Jun abtelal ti chakʼ muyubajele
1. ¿Kʼusi abtelal yakal chichʼ pasel avi ti xuʼ xojtikinik-o Jeova li krixchanoetike?
1 Xmuyubajik tajek li buchʼutik laj yilik kʼuyelan laj yichʼik poxtael li krixchanoetik ta baʼyel sigloe (Luc. 5:24-26). Li avie xi jmuyubaj ta skoj li kabteltik ti xuʼ skolta yantik sventa xojtikinik li Jeova eke (Apo. 22:1, 2, 17). Solel xi jmuyubaj kʼalal oy bu ta jkʼeltik ta jlikuk vun ti kʼuyelan tsjelbe xkuxlejal krixchanoetik li sKʼop Diose xchiʼuk li xchʼul espiritue. Pe mas to me xi jmuyubaj mi chkakʼtik junuk chanubtasel ta Vivlia ti xuʼ xchʼiik-o ta mantal li krixchanoetike.
2. ¿Kʼusi muyubajel xuʼ jtatik kʼalal oy buchʼu ta jchanubtastik ta sKʼop Diose?
2 Chakʼ tajek muyubajel kʼalal chtakʼ kuʼuntik sjakʼobiltak kʼuchaʼal liʼe: «¿Kʼusi sbi li Diose?» «¿Kʼu yuʼun yakʼoj to oyuk vokolil li Diose?» o «¿Kʼusi sbalil ta stabeik li Ajvalilal yuʼun Dios li krixchanoetike?». Pe kʼalal chkiltik ti xmuyubaj tajek kʼuyelan chchan batel kʼusitik melel li jchanune mas to xi jmuyubaj (Pro. 15:23; Luc. 24:32). Jech xtok, kʼalal ta xchʼi batel ta mantal li jun jchanun ta Vivliae, xuʼ van xlik stunesbe li sbi Jeovae, tsjel li kʼuyelan tslap skʼuʼ spokʼe, li kʼuyelan tsmeltsan sbae, chikta spasel li kʼusitik chopole xchiʼuk chlik xcholbe mantal li yantike. Mi laj yakʼ sba ta stojolal Dios xchiʼuk laj yichʼ voʼe, ta xkʼot ta kermanotik xchiʼuk jchiʼiltik ta chol mantal. Chakʼ muyubajel li kʼuyelan tsjel batel jujutos li xkuxlejale (1 Tes. 2:19, 20).
3. ¿Kʼusitik xuʼ xa pas sventa xa likes junuk chanubtasel ta Vivlia?
3 ¿Mi xuʼ xa koltavan? Mi oy ta avoʼonton cha abtej li ta kʼupil sba abtelal taje, kʼanbo Jeova ti oyuk buchʼu xavakʼbe chanubtasel ta Vivliae, xchiʼuk jech xa pas batel li kʼusi la aval ta a-orasione (1 Juan 5:14). Buyuk noʼox oyan, cholbo mantal li krixchanoetike. Mi xuʼ chavile albo mi skʼan xchʼamik junuk chanubtasel ta Vivlia (Ecl. 11:6). Kʼalal mi la ata junuk krixchano ti lek chaʼi mantale xchiʼuk la atsʼunbe ta yoʼonton li skʼop Diose, sut noʼox me kʼelo sventa chavatʼes o chavakʼbe yaʼlel (1 Cor. 3:6-9).
4. ¿Kʼu yuʼun sujom skʼan jsaʼtik li buchʼutik tskʼan chchanik Vivliae?
4 Ep to krixchanoetik ti oyik ta viʼnal xchiʼuk ta takitiʼil ta sventa kʼusitik tukʼe. ¿Buchʼutik xuʼ skoltaik li krixchanoetik ti chtun yuʼunik mantale? Voʼotik xuʼ jkoltatik kʼalal chkalbetik mi skʼan xchanik Vivliae (Mat. 5:3, 6, NM). Yoʼ to mu xlaj li kʼajoj ta mantale, ta sjunuluk koʼonton jkolta jbatik ta chol mantal xchiʼuk ta spasel ta yajtsʼaklom Cristo li krixchanoetike (Isa. 6:8).