Mu xavul tajek avoʼonton

BEILTASEL TA VIVLIA: «Mu xa xavul avoʼontonik» (Mateo 6:​25).

¿Kʼusi skʼan xal? Li Jesuse jaʼ jech laj yal li ta Mantaletik ta Vitse. Jech kʼuchaʼal chal jlik diksionario sventa Vivliae, kʼalal chichʼ jelubtasel li verbo ‹vul oʼonton› ta griego kʼope, jaʼ skʼan xal ti «kʼu yelan chaʼi sba li jun krixchano kʼalal oy svokol ta skoj li povreale, li viʼnal xchiʼuk yan kʼusitik tsnuptan ta xkuxlejale». Ep ta veltae, jaʼ ta jvul-o koʼontontik li kʼusi xuʼ xkʼot ta pasel ta tsʼakale. Stalel onoʼox ti ta jvul-o koʼontontik ta sventa li kʼusitik chtun kuʼuntike xchiʼuk ti lekuk noʼox oyik li krixchanoetik ti ­jkʼanojtike (Filipenses 2:​20). Pe kʼalal xi laj yal li Jesuse: «Mu me xavul avoʼontonik» xie, jaʼ la skʼan laj yal ti mu me toj echʼemuk jvul koʼontontik ta skoj ti chijxiʼutik tajek ta sventa li kʼusi xuʼ xkʼot ta pasel ta tsʼakale, ti jaʼ xa mu xakʼ xijmuyubaj-o li ta jkuxlejaltike (Mateo 6:​31, 34).

¿Mi chtun kuʼuntik li tojobtasel taje? Toj pʼij li kʼusi laj yal Jesuse. Junantik livroetik ti chalbe lek skʼoplal taje, chal ti kʼalal mu stsal yuʼun vul oʼontonal li jun krixchanoe, li sistema nervioso simpático sbie, ta anil tajek ch-abtej. Jech xtok, ta xal ti kʼalal jech oye, «te nitil talel skʼoplal chameletik, jech kʼuchaʼal úlcera, chamel ta koʼontontik xchiʼuk asma».

Li Jesuse laj yalbe lek srasonal ti kʼu yuʼun skʼan mu jvul tajek koʼontontike: ti yuʼun mu kʼusi xtun-oe. Xi laj yale: «¿Buchʼu junukal avuʼunik ti xuʼ snatubtas jlikeluk xkuxlejal ta skoj ti chavul avoʼontonike?» (Mateo 6:​27). Mi oy kʼusi ta jvul-o tajek koʼontontike, maʼuk chakʼ ti xlekub batel jkuxlejaltik o ti tsnatubtas jkuxlejaltike. Jech noxtok, li kʼusitik ta jpastike mu skotoluk velta chopol chlokʼ jech kʼuchaʼal ta jnoptike. Xi laj yal jun vinik ti lek chanem ta sventa taje: «Mi la jvul koʼontontik ta skoj li kʼusi chkʼot ta pasel ta tsʼakale, jaʼ noʼox ta jchʼaytik-o kʼakʼal, yuʼun jutuk mu skotoluk velta mu toj chopoluk kʼuchaʼal ta jnoptike».

¿Kʼusi xuʼ jpastik sventa mu jvul tajek koʼontontik? Baʼyele, jaʼ ti jpat koʼontontik ta stojolal Diose. Mi tsmakʼlintas mutetik xchiʼuk alakʼ sbaik tajek yuʼun nichimetik li Diose, ¿mi mu tauk xchabi xanaʼ li buchʼutik chichʼik ta mukʼe? (Mateo 6:​25, 26, 28-​30). Jech xtok, mu xanop mas li kʼusi xuʼ chkʼot ta pasel ta tsʼakale, jaʼ noʼox xanop ta sventa li jun kʼakʼale. Xi laj yal li Jesuse: «Mu me xavul avoʼontonik ta sventa li yokʼomale, yuʼun oy kʼusi chakʼ vul-oʼonton xtok li ta yokʼomale». Yuʼun skotol kʼakʼal jelel li jvokoltike (Mateo 6:​34).

Mi ta jchʼuntik li tojobtasel laj yakʼ Jesuse, muʼyuk me mas chij-ipaj xchiʼuk jun noʼox koʼontontik, ta skoj ti chakʼ «li jun oʼontonal yuʼun [Diose]» (Filipenses 4:​6, 7).