼ xkʼopoj xchiʼuk ti lek snaʼ spat oʼontonal ta Vivliae mu xchʼay ta sjolik ti buchʼutik laj yojtikinike.

Ta melel, li yajnil xchiʼuk li vakvoʼ xnichʼnabtake, li smamobtake xchiʼuk li snamtal mome, jech kʼuchaʼal ti buchʼutik jaʼ stot laj yilike, ta snaʼik li ermano ti kʼanbil tajeke xchiʼuk ti jaʼ lekil amigoile. Li ta sabado ta 22 yuʼun marso ta 2014, li ermano Mark Sanderson, ti jaʼ yan li ta Jtsop Jbeiltasvaneje, la sjelubtas li mantal sventa buchʼu chchame, taje jelav ta Betel ta Brooklyn. Jtos ti kʼusi laj yal xtoke jaʼ li spatobil yoʼonton ermano Pierce ti chkuxi ta vinajele xchiʼuk la skʼel li kʼusi laj yal Jesús liʼe: «Te ta sna li Jtote, ep ta cʼol na te oy. [...] Me chibate, xchiʼuc me ichapaj cuʼun li avavilique, chisut tal yan velta; vuʼun jtuc chtal quicʼoxuc muyel, yuʼun jech xuʼ te chacʼotic ec ti bu oyune. Xanaʼic xa ti bu chibate; xanaʼic xa bu xbat li sbelale» (Juan 14:2-4).

Solel ta jnaʼtik li ermano Pierce. Pe xijmuyubaj ti snaʼoj bu sbelel li sna ti jaʼ sbatel osile.