Lek kʼusi chkʼot ta pasel kʼalal ta jcholtik mantal ta kayeetike
1. ¿Kʼusi xuʼ jchanbetik Jesús kʼalal ta jcholtik mantale?
1 Li Jesuse ta sjunul yoʼonton la xchol mantal ta bebetik xchiʼuk ta buyuk noʼox (Luc. 9:57-61; Juan 4:7). Yuʼun oy tajek ta yoʼonton chakʼbe snaʼ li krixchanoetik ti bu kʼalal xuʼ yuʼun li mantal ti toj tsots skʼoplale. Li chol mantal ta kayeetik avie jaʼ jtos ti kʼuxi xuʼ jkoltatik lek li krixchanoetik sventa sta spʼijilike (Pro. 1:20). Mi chlokʼ ta koʼontontik xchiʼuk baʼyel ta jkʼeltik leke oy me kʼusi lek chkʼot pasel.
2. ¿Kʼusi te smakojbe skʼoplal ti voʼotik ta jlikestik loʼil kʼalal ta jcholtik mantal ta kayeetike?
2 Jlikestik li loʼile. Jaʼ mas lek ti voʼotik xi jnopaj batel ta stojolal li krixchanoetike, maʼuk ti te noʼox chotolutik o vaʼalutik ta jmalatik xnopaj tal ta jtojolaltike. Stseʼetuk noʼox asat xakʼel o xakʼopon. Mi oy jayvoʼoxuk ta chol mantale jaʼ lek ti ta jujuntal xbat kʼopojanike. Mi la jtatik junuk krixchano ti oy ta yoʼonton li mantal xtoke, skʼan me oyuk ta koʼontontik skoltael. Mi sta-o chavile, ta slekiluk avoʼonton jakʼbo bu xuʼ xa chiʼin ta loʼil yan velta. Oy jlom jcholmantaletike tstaik ta kʼoponel li krixchanoetik ti skʼoponojik xa onoʼox ti lek laj yaʼiik mantale.
3. ¿Kʼuxi ti xuʼ jkʼeltik lek baʼyel kʼalal ta jcholtik mantal ta kayeetike?
3 Kʼelo lek baʼyel. Kʼalal cha chol mantale, kʼelo lek baʼyel bu chavaʼi xchiʼuk buchʼu chakʼopon. Pe mu persauk xacholbe mantal skotol li buchʼutik te ch-echʼe. Kʼelo me lek li apat axokone. Akʼo me jelavuk mi sujom xa chtal li krixchano chavile. Mi te yakal cha chol mantal ta stiʼ mukʼta tiendaetike oyuk me apʼijil sventa mu xavakʼbe svul yoʼonton li buchʼu sbainoje. Jaʼ me mas lek mi jaʼ to la cholbe mantal mi lokʼ xaʼox li ta tiendae. Pe ti kʼuyelan cha nopaj batel ta stojolal li krixchanoetike, mu me xiʼ avuʼun. Kʼelo me lek buchʼu chavakʼbe li vunetik xtoke. Mi mu toj masuk lek laj yaʼi mantal li krixchanoe xuʼ me jaʼ noʼox xavakʼbe jlikuk tratado.
4. ¿Kʼu yuʼun oy sbalil xchiʼuk kʼupil sba kʼalal ta jcholtik mantal ta kayeetike?
4 Kʼalal ta jcholtik mantal ta kayeetike jaʼ me jech ta jtatik ta kʼoponel epal krixchanoetik (Ecl. 11:6). Junantik krixchanoetik ti mu jtatik ta snaike xuʼ me jaʼ te jtatik li ta chol mantal ta kayeetike. ¿Kʼu yuʼun mu xa chapan aba lek sventa xa kʼupin li cholmantal ta kayeetike?