Ta xichʼ pukel li lekil achʼ kʼope
1. ¿Kʼuxi xuʼ jnatik ti muʼyuk buchʼu xuʼ spajes li chol mantale?
1 Ta melel muʼyuk buchʼu xuʼ spajes li kʼusi snopoj tspas Jeovae (Isa. 14:24). Li jchapanvanej Gedeón xchiʼuk li oxib sien sviniktake, yileluke mu stsal yuʼunik li 135 mil soltaroetik ta Madiane. Manchuk mi jech xi albat yuʼun li Jeovae: «Bat coltao loqʼuel ta scʼob madianetic li achiʼiltac ta israelale. Vuʼun jtuc chajtacot batel» (Jue. 6:14). ¿Kʼusi abtelal tskʼan Jeova ti akʼo jpastik li avie? Xi laj yal li Jesuse: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil» (Mat. 24:14). ¡Muʼyuk buchʼu xuʼ spajes sventa mu xkʼot ta pasel li abtelal taje!
2. ¿Kʼu yuʼun xuʼ jchʼuntik ti tskoltautik ta jujuntal ta chol mantal li Jeovae?
2 Li Jeovae chi skoltautik ta jujuntal. Lek jnaʼojtik ti tskolta Jeova ta skotolal li yajRextikotake, pe, ¿mi xuʼ jpat koʼontontik ti tskoltautik ta jujuntal eke? Kʼalal jaʼo oy svokol li jtakbol Pabloe, laj yaʼi kʼuxi koltaat yuʼun Jeova ta sventa li xNichʼone, li Jesuse (2 Tim. 4:17). Xuʼ jchʼuntik ek ti Jeovae chakʼbutik sbendision ta jujuntal sventa spas kuʼuntik li yabtele (1 Juan 5:14).
3. ¿Butik ta skoltautik li Jeovae?
3 ¿Mi toj lubem xa cha kom yuʼun li kʼusitik cha pas jujun kʼakʼale, ti muʼyuk xa avipal sventa li chol mantale? Li Jeovae «jaʼ chacʼbe stsatsal li bochʼo lubene» (Isa. 40:29-31). ¿Mi yakal cha nup nutsel o kontrainel? «Acʼbo sventain Mucʼul Dios scotol li avocole; jaʼ chascoltaot, jaʼ chayicoot.» (Sal. 55:22.) ¿Mi cha xiʼ cha loʼilaj bakʼintik? «Batan me. Vuʼun chajchiʼinot ti cʼalal chaloʼilaje.» (Éxo. 4:11, 12.) ¿Mi jaʼ tspajesot jutuk ta chol mantal ta skoj ti ipote? Li Jeovae toj bal chil ti kʼuyepal spas avuʼun li yabtele xchiʼuk ti kʼuyelan chavakʼbe yipal spasele, manchuk mi jutuk (1 Cor. 3:6, 9).
4. ¿Kʼusi tstijutik spasel mi ta jpat koʼontontik ta stojolal li Jeovae?
4 «Li scʼob [stoyoj Jeovae] muʼyuc bochʼo xuʼ yuʼun tsyalesbe.» (Isa. 14:27.) Xuʼ jpat koʼontontik ti chakʼbutik sbendision Jeova li ta chol mantale, sventa jech-o «tsots [koʼontontik] jamal [jcholbetik] scʼop li Cajvaltique» (Hech. 14:3).