Li yajtsʼaklomtak Cristoe skʼan spasik orasion
1. ¿Kʼusi skʼan jpastik sventa spas kuʼuntik li chol mantale?
1 Li voʼotike mu spas kuʼun ta jtuktik li chol mantale. Jaʼ Jeova li buchʼu chakʼ kipaltik yoʼ spas kuʼuntik li abtelal taje (Fili. 4:13). Li stuke tstunes yaj-anjeltak sventa tskoltautik stael li krixchanoetik ti manxoik kʼuchaʼal chijetike (Apo. 14:6, 7). Jaʼ stuk chakʼ chʼiuk li bekʼ tsʼunobaletike, li voʼotike jaʼ noʼox ta jtsʼuntik xchiʼuk ta xkatʼestik (1 Cor. 3:6, 9). ¡Toj tsots skʼoplal ti jpat koʼontontik li yajtsʼaklomutik Cristo ta stojolal li jTotik ti chaʼi li j-orasiontike!
2. ¿Kʼusitik xuʼ jkʼantik li ta j-orasiontike?
2 Maʼuk ta kip jtuktik. Skʼan jpastik orasion jujun velta kʼalal ta jcholtik mantale (Efe. 6:18). ¿Kʼusitik xuʼ jkʼantik li ta orasione? Jlome jaʼ ti jkʼantik stsatsal koʼontontike xchiʼuk ti lekuk xkiltik li bu ta jcholtik mantale (Hech. 4:29). Xuʼ jkʼanbetik Jeova ti akʼo skoltautik stael li buchʼutik lek yoʼontonik sventa xlik jchantik Vivlia xchiʼukike. Mi oy kʼusi la sjakʼ li yajval nae xuʼ jkʼopontik ta anil Dios ta koʼontontik sventa tskoltautik ta stakʼel lek (Neh. 2:4). Jech xtok, xuʼ jkʼan jpʼijiltik sventa jaʼuk mas tsots skʼoplal xkiltik li chol mantale (Sant. 1:5). Xchiʼuk xtok li Jeovae xmuyubaj mi chkalbetik kolaval ta skoj ti jaʼ yajtunelutike (Col. 3:15).
3. ¿Kʼuxi chkoltavan li j-orasiontik sventa xichʼ cholel-o batel li mantale?
3 Ta sventa yantik. Kʼalal ta «xacʼopanbe [...] Dios ta [stojolal]» jun yajtsʼaklom Cristoe xuʼ xavalbe li sbie (Sant. 5:16; Hech. 12:5). ¿Mi jaʼ mu xakʼ lek xa chol mantal li achamele? Mi jaʼ jeche, paso orasion ta stojolal yan yajtsʼaklom Cristo ti muʼyuk mas ip chaʼiike. ¡Mu xaval ti mu xkoltavan li orasion cha pas ta stojolal yantike! Jech noxtok lek ti xichʼ pasel orasion sventa xakʼik-o xichʼ cholel mantal li ajvaliletike, sventa «xcuxet noʼox [y]oʼnton cuxul[ik], xchiʼuc jech jun [yoʼontonik]» li kermanotaktike (1 Tim. 2:1, 2).
4. ¿Kʼu yuʼun skʼan jkʼopontik skotol ora li Diose?
4 Li xcholel mantal ta spʼejel Balumile jaʼ jun mukʼta abtelal. Pe mi ta «[jkʼopontik] Dios scotol ora[e]» lek tsʼakal tspas kuʼuntik li yabtel Jeovae (Rom. 12:12).