Mu xijxiʼ jcholtik mantal li ta pʼolmajebaletike
1. ¿Kʼu yuʼun mu labaluk chkaʼitik ti chijxiʼ kʼalal ta jcholtik mantal ta pʼolmajebaletike?
1 ¿Mi ta van xaxiʼ chachol mantal ta pʼolmajebaletik? Mi jeche, mu xavat avoʼonton, yuʼun mu atukuk. Yuʼun li jtakbol Pablo ti buyuk noʼox la xchol mantale, persa la spas ta tsots yoʼonton sventa spas yuʼun li yabtele (1 Tes. 2:2). Li avie chkalbetik batel skʼoplal ti kʼuyuʼun xuʼ tsots chkaʼitik li cholmantal ta pʼolmajebaletike xchiʼuk ti kʼuxi xuʼ stsal kuʼuntike.
2. ¿Kʼu yuʼun mu stakʼ jnoptik ti chopol chaʼiik mi ta jkʼopontik li j-abteletike?
2 ¿Mi ta van jchʼaybe yoʼonton chaʼiik li j-abteletike? Ta jutuk mu skotoluk li pʼolmajebaletike, li j-abteletike albilik mantal ti chikta kʼusi yakal tspasik sventa tskʼelik kʼusi tskʼan li krixchanoetike. Jech xtok, jutuk mu skotolikuk ch-ichʼvanik ta mukʼ, yuʼun tsnopik ti xuʼ te chamanolaj ta tsʼakale. Xuʼ me mas x-ichʼvanik ta mukʼ mi lek noʼox sba akʼuʼ apokʼ alapoje xchiʼuk mi oy slekil avoʼonton ta stojolalike.
3. ¿Kʼusi xuʼ jpastik sventa mu chopoluk xaʼi sba kuʼuntik li jmanolajeletike?
3 ¿Mi persa van ta jchol mantal kʼalal jaʼo oy jmanolajeletike? Mas van lek ti jaʼo xachol mantal kʼalal muʼyuk mas jmanolajeletike, xuʼ van jaʼo kʼalal naka to tsjamike. Jaʼ to xakʼopon kʼalal stuk oy li jkʼel-abtel o li yan j-abtele xchiʼuk akʼo persa ti jlikel noʼox xaloʼilaje.
4. ¿Kʼusi xuʼ xaval kʼalal chachol mantal ta pʼolmajebaletike?
4 ¿Kʼusi xuʼ xkaltik? Mi oy ep j-abteletik li ta pʼolmajebale, jaʼ lek kʼopono li buchʼu oy ta sba li abtelale. Xuʼ xi xavale: «Ta skoj ti mu masuk jtakutik ta snaik li buchʼutik chlokʼik ta abtele, ta jvulaʼankutik ta yabtelik. Jnaʼoj ti ep avabtele, jaʼ yuʼun jlikel noʼox chiloʼilaj». Sventa mu snopik ti chachonolaje jaʼ van mas lek ti mu xakʼan matanal takʼine, jaʼ noʼox xuʼ xaval mi oy buchʼu tsjakʼ kʼuxi chichʼ tael takʼin sventa li kabteltik ta sjunul Balumile. Ta skoj ti jeltos li pʼolmajebaletike, jaʼ van lek ti xajakʼbe mi xuʼ xachiʼin ta loʼil yan j-abteletik li buchʼu sbainoj skʼelele. Jechuk xalikes aloʼil kʼuchaʼal laj xa kaltike. Mi oy junuk j-abtel ti mu noʼox xokobe, jaʼ lek ti jlikel noʼox xaloʼilaje xchiʼuk iktabo junuk tratado. Mi muʼyuk buchʼu yan stakʼ xachiʼin ta loʼile, jakʼo mi xuʼ xavikta vunetik yoʼ bu chkuxik li j-abteletike o ta yan bu ti xuʼ skʼel skotol krixchanoetike.
5. ¿Kʼusitik srasonal oy sventa mu xijxiʼ xcholel mantal li ta pʼolmajebaletike?
5 Jech kʼuchaʼal la spas Jesús xchiʼuk Pablo ti lek tsots yoʼonton la xcholik mantal yoʼ bu ch-abtej li krixchanoetike, jech xuʼ spas kuʼuntik ek (Mat. 4:18-21; 9:9; Hech. 17:17). Kʼanbo Jeova ti akʼo skoltaot sventa junuk xchiʼuk tsotsuk avoʼontone (Hech. 4:29). Kʼalal ta jcholtik mantal ta pʼolmajebaletike oy lek kʼusi chkʼot ta pasel, yuʼun oy onoʼox krixchanoetik. ¿Kʼu yuʼun mu xapas preva?