Li Vivliae tstakʼ li sjakʼobiltak liʼe

¿Mi oy jech ajakʼojbe aba taje? Mi oye, mu me atukuk. Oy epal krixchanoetik ta spʼejel Balumil ti jech tsjakʼbe sbaike. ¿Mi xuʼ van jtabetik stakʼobil?

Ta smiyonal noʼox krixchanoetik chalik ti xuʼ jtabetike. ¿Kʼu yuʼun? Yuʼun staojbeik xa stakʼobil ta Vivlia ti stakʼ chʼunele. ¿Mi chakʼan chanaʼ li kʼusi chal Vivliae? Mi jeche, xuʼ van oy ta avoʼonton chachʼam junuk matanal chanubtasel ta Vivlia ti chakʼ li stestigotak Jeovae.a

Oy epal krixchanoetik ti chiʼik jutuk ta xchanel li Vivliae. Oy junantike chalik ti muʼyuk la xokolike, ti toj tsots la ta aʼibel smelolale o mu skʼan xakʼ yeik ta xchanel. Pe oy jlom ti xchʼamojik li chanubtasel ta Vivliae. Jkʼeltik batel li kʼusitik yalojike:

• «Li-ay toʼox ta relijion katoliko xchiʼuk ta protestante, ta jun relijion ti sij sbie, ta jun konvento sventa budista xchiʼuk la jchan Teología li ta universidade. Akʼo mi jech, jlom noʼox la jtabe stakʼobil li kʼusi ta jkʼan ta jnaʼe. Vaʼun kʼot svulaʼanun ta jna jun stestigo Jeova. Toj labal sba laj kil ti ta Vivlia tstakʼbun li kʼusi ta jkʼan ta jnaʼe, jaʼ yuʼun kʼalal laj yalbun mi ta jkʼan chanubtasel ta Vivliae, laj kalbe ti tanae.» (Gill, likem ta Inglaterra.)

• «Solel ep toʼox kʼusitik ta jakʼbe jba ta jkuxlejal, pe li kʼusitik chalbun li jpastor ta jrelijione muʼyuk bu la skoltaun. Pe oy jun stestigo Jeova ti ta Vivlia la stakʼbun li kʼusitik ta jakʼbe jbae. Kʼalal laj yalbun mi ta jkʼan ta jchanbe mas skʼoplale, laj kalbe ti tanae.» (Koffi, likem ta Benín.)

• «Ta jkʼan toʼox ta jnaʼ kʼusi chkʼot ta pasel ta stojolal li animaetike. Jchʼunoj toʼox ti xuʼ oy kʼusi chopol tspasbune, jech xtok ta jakʼbe jba kʼusi chal Vivlia ta sventa taje. Jaʼ yuʼun lik jchan Vivlia xchiʼuk jun kamigo ti jaʼ stestigo Jeovae.» (José, likem ta Brasil.)

• «Lik jkʼel li Vivliae, pe mu xkaʼibe jsetʼuk smelolal. Jun kʼakʼal li stestigotak Jeovae ay svulaʼanikun ta jna xchiʼuk laj yalbeikun lek smelolal jayibuk tekstoetik. Taje jaʼ la stijbun koʼonton sventa jchan batel mas.» (Dennize, likem ta México.)

• «Ta jakʼbe toʼox jba mi oyun ta yoʼonton ta melel li Diose. La jpas orasion ta stojolal li Buchʼu yakʼoj li Vivliae. Li ta yokʼomale, li stestigotak Jeovae ay svulaʼanikun ta jna xchiʼuk laj yalbeikun mi ta jkʼan chanubtasel ta Vivlia, vaʼun la jchʼam.» (Anju, likem ta Nepal.)

Li kʼusitik laj yalik taje jaʼ tsvules ta joltik li kʼusi laj yal Jesuse: «Xmuyubajik noʼox li buchʼutik oy ta sjol yoʼontonik ti chtun yuʼunik mantale» (Mateo 5:3). Jkotoltik oy ta koʼontontik ti xijmuyubajuk noʼoxe, pe jaʼ noʼox Dios xuʼ xakʼ muyubajkutik xchiʼuk xi sbeiltasutik. ¿Kʼuxi tspas? Jaʼ li ta Skʼope, li Vivliae.

¿Kʼuxi xuʼ xanaʼ li kʼusi chal Vivliae? ¿Kʼuxi tskoltaot ta akuxlejal mi laj avojtikin li kʼusi chale? Jkʼeltik batel.