Kerem tseb, akʼo persa ta spasel «lekil abtelal»

Li ta skarta Pablo la stsʼibabe batel li kerem Titoe, te laj yal ti skʼan lekuk ta chanbel stalelalik li keremetike (Tit 2:6, 7). Ta mas tsʼakal jutuke, te laj yal ti ta xichʼ chʼubael li slumal Jeova sventa oyuk ta yoʼontonik spasel «li kʼusi toj leke» (Tit 2:14). Taje jaʼ li cholmantale xchiʼuk ti xakʼik ta chanel ta sventa li Ajvalilal yuʼun Diose. Kerem tseb, ¿mi xuʼ xatunes li avipal sventa xatun ta prekursor auksiliar o ta regular? (Pr 20:29).

Mi oy ta avoʼonton chatun ta prekursore nopbo skʼoplal li kʼusitik spas avuʼune (Lu 14:28-30). Jech kʼuchaʼal liʼe, ¿bu chata atakʼin mi prekursorot xa oxe? ¿Kʼusi chapas sventa stsʼaki avuʼun li orae? Albo Jeova li kʼusi chanope (Sl 37:5). Albo atot ameʼ li kʼusi chakʼan chapase xchiʼuk kʼanbo koltael li buchʼutik jal xa chtunik ta prekursore. Vaʼun, akʼo batel persa ta stael li kʼusi oy ta avoʼontone. Xuʼ me xapat avoʼonton ti chakʼbot sbendision Jeova ta skoj ti chakʼan chatun ta stojolale.

MI LA AKʼELIK LI VIDEO KEREM TSEBETIK TI YICHʼOJIK TA MUKʼ LI JEOVAE, TAKʼIK LI SJAKʼOBILTAK LIʼE:

• ¿Kʼusi la snuptanik li junantik ermanoetik sventa x-ochik ta prekursore xchiʼuk kʼusi la spasik?

• ¿Kʼusi xuʼ spasik li totil meʼiletik sventa x-ochik ta prekursor regular li yalab xnichʼnabike?

• ¿Kʼu yuʼun skʼan oyuk skʼakʼalil yuʼunik ti bakʼin ta xcholik mantale?

• ¿Kʼusi xuʼ spasik li ermanoetik ta tsobobbail sventa skoltaik xchiʼuk ti spatbeik yoʼonton li prekursoretike?

• ¿Kʼusi bendisionetik tstaik li prekursoretike?