Li talelal ti tsots skʼoplal skʼan oy yuʼun li lekil jchanubtasvaneje
1. ¿Kʼusi talelal skʼan oy yuʼun li lekil jchanubtasvaneje?
1 ¿Kʼusi skʼan oy yuʼun li lekil jchanubtasvanej ta Vivliae? ¿Mi jaʼ van ti lek chanunajeme? ¿Mi jaʼ van ti ep xa kʼusi xchanoje? ¿Mi jaʼ van ti lek xijtojob ta chanubtasvaneje? Ta melel, li kʼusi skʼane jaʼ li kʼanelale: ti jaʼ jun talelalil ti te smakojbe skʼoplal skotol li Mantaletike, ti jaʼ chichʼik-o ojtikinel li yajtsʼaklomtak Cristoe, ti jaʼ jun talelalil ti toj echʼ noʼox tsots skʼoplale xchiʼuk ti jaʼ mas chvinaj ta stojolal li Jeovae (Juan 13:34, 35; Gál. 5:14; 1 Juan 4:8). Jaʼ yuʼun chaʼa, sventa xijkʼot ta lekil jchanubtasvaneje skʼan xkakʼtik ta ilel li kʼanelale.
2. ¿Kʼu yuʼun tsots skʼoplal skʼan jkʼantik li krixchanoetike?
2 Skʼanel li krixchanoetike. Li Jesús, ti jaʼ li Mukʼta Jchanubtasvaneje, skʼanojan li krixchanoetike, ti jaʼ lek ichikintabat-oe (Luc. 5:12, 13; Juan 13:1; 15:13). Mi jkʼanojtik li jchiʼiltaktike, ta me xkalbetik mantal ta buyuk noʼox. Mu kʼusi xuʼ spajtsanutik: akʼo mi mu skʼan xaʼiik mantal, mi tskontrainutik o kʼusuk noʼox yan vokolil jnuptantik. Ta jtsʼet chikintabetik lek li kʼusi chal li buchʼu ta jcholbetik mantale xchiʼuk jaʼ chkalbetik li kʼusi xuʼ xpatbat-o yoʼontonike. Jech xtok, oy ta koʼontontik ta jchʼak jkʼakʼaltik sventa jchanubtastik li krixchanoetike xchiʼuk ta jchapan jbatik lek li ta jujuvokʼ xchanobile.
3. ¿Kʼuxi tskoltautik ta cholmantal ti jkʼanojtik li kʼusi melel ta Vivliae?
3 Skʼanel li kʼusi melel ta Vivliae. Li Jesuse skʼanoj li kʼusi melel ta Vivliae. Yuʼun xkoʼolaj kʼuchaʼal jun kʼulejal laj yil (Mat. 13:52). Mi jkʼanojtik li melele, xijmuyubaj noʼox ta xkaltik batel, vaʼun jaʼ jech xmuyubaj chchikintabutik li krixchanoetike. Li kʼanel taje jaʼ tskoltautik ta stsalel li xiʼele, yuʼun jaʼ chakʼ jnoptik ti oy sbalil li mantale, maʼuk li kʼusi mu spas kuʼuntike.
4. ¿Kʼuxi xuʼ xchʼi kuʼuntik li kʼanelale?
4 Kʼuxi xuʼ xchʼi li kʼanelale. Mi ta jnopbetik lek smelolal ti kʼuyelan oyik ta mantal li krixchanoetike xchiʼuk ti kʼuyelan kʼanvanem li Jeova xchiʼuk li Xnichʼone, jaʼ me tskoltautik sventa xchʼi li kʼanelal kuʼuntik ta stojolalike (Mar. 6:34; 1 Juan 4:10, 11). Jech xtok, mi ta jchanilantik xchiʼuk ta jnopbetik skʼoplal li kʼusi melel ta Vivliae ta me xchʼi ti kʼuyelan jkʼanojtike. Jvules ta joltik ti jaʼ jtos yabtel chʼul espiritu li kʼanelale (Gál. 5:22). Sventa xchʼi kuʼuntike skʼan jkʼanbetik vokol li Jeova sventa skoltautike xchiʼuk ti jkʼanbetik li xchʼul espiritue (Luc. 11:13; 1 Juan 5:14). Jaʼ yuʼun, manchuk mi lek chanunajemutik o mi muʼyuk, mi ep xa kʼusi jchanojtik o mi xijtojob lek ta chanubtasvanej, jkotoltik xuʼ xijkʼot ta lekil jchanubtasvanej ta Skʼop Dios mi chkakʼtik ta ilel kʼanelale.