Toj tsots skʼoplal ti xakʼel lek mi melel li kʼusi achʼunoje

JUN li ta oxvoʼ krixchanoetik ta spʼejel Balumile chalik ti tstsʼakliik Kristoe, jaʼ xkaltik, mas ta chaʼmil miyon krixchanoetik. ¿Mi yajtsʼaklomot Kristo ek? Li avie ta smilal xa noʼox relijionetik ti chalik ti tstsʼakliik Kristoe, pe jelajtik ta jyalel li kʼusi chakʼik ta chanele xchiʼuk mu xkoʼolaj li kʼusi tsnopike. Yikʼaluk van mi jaʼuk xkoʼolaj ta jyalel li kʼusi achʼunoj xchiʼuk li kʼusi xchʼunoj yan krixchanoetik ti tstsʼakliik Kristo eke. ¿Mi toj tsots van skʼoplal li kʼusi achʼunoje? Mi oy ta avoʼonton ti jechuk xatsʼakli Kristo kʼuchaʼal chal li Vivliae, toj tsots me skʼoplal ti xakʼel lek li kʼusi achʼunoje.

Li buchʼutik baʼyel la stsʼakliik li Jesukristoe, yajtsʼaklomtak Kristo la sbiinik (Echos 11:26). Ta skoj ti jaʼ noʼox tstsʼakliik Kristo li vaʼ kʼakʼale, mu persauk oy yan sbiik sventa x-ojtikinatik. Jmoj la xchʼunbeik smantaltak xchiʼuk kʼusi laj yakʼ ta chanel li Jesuse, ti jaʼ li buchʼu laj yakʼbe slikeb li stsobobbail yajtsʼaklomtak Kristoe. Li relijion bu chakʼote, ¿mi jaʼ chakʼ ta chanel li kʼusi laj yakʼ ta chanel li Jesuse xchiʼuk li kʼusi xchʼunojik li baʼyel yajtsʼaklomtake? ¿Kʼusi skʼan xapas sventa xanaʼ mi melel li kʼusi achʼunoje? Oy kʼusi xuʼ xapas, jaʼ ti xakʼel lek mi jaʼ jech chchanubtasvan ta arelijion kʼuchaʼal chal li Vivliae.

Toj lek laj yichʼ ta mukʼ Chʼul Tsʼibetik li Jesuse, yuʼun jaʼ Skʼop Dios laj yil. Jech oxal muʼyuk lek laj yil li buchʼutik muʼyuk xa mas tstsakik ta mukʼ li chanubtaseletik ta Vivliae, ti jaʼ xa mas tsots skʼoplal chaʼiik li kʼusitik jecheʼ nopem xaʼiik spasele (Markos 7:9-13). Li melel yajchankʼoptak Jesuse ta Vivlia tslokʼesik skotol li kʼusitik xchʼunojike. Jaʼ yuʼun xi me skʼan sjakʼbe sba li buchʼu tskʼan tstsʼakli Kristoe: «¿Mi jaʼ jech chchanubtasvan jrelijion ti kʼuchaʼal chal li Vivliae?». Sventa xatakʼ taje, ¿kʼu yuʼun mu xakʼel lek li kʼusi chakʼik ta chanel li ta arelijione xchiʼuk li kʼusi chakʼ ta chanel Vivliae?

Li Jesuse laj yal ti skʼan xkichʼtik ta mukʼ Dios ‹jech kʼuchaʼal tskʼan li kʼusi melele›, ti jaʼ te ta jtatik ta Vivliae (Juan 4:24; 17:17). Jech xtok, li jtakbol Pabloe laj yal ti jaʼ tsta-o skolelik krixchanoetik mi laj «yojtikinik lek li kʼusi melele» (1 Timoteo 2:4). Jaʼ yuʼun, mi ta jkʼan kuxul xijkome skʼan me jkʼeltik mi jech chal ta melel Vivlia skotol li kʼusi jchʼunojtike.

KʼUXI XUʼ JNAʼTIK MI JECH CHAL VIVLIA LI KʼUSI JCHʼUNOJTIKE

Ta jtijkutik avoʼonton ti xanopbe skʼoplal li vakib sjakʼobil ta rekuadroe xchiʼuk li kʼusi chal Vivlia ta sventa taje. Kʼelo li tekstoetik tee xchiʼuk nopbo lek skʼoplal li stakʼobiltake. Mi laje xi xajakʼbe abae: «¿Mi jech chakʼ ta chanel jrelijion kʼuchaʼal chal li Vivliae?».

Vaʼun mi la achanbe skʼoplal taje jaʼ me tskoltaot sventa xakʼel lek mi melel li kʼusi achʼunoje. ¿Mi chakʼan chakʼel mas kʼusi chal Vivlia ta sventa li kʼusi chakʼik ta chanel li ta arelijione? Li buchʼu xuʼ skoltaot sventa xavaʼibe smelolal li kʼusi chakʼ ta chanel li Vivliae, jaʼik li stestigotak Jeovae. ¿Kʼu yuʼun mu xavalbe ti xchanubtasikot ta Vivliae? Yuʼun chakʼik chanubtasel ta moton. O mi moʼoje, ochan ta jpajinakutik ta jw.org.