Jvokʼ ti bu oy sjakʼobile

◼ ¿Kʼuxitik xuʼ jkoltatik li prekursoretike?

Li ta kabteltik chlik ta septiembre yuʼun 2008 kʼalal ta agosto yuʼun 2009, jutuk mu 800,000 ermanoetik xchiʼuk ermanaetik ta spʼejel Balumil tunik ta prekursor regular o espesial. Li yajtuneltak Dios ti chtunik ta tsʼakal orae xkoʼolaj chakʼik li sba sat kʼusitik chlokʼ yuʼunike, taje jaʼ kʼalal ep chchʼak skʼakʼalik, yipalik xchiʼuk kʼusitik oy yuʼunik sventa tspukik batel ta buyuk noʼox li lekil aʼyej sventa Ajvalilal yuʼun Diose (Pro. 3:9). ¡Li Jeovae xmuyubaj tajek ta skoj ti yakʼojbeik yipale! ¿Kʼuxi xuʼ jchanbetik ti kʼuyelan chil prekursoretik li Jeovae? Xchiʼuk, ¿kʼusitik xuʼ jpastik sventa xmuyubajik noʼox xchiʼuk xkuch yuʼunik li ta prekursorale?

Baʼyel, skʼan jnoptik lek kʼusi xuʼ xkalbetik sventa jpatbetik yoʼontonik yoʼ xakʼbeik yipal li ta prekursorale (Pro. 25:11). ¿Mi xuʼ jchʼakbetik yorail jujun xemana sventa xlokʼ jchiʼintik ta chol mantal junuk? Kʼalal chi jbat ta chol mantal xchiʼukike xuʼ van xlokʼ ta koʼonton jtunes jkarotik mi oy kuʼuntike, ti jaʼ mu persa stunes li yuʼunike. Pe mi jaʼ te chi jbat li ta skaroike, xuʼ van jkolta jbatik ta stojel li gasolinae (1 Cor. 13:5; Fili. 2:4). Jech xtok, kʼalal chkikʼanantik ta veʼel bakʼintik ta jnatike, jaʼ jech chkakʼanbetik ta ilel slekil koʼontontik xchiʼuk ti ta jkʼan ta jkoltaantik li buchʼutik chtunik ta tsʼakal orae (1 Ped. 4:8, 9).

Li Vivliae chal ta melel ti Diose chakʼbe kʼusitik chtun yuʼunik li buchʼutik baʼyel tsaʼik li Ajvalilal yuʼun Diose (Sal. 37:25; Mat. 6:33). Jtos kʼuyelan tspase jaʼ tstunes li yajtuneltak ti lek skʼanoj sbaike (1 Juan 3:16-18). Akʼo mi jech, li prekursoretike muʼyuk tsmalaik ti chkoltaatik ta takʼin ta sventa li kʼusitik sbainojike, xchiʼuk xtok, xuʼ van muʼyuk chalbeik ermanoetik ti oy svokolik ta skoj ti oy kʼusi chtun yuʼunike. Jech oxal, skʼan te noʼox jsatik xchiʼuk xkakʼtik venta li kʼusitik chtun yuʼunike, jaʼ jech xuʼ jnaʼtik kʼusitik xuʼ jpastik sventa staik li kʼusi muʼyuk yuʼunike (2 Cor. 8:14, 15).

Kʼalal bat ta Roma li Febee, ti jaʼ yajtsʼaklom Cristo ti oy tajek ta yoʼonton chol mantal ta baʼyel siglo te ta tsobobbail ta Cencreae, li Pabloe xi laj yalbe li ermanoetik ta Romae: «Ichʼic me ta mucʼ ta sventa li Cajvaltique, yuʼun tscʼan jech ta jpasbe jbatic vuʼutic li yuʼuntacutic Diose. Xchiʼuc tscʼan chacoltaic ta sventa cʼusi chtun yuʼun» (Rom. 16:1, 2). Xuʼ me jech xkakʼtik ta ilel ek kʼalal chlokʼ ta koʼontontik skoltael li buchʼutik mu xpajik ta xcholel li lekil aʼyej ta jtsobobbailtike, ti jaʼik li prekursor regularetik xchiʼuk espesialetike (Hech. 5:42).