KʼUSITIK CHICHʼ JAKʼEL TA SVENTA VIVLIA

¿Kʼusi jaʼ li Skʼakʼalil Chapanele?

Li ta voʼnee, li Diose la svaʼan jchapanvanejetik sventa tspoj li slumal kʼalal laj yichʼik ilbajinele (Jueces 2:18). Li Skʼakʼalil Chapanel chalbe skʼoplal Vivlia ti chtal ta jelavele jaʼ yorail muyubajel, yuʼun li Jeovae, li Jchapanvanej ta spʼejel Balumile, tspoj lokʼel li krixchanoetik ti chichʼik ilbajinele. (Kʼelo Salmo 96:12, 13; Isaías 26:9.)

Li Jeova jaʼ tstunes Jesus sventa xkʼot ta pasel taje, yuʼun jaʼ svaʼanoj sventa chchapan li buchʼutik kuxulik xchiʼuk li buchʼutik chamemike (Echos 10:42; 17:31). Kʼalal jaʼo li Skʼakʼalil Chapanele, li Jesuse ta xchaʼkuxes li buchʼutik muʼyuk laj yojtikinik li melel Dios sventa xuʼ xojtikinik xchiʼuk xlik skʼanike. (Kʼelo Echos 24:15.)

¿Kʼu sjalil chjalij li Skʼakʼalil Chapanele?

Li Vivliae chal ti chjalij jmil jabile. Li kʼu sjalil taje, jaʼo chichʼik chaʼkuxesel li buchʼutik chamemik sventa xojtikinik xchiʼuk xchanik xchʼunbel smantal Dios (Apokalipsis 20:4, 12). Ep buchʼutik xchʼunojik ti jaʼ chichʼ chapanel li kʼusi la spas jun krixchano kʼalal skʼan toʼox xchame. Pe li Vivliae chakʼ iluk ti jaʼ chichʼ chapanel li kʼusi tspasik kʼalal mi chaʼkuxiemik xaʼoxe. (Kʼelo Romanos 6:7.)

Li Vivliae chalbe skʼoplal xtok jun skʼakʼalil chapanel kʼalal skʼan toʼox jutuk xlik li jmil jabile. Li skʼakʼalil chapanel taje ojtikinbil xtok kʼuchaʼal li slajeb kʼusitike, jech kʼuchaʼal laj xa kiltik tal li ta mantal ta slikebaltik pajina li ta revista liʼe. Li vaʼ kʼakʼal taje, li Diose jaʼo tslajes li chopol krixchanoetike (2 Pedro 3:7). Jaʼ yuʼun, skʼan xkakʼtik iluk ti jkʼanojtik ta melel li Diose. (Kʼelo 2 Pedro 3:9, 13.)