Skarta li Jtsop Jbeiltasvaneje
Kuni ermanotak:
¡Ximuyubajkutik tajek ti ta jtsʼibabekutik yan velta li mas ta vukub miyon tukʼil yajtuneltak Jeova ti oy ta spʼejel Balumile! ¿Kʼuyelan chavaʼi abaik kʼalal chavojtikinik junuk yajrextiko Jeova ti ta namal balumil likeme? ¿Mi mu jechuk ti ta anil noʼox chlik jkʼantike? (Juan 13:34, 35.) Jaʼ jech chkaʼi jbatik kʼalal mi laj jkʼeltik li Anuario ti chalbe skʼoplal li labal sba sloʼilal xchʼunel yoʼontonik xchiʼuk ti tukʼ yakʼoj sbaik li ermanoetik ta jeltos mukʼta lumetike.
Kaʼiojkutik ti epoxuk ti tsots skʼoplal chavilik li Akʼobal sventa Yichʼel ta Mukʼ Jeova ta Kutsʼ Kalaltike. Li totil meʼiletike saʼojbeik smelolal kʼuxi xuʼ xchikintaik xchiʼuk xaʼibeik smelolal li yalab xnichʼnabik ti bikʼitik toe (Efe. 6:4). Jech ek li buchʼutik nupunemike stsatsubtasoj snupunelik ta skoj ti jmoj chchanik li Vivliae (Efe. 5:28-33). Jech xtok, jtaojbetik sbalil ti ta jchʼakbetik yorail ta xchanel lek skʼoplal li Skʼop Dios ta kutsʼ kalaltike o ti ta jtuktik noʼoxe (Jos. 1:8, 9).
Jech kʼux chkaʼibekutik svokolik xtok li buchʼutik chʼayem kʼusitik yuʼunik ta skoj nikel, nojelal ta voʼ o yan kʼusitik ti nopajtik chkʼot ta pasele. Xchiʼuk ta jtojkutik ta vokol ti akotolik muʼyuk chanopik jayibuk velta kʼalal oy tskʼanik koltael ermanoetik ti chil svokolike (Hech. 11:28-30; Gál. 6:9, 10). Jech xtok, kʼuchaʼal li Dorcas ti «lec cʼusitic la spas xchiʼuc ep [koltavane]», oy buchʼutik jech stalelik, yuʼun oy ta yoʼonton chkoltavanik kʼalal oy kʼusi chtun yuʼunik li ermanoetik ta tsobobbaile (Hech. 9:36). Naʼik me ti manchuk mi mu snaʼik yantik li abtelal chapasike, li Jeovae snaʼoj xchiʼuk chakʼboxuk amotonik (Mat. 6:3, 4).
Ta jlom lumetike oy buchʼutik ti tsjoypʼinbeik smelolal li mantaletik sventa sok yuʼunik li abtelal ta jpastike, xchiʼuk oy avilojik ti muʼyuk chavichʼik ichʼbel ta mukʼ aderechoike (Sal. 94:20-22). Akʼo mi jech, ta skoj ti laj onoʼox yal Jesús ti chavichʼik ilbajinele, lek tsots avoʼontonik chkuch batel avuʼunik xchiʼuk chasaʼ anakʼobbailik ta stojolal Jeova (Juan 15:19, 20). Naʼik me ti ta jpasolankutik orasion ta atojolalik xchiʼuk ta jkʼankutik ti «chapalucoxuc me scotol cʼacʼal cʼusi chatacʼbeic me oy bochʼo chasjacʼboxuc ta sventa li cʼusi apatoj avoʼnton chamalaique» (1 Ped. 3:13-15).
Jech xtok, ta jkʼan ta jkʼupil kʼoptakutik ti ta smiyonal xa noʼox ermanoetik ti lek sak-o stalelalik ch-echʼ jujun jabile, manchuk mi yakʼoj persa ta spukbel skʼoplal mulivajel li Satanase. Li avi ti yantik xa xchʼay batel li lekil talelaletik ti muʼyuk toʼox jech ilbile, voʼoxuke jaʼ chachʼunik-o li mantal liʼe: «Oyuc me lec atsatsalic ta sventa ti jun oyoxuc xchiʼuc li Cajvaltique, xchiʼuc ta sventa li svuʼel ti toj echʼem stsatsale» (Efe. 6:10). Yuʼun alapoj «li amaquic, li avabtejebic yacʼoj Diose» xchiʼuk «kuchem avuʼunic li loʼlael «chacʼ tal li pucuj ti toj lec yaʼyele» (Efe. 6:11, 12). Mu me xchʼay xavaʼiik ti jaʼ tstunesoxuk Jeova sventa tspak skʼoplal ta stojolal li buchʼu chopol ch-albat skʼoplale, ti jaʼ li Satanase (Pro. 27:11).
Jech xtok, ximuyubaj chkalbotkutik ti epaj ti kʼuyepal kʼotik li ta Snaʼobil slajel Cristo ta 2011, yuʼun kʼotik 19,374,737 krixchanoetik. Taje xuʼ van jaʼ ta skoj ti ep la-ochik ta prekursor auksiliar li ta avrile. Ti jech la skʼupil kʼoptaik Jeova li yajrextikotake, jaʼ tun-o sventa lek chkʼopojik ta stojolal Jeova li epal miyon krixchanoetik ta spʼejel Balumile (Rom. 10:18). Li ta u taje abtejik 2,657,377 ta prekursor auksiliar, xchiʼuk laj yakʼik persa sventa x-epaj yabtelik ta cholmantal li yan jchol mantaletike. Ti ta sjunul avoʼonton chapasike jaʼ me ximuyubajkutik-o (Sal. 110:3; Col. 3:23).
Ta skoj ti chkoltavan li Jeovae li echʼ jabile laj yichʼik voʼ 263,131 krixchanoetik. Ta jtojkutik ta vokol ti la koltaunkutik ta stakel ta ikʼel li krixchanoetik jech kʼuchaʼal chal ta Apocalipsis 22:17 ti xi chale: «Li Chʼul Espíritu xchiʼuc li yajnil Chʼium Chije jech chalic: “Laʼ me ta ora”, xiic. Li bochʼotic chaʼyic li cʼop liʼ tsʼibabile jech acʼo yalic ec: “Laʼ me ta ora”, acʼo xiicuc. Li bochʼotic taquin yoʼntonique acʼo talicuc ta stojol li Jesuse. Li bochʼo tscʼane smoton ch-acʼbat li voʼ sventa cuxlejale». Jech xtok, ti laj xa jchantik ta mukʼta tsobajel ta oxib kʼakʼal ta 2011 li kʼusitik smakoj li Ajvalilal yuʼun Diose mas xa ta sjunul koʼontontik xi chkaltike: «Akʼo taluk li Ajvalilal yuʼun Diose». Jech noxtok, jaʼ jech chkaltik kʼuchaʼal li jtakbol Juan kʼalal «laʼ me, Cajval Jesús» xi takʼav kʼalal xi albat yuʼun Jesuse: «Poʼot xa chital» (Apo. 22:20).
Yoʼ to jech chamalaik chkʼot ta pasel li kʼusitik skʼan xkʼot ta pasele, mu me xchʼay xavaʼiik ti kʼanbiloxuk ta jujuntale: kuni ermanotak xchiʼuk kʼuni ermanatak ti chvinaj ta avabtelik ta melel ti akʼanojik li Jeovae (1 Juan 3:18).
Avermanotakik,
Li Jtsop Jbeiltasvanej yuʼun li Yajrextikotak Jeovae