¿MI ANAʼOJ XA?
¿Kʼusi skʼan xal kʼalal kapon xi li ta Vivliae?
Slokʼol jun kapon ta asiria
Bateltik li jpʼel kʼop kapon o eunuko xie, jaʼ skʼoplal jun vinik ti lokʼbil o tʼusbil sbekʼ skʼunile. Li ta skʼakʼalil Vivliae jech toʼox tspasbeik jlom viniketik ti chakʼbeik stojobil smulik o ta skoj ti tsakbilik batel ta yajkontraike o sventa tspasatik ta mosoil. Kʼalal lek ilbil li kaponetike chakʼbeik xchabi snailal bu oyik li yan yajniltak ajvalile. Jech kʼuchaʼal li chaʼvoʼ viniketik ti Hegai xchiʼuk Saasgaz sbiike, chchabibeik yajniltak xchiʼuk stsʼakal ajniltak li ajvalil Asueroe, ti oy ep buchʼutik chalik ti jaʼ la li Jerjes I (Ester 2:3, 14).
Li kapon chalbe skʼoplal Vivliae mu me skotolik lokʼbil o tʼusbil sbekʼ skʼunilik. Jlom buchʼutik xchanojbeik skʼoplale chalik ti jech sbiik xtok li viniketik ti tsots yabtelik li ta spasob mantal ajvalile. Jaʼ jech skʼoplal yaʼeluk li jun yamigo Jeremías ti Ébed-mélec sbie xchiʼuk li jun j-abtel ta Etiopía ti cholbat mantal yuʼun Felipee. Ta skoj ti xuʼ tukʼ chbat skʼel ajvalil Sedequías li Ébed-meleque xuʼ van toj tsots toʼox yabtel staoj (Jeremías 38:7, 8). Li j-etiopía vinik eke, ti bat yichʼ ta mukʼ Dios ta Jerusalene, chchabibe toʼox skʼulejal jun meʼ ajvalil (Hechos 8:27).
¿Kʼu yuʼun chchʼak xchijik ta stojolal tentsunetik li jchabichijetik ta skʼakʼalil Vivliae?
Xi laj yal Jesús kʼalal jaʼo yakal chalbe skʼoplal jun chapanel ti chkʼot ta pasel ta jelavele: «Cʼalal chital jchiʼuc jxojobal, vuʼun ti Xnichʼon cristiano licʼote [...]. Ta xlic jvocʼan jech chac cʼu chaʼal jchabichij ti slecoj ta xacʼ li xchije xchiʼuc li stentsune» (Mateo 25:31, 32). Kʼalal jech laj yal li Jesús taje, jaʼ la sta ta alel li kʼusitik nopem xaʼiik pasel li jkʼelchijetik li vaʼ kʼakʼale, yuʼun ta xchʼak li xchijik ta stojolal li tentsunetike. ¿Kʼu yuʼun ti jech tspasike?
Kʼalal jaʼo ta kʼakʼaltike jutuk mu skotoluk velta jmoj oyik li chijetik xchiʼuk li tentsunetike. Pe li ta akʼobaltike chichʼik tikʼel ta skoralik sventa mu xlajik ta jtiʼaval chonbolom, ta sik xchiʼuk ta j-elekʼetik (Génesis 30:32, 33; 31:38-40). Li jchabichijetike slekoj tslap li xchijike, yuʼun mas toj simaron li tentsunetike, pe jaʼ mas chʼakal tslapik li uni meʼ chij xchiʼuk li yuni oltake. Jech xtok ta xchʼak xchijik sventa «chkuchomajik, tspitsʼbeik yaʼlel xchuʼ xchiʼuk kʼalal tslokʼbeik stsotsile», xi chal li livro All Things in the Bible (Skotol li kʼusitik ta Vivliae). Li lokʼolkʼop la stunes Jesús taje, jaʼ li kʼusi xojtikinik xchiʼuk nopem xaʼiik spasel li judioetik ti te chchikintaik li kʼusi chale, jutuk mu skotolikuk ta osiltik nakalik.