Ch-akʼbat ep bendision yuʼun Jeova li buchʼu chakʼ kʼusitik oy yuʼune

LI Jpasvanej kuʼuntike stsakoj ta venta li krixchanoetike, yuʼun yakʼojbe jun matanal ti mu kʼusi xkoʼolaj-oe: jaʼ ti xuʼ snop stukik li kʼusi tspasike. Jech xtok, chakʼbe ep bendision li buchʼu lek tstunes li kʼusi akʼbil taje, ti tstunes sventa tspukbe batel skʼoplal li melel yichʼel ta mukʼe, ti chchʼultajesbe sbie xchiʼuk ti tskolta sba ta spasel li kʼusi tskʼan yoʼonton ti toj tsots skʼoplale. Li Jeovae mu skʼan ti jaʼ noʼox ta jchʼunbetik smantal ta skoj ti jech skʼan pasele o ta skoj noʼox ti ta jxiʼtatike. Moʼoj, yuʼun li stuke tskʼan ti jaʼuk stij koʼontontik xijtun ta stojolal ta skoj ti jkʼanojtik ta melele xchiʼuk ti ta jtojbetik tajek ta vokole.

Jech kʼuchaʼal liʼe, kʼalal jaʼo te oyik ta takixokol balumil ta Sinaí li j-israeletike, laj yal mantaletik Jeova sventa smeltsanik jpʼejuk na ti bu xuʼ x-ichʼat ta mukʼe. Xi albatike: «Tscʼan chavacʼbeic smoton li Mucʼul Diose. Scotol li bochʼotic chcʼot ta yoʼnton, ti yutsil yoʼnton chaqʼuique, acʼo yichʼ tal» (Éx. 35:5). Jaʼ chakʼik ti kʼu yepal xuʼ yuʼunik li jujun j-israeletike, jech xtok li jujutos matanal chlokʼ ta yoʼonton chakʼike —mu ventauk ti kʼusi o ti kʼu yepale— xuʼ jaʼ te xichʼ tunesel ta sventa li kʼusi tskʼan yoʼonton Diose. ¿Kʼu yelan laj yaʼiik taje?

Jech oxal laj yakʼik matanal «li bochʼotic lec icʼot ta yoʼntonique», «ta scotol yoʼntonic» laj yakʼik. Li viniketik xchiʼuk antsetike laj yichʼik tal matanaletik ta sventa li Jeovae: ‹netʼ joliletik, stakʼinal xchikinik, yixtolal skʼobik, kʼanal takʼin, sakil takʼin, kovre takʼin, yax-elan pokʼetik, ikʼikʼtik sba stsajal pokʼ, batsʼi tsoj, lekil lino no, jalbil tsotsil tentsun, nukulil chij bonbil ta tsoj, lekil nukuletik, akasia teʼ, alakʼik sba tonetik xchiʼuk jeltos aseite›. Vaʼun «batsʼi ep xa oy yuʼunic cʼusitic chtun ta sventa li abtele; ep xa la spas sobrail» (Éx. 35:21-24, 27-29; 36:7).

Pe li kʼusi mas lek laj yil Jeovae maʼuk ti kʼu yepal stojol li matanaletik laj yakʼike, moʼoj, jaʼ ti laj yakʼik li kʼusitik oy yuʼunik sventa skolta sbaik li ta melel yichʼel ta mukʼ Jeovae. Jech xtok, tijbat yoʼonton li jteklum ti akʼo xchʼak skʼakʼalik xchiʼuk ti x-abtejike. Xi chal li loʼil ta Vivliae: «Li antsetic ti lec bijique lic jalubajicuc». Xi to chale: «Li antsetic ti scotol yoʼnton tscʼan tspasic li abtele, ti lec snaʼ xnaojique, lic sjalic tsotsil tentsunetic». Maʼuk noʼox taje, yuʼun koltaat yuʼun Jeova li Bezalele, akʼbat spʼijil, koltaat sventa snaʼ lek snopel kʼusi tspas xchiʼuk akʼbat lek yojtikinobil xchiʼuk akʼbat spʼijil ta sventa skotol abtelal. Jaʼ jech, koltaatik yuʼun Dios li Bezalel xchiʼuk Aholiab sventa xtojobik ta spasel skotol li abtelal akʼbatike (Éx. 35:25, 26, 30-35).

Kʼalal laj yalbe j-israeletik li Jeova ti akʼo yakʼik matanaletike, snaʼoj ta melel ti ta onoʼox skolta sbaik ta sventa li melel yichʼel ta mukʼ Jeova li buchʼutik jech onoʼox «ta scotol yoʼntonic» chakʼike. Jech oxal laj yakʼbe ep bendision ta skoj ti laj yakʼik li kʼusitik oy yuʼunike, yuʼun beiltasatik xchiʼuk akʼbat akʼo xmuyubajik. Taje jaʼ chakʼ ta ilel ti chakʼbe bendision li yajtuneltak Jeova kʼalal chakʼ kʼusitik oy yuʼunike, chakʼbe skotol li kʼusi chtun yuʼunike xchiʼuk tstojobtas ta spasel kʼusitik yoʼ spasbeik li yabtele (Sal. 34:9). Jech oxal, ta me xakʼbutik bendision Jeova mi chkakʼ kʼusitik oy kuʼuntik kʼalal ta jpasbetik li kʼusi tskʼan yoʼontone.

EP KʼUTIK YELAN XUʼ XKOLTAVANIK JLOM KRIXCHANOETIK TA SVENTA LI ABTELAL TA SPʼEJEL BALUMILE

Jech kʼuchaʼal ta skʼakʼalil jtakbol Pabloe, li avie ep buchʼutik «[tsvokʼik] cʼuuc yepal» stakʼinik sventa tstikʼik ta kaxa ta tsobobbail ti bu xi chale: «Abtelal ta spʼejel Balumil» (1 Cor. 16:2). Li takʼin tstsob li tsobobbailetike tstakik batel jujun u ta Betel yuʼun stestigotak Jeova ti jaʼ chkʼelbat yabtelik ta cholmantal li ta slumalike. Li matanal takʼine xuʼ te xichʼ takel batel ta sbi ti kʼu yelan ojtikinbil ta stojolal ajvalil ti tstunes li stestigotak Jeovae. Mi chakʼan chanaʼ lek bu jotukal xkome, kʼopojan batel ta Betel ti jaʼ sventainoj li atsobobbail ti bu alumale. Sventa xanaʼe, xuʼ xasaʼ ta Internet ta www.jw.org/tzo. Li kʼusitik chkalbetik skʼoplal liʼe chal ti kʼu yelan xuʼ xatak batel li matanal takʼine:

DONACIONES INCONDICIONALES

Xuʼ xichʼ akʼel takʼin ti jaʼ noʼox chichʼ jelubtasel ta Internete, ta tarjeta de débito o ta tarjeta de crédito. Junantik Beteletike jaʼ tstunesik li jw.org o yan pajinaetik ta Internet ti jaʼ oy ta sba xchʼamele.
Xuʼ xavakʼ matanal takʼin, natsʼiletik o yan kʼusitik avuʼun ti toyol stojole. Skʼan me xichʼ alel batel ta jlik karta ti jaʼ donación incondicional li takʼin xchiʼuk li yan kʼusitik laj yichʼ akʼele.

DONACIONES CONDICIONALES

Taje jaʼ smelolal ti xuʼ xichʼ akʼel takʼin ti xuʼ skʼan sutel mi chtun yuʼun li yajvale.
Mi jech chichʼ akʼele skʼan me xichʼ alel batel ta jlik karta ti jaʼ donación condicional.

DONACIONES PLANIFICADAS

Maʼuk noʼox xuʼ chkakʼ li kuni takʼintik xchiʼuk yan kʼusitik ti oy sbalile, chkalbetik batel skʼoplal ti oy to kʼuxi xuʼ jkolta jbatik ta spasel li abtelal ta spʼejel Balumil ta sventa li Ajvalilal yuʼun Diose. Mi chakʼan chatunes jtosuke, baʼyel kʼopojan batel ta Betel ti jaʼ sventainoj li alumal bu nakalote, sventa xanaʼ bu jotukal chichʼ akʼel. Ta skoj ti jelajtik li mantaletik yuʼun ajvalile xchiʼuk ti jelajtik ta sventa li patane, skʼan me xasaʼ koltael ta stojolal li buchʼu chanunajem lek ta sventa li mantaletik xchiʼuk li patanetik yuʼun ajvalile, sventa jaʼ xatunes ti bu mas lek chavaʼie.

Seguros. Xuʼ jaʼ xkom ta sbi ti kʼu yelan ojtikinbil ta stojolal ajvalil ti tstunes stestigotak Jeova ta sventa li seguro de vida chij-akʼbate o li koltael chkichʼtik kʼalal mi la jpastik juvilare.

Cuentas bancarias. Li certificado de depósito, cuentas bancarias xchiʼuk cuentas personales de jubilación, xuʼ xichʼ akʼel ta fideicomiso ti ojtikinbil ta stojolal ajvalil ti tstunes stestigotak Jeovae, o mi moʼoje, jaʼ akʼo xichʼ li jtakʼintik kʼalal mi lijchame, jaʼ ti kʼu yelan li mantaletik ta vanko ti bu jlumaltike.

Acciones xchiʼuk bonos. Xuʼ xichʼ akʼbel ta sbi ti kʼu yelan ojtikinbil ta stojolal ajvalil ti tstunes stestigotak Jeova ti muʼyuk chichʼ kʼanel sutele. Jech xtok, xuʼ xkom kʼuchaʼal beneficiario mi oy buchʼu chame.

Inmuebles. Xuʼ xichʼ akʼel osil o na ti stakʼ chonele, xuʼ xichʼ akʼel ta donación incondicional, o mi oy to buchʼu te nakale, jaʼ to yuʼun li dominio vitalicio ta sventa li yosil o sna ti buchʼu laj yakʼe, jaʼ xkaltik, ti xuʼ to te xnaki ti kʼu sjalil kuxule.

Testamentos xchiʼuk fideicomisos. Xuʼ xkakʼbe kosiltik, jnatik o jtakʼintik ta sbi ti kʼu yelan ojtikinbil ta stojolal ajvalil ti tstunes stestigotak Jeova mi bat jpasbetik lek svunal o stestamentoal ta jun notario o ti ta xkaltik ti jaʼ tstabe sbalil li ta fideicomiso la jpastike.

Jech kʼuchaʼal li «donaciones planificadas» xie, jaʼ skʼan xal ti skʼan xchapanbe lek skʼoplal li buchʼu chakʼ matanale. Koliyal ti oy ep kʼutik yelan xuʼ xakʼik li matanal takʼine, ep krixchanoetik skoltaoj sbaik li ta abtelal sventa relijion xchiʼuk ta sventa li skoltael krixchanoetik ti yakal ta jpastik ta spʼejel Balumile.

Mi chakʼan to chanabe mas skʼoplale, kʼopojan batel ta Betel ti sventainoj alumale.