¿Mi anaʼoj xa?

¿Kʼu yuʼun ti «j-elekʼetik» laj yichʼ albel skʼoplalik li buchʼutik chchonik chonbolometik ta templo ta Jerusalene?

XI CHAL li Evanjelio yuʼun Mateoe: «Och batel ta templo li Jesuse, la snuts lokʼel skotol li buchʼutik te chchonolajik xchiʼuk chmanolajik ta temploe, la svalkʼunbe xmexaik li jeltakʼinetike xchiʼuk la svalkʼunbe svankaik li buchʼutik chchonik palomae. Xchiʼuk xi laj yalanbee: ‹Xi tsʼibabile: «Spasobil orasion chichʼ albel li jnae», pe li voʼoxuke apasojik xa ta xchʼen j-elekʼetik›» (Mat. 21:12, 13).

Li buchʼutik chchonolajik ta temploe toj echʼ xa noʼox toyol tskʼanbeik stojol li chonbolometike. Ta voʼnee, li palomaetike toj yalel toʼox stojol, jaʼ yuʼun x-akʼ yuʼunik ta milbil matanal li buchʼutik povreike. Pe oy junantik voʼneal tsʼibetik yuʼun judaetik chalik ti ta sjabilaltik 50 li ta jkʼakʼaltike, li jun krixchanoe skʼan la x-abtej 25 kʼakʼal sventa xman yuʼun chaʼkot paloma ta skoj ti toj toyole. Ta skoj ti toy tajeke, mu xa xman yuʼunik li buchʼutik povreike (Lev. 1:14; 5:7; 12:6-8). Li jchanubtasvanej Simeón ben Gamaliele ilin ta skoj ti toj echʼ xa noʼox toy stojol li chonbolometike, jaʼ yuʼun laj yal mantal ti jutuk xa noʼox xakʼik milbil matanaletik li judaetike. Vaʼun ta anil noʼox yal stojol li chonbolometike, jaʼ yuʼun, oxib xa noʼox ora skʼan x-abtej jun krixchano sventa sman li chaʼkot palomae.

Jech kʼuchaʼal laj xa kiltike, oy lek srasonal ti laj yal Jesus ti jaʼik «j-elekʼetik» li jchonolajeletik ta temploe, yuʼun ta smanyailik tslokʼesbeik stakʼin li yantike xchiʼuk chpichʼ yoʼontonik li ta takʼine.