¿Mi jaʼ van skʼan jkʼopontik ta orasion li Jesuse?
L Eʼ XA ta jayibuk sjabilale, laj yichʼik jakʼbel yaʼyejik mas ta vaxakib sien kerem tsebetik ti jelel srelijionike. ¿Kʼusi jakʼbatik? Jaʼ mi xchʼunojik ti ch-aʼibat s-orasionik yuʼun li Jesuse. Mas ta oʼlol laj yal ti xchʼunojik ti ch-aʼibat li s-orasionike, pe oy june la stupʼ li bu chal Jesuse, la sjel ta «Dios».
Li voʼote ¿buchʼu chanop ti skʼan jkʼopontik ta orasione? ¿Mi jaʼ van li Diose o mi jaʼ li Jesuse?a Sventa jnaʼtike, jkʼeltik kʼusi laj yalbe Jesús li yajtsʼaklomtake.
LI JESUSE LAJ YAL BUCHʼU SKʼAN JKʼOPONTIK
Li Jesuse maʼuk noʼox laj yal ti skʼan jkʼopontik li Diose, yuʼun jech la spas li stuk eke.
Li Jesuse jaʼ la skʼopon li Stote, jech skʼan jpastik ek
LI KʼUSI LAJ YAKʼ TA CHANELE: Oy jun velta ti xi albat yuʼun jun yajtsʼaklom li Jesuse: «Cajval, chanubtasuncutic ta scʼopanel Dios». Vaʼun xi la stakʼ li Jesuse: «Cʼalal chacʼopanic Diose, jech xavalic: ‹Jtotic Dios›» (Lucas 11:1, 2). Ta tsʼakale, laj yal mantal ti skʼan jpastik orasion kʼalal jaʼo laj yal li Mantaletik ta Vitse. Xi laj yale: «Cʼopanic li Jtotic Diose». Pe xi to laj yal xtoke: «Li Jtotique snaʼoj xa onoʼox cʼusitic chtun avuʼunic ti cʼalal muʼyuc toʼox chacʼanbeique» (Mateo 6:6, 8). Kʼalal jun xaʼox akʼobal skʼan xchame, xi laj yalbe ta jamal li yajtsʼaklomtake: «Scotol cʼusi chacʼanbeic ta jbi li Totile chayacʼboxuc» (Juan 16:23). Lek xvinaj ti ep ta velta chanubtasvan ti jaʼ skʼan jkʼopontik li Stote, ti jaʼ jtotik eke, jaʼ xkaltik li Jeovae (Juan 20:17).
LI KʼUSI LA SPASE: Xi la skʼopon Dios li Jesús eke: «Tati, voʼot Yajvalot li vinajel banamile» (Lucas 10:21). Ta yan velta xtoke «la stoy muyel sat ta toyol [li Jesuse], jech laj yal: ‹Tati, colaval ti chavaʼibun jcʼope›» (Juan 11:41). Jech xtok, xi laj yal kʼalal jutuk xaʼox skʼan xchame: «Tati, chcacʼ ta acʼob li jchʼulele» (Lucas 23:46). Taje jaʼ svinajeb laj yakʼbutik komel ti kʼu yelan ta pasel li orasione: ti skʼan jaʼ ta jkʼopontik li Jeovae, li Yajval «vinajel banamile» (Mateo 11:25; 26:41, 42; 1 Juan 2:6). Ti vaʼ yelan taje jaʼ jech la spasik ek li yajtsʼaklomtak Cristo ta baʼyel sigloe.
¿BUCHʼU LA SKʼOPONIK LI BAʼYEL YAJTSʼAKLOMTAK CRISTOE?
Kʼalal oy toʼox sjayibal xemana sbatel ta vinajel li Jesuse, yakal xaʼox chichʼik ilbajinel yuʼun j-abteletik li yajtsʼaklomtake (Hechos 4:18). Ta skoj taje la skʼanik koltael ta orasion. ¿Pe buchʼu la skʼoponik un? «Jmoj yoʼntonic la scʼopanic Dios» ta sbi Jesús sventa x-akʼbat stsatsalik (Hechos 4:24, 30). Kʼuchaʼal chkiltike, la spasik li kʼusi laj yal Jesuse: jaʼ la skʼoponik li Diose.
Te van jayibuk jabil mas tsʼakale, xi la stsʼiba li jtakbol Pabloe: «Cʼalal ta jtacutic ta cʼoponel Dios ta aventaique, colaval, xcutcutic onoʼox ti Diose, [li] Stot ti Cajvaltic Jesucristoe» (Colosenses 1:3). Xi laj yalbe ek li xchiʼiltak ta chʼunolajele: «Scotol li cʼusiuc noʼox chcʼot ta atojolique tojbeic ta vocol Jtotic Dios scotol ora ta sventa li Cajvaltic Jesucristoe» (Efesios 5:20). Ta yan velta xtoke laj yalanbe ti jaʼuk skʼoponik «Jtotic Dios» ta sbi li Jesuse (Colosenses 3:17).
Jech kʼuchaʼal la spasik li baʼyel yajtsʼaklomtake, skʼan jchʼuntik li mantal laj yakʼ Jesús ta sventa ti kʼu yelan skʼan jpastik orasione, yuʼun jaʼ jech chkakʼtik ta ilel ti jkʼanojtike (Juan 14:15). Xi laj yal jun jtsʼibajom ta Vivliae: «Lec jcʼanoj li Mucʼul Diose, yuʼun la stucʼulanbun li jcʼope; laj yaʼibun ti xivocolet ta stojole. La stsʼeʼan lec xchiquin ti cʼalal la jcʼopane, jaʼ yuʼun ti jayib cʼacʼal cuxulune jaʼ ta jcʼanbe o vocol ta stojol» (Salmo 116:1, 2). Xuʼ jech xkaltik ek mi jaʼ noʼox stuk la jkʼopontik li Jeovae.b
a Li Vivliae chal ti mu xkoʼolaj xchiʼuk Dios li Jesuse. Mi chakʼanbe to mas yaʼyejale kʼelo ta kapitulo 4 li ta livro ¿Kʼusi chchanubtasvan ta melel li Vivliae?, ti pasbil yuʼun stestigotak Jeovae.
b Jech xtok, sventa xaʼi j-orasiontik li Diose, skʼan jchʼunbetik li smantaltake. Mi chakʼanbe to mas yaʼyejale kʼelo li kapitulo 17 li ta livro ¿Kʼusi chchanubtasvan ta melel li Vivliae?