Mas xa toj kʼupil sba li cholmantal ta buyuk noʼox xchiʼuk grupoe

1. ¿Kʼusi albatik xa li tsobobbailetik ti chcholik mantal yoʼ bu chjelav epal krixchanoetike?

¹ Li tsobobbailetik ti chcholik mantal yoʼ bu chjelav epal krixchanoetike albatik xa ti akʼo skʼelik mi xuʼ xcholik mantal li ta mexaetik o li ta yavil vunetik ti stakʼ jochele. Mi chichʼ tunesel li yavil vunetik ti stakʼ jochele, skʼan me te vaʼal junuk jcholmantal o moʼoje, xuʼ te xchoti ta xokon. Pe mi jaʼ chichʼ tunesel li mexaetike, skʼan me oyuk chaʼvoʼ jcholmantal. Skʼan xakʼik persa oyuk slekil yoʼontonik xchiʼuk stseʼetuk noʼox satik. Kʼalal mi oy buchʼu nopaj tal li ta yavil vunetik o mexae xuʼ xi slikes sloʼil li jun jcholmantale: «¿Mi oy ajakʼojbe aba kʼusi chal Vivlia ta sventa liʼe?». Jech xtok un, xuʼ van oy jun o chib jcholmantaletik ti tetik noʼox nopol xuʼ xcholbeik mantal li buchʼutik te chjelavike.

2. Alo jun skʼelobil ti lek kʼusi kʼotem ta pasel ta skoj li cholmantal ta mexaetike.

² Ep xa buchʼutik lik xchanik Vivlia ta skoj li cholmantal taje. Oy jun skʼelobil: jun jchanun tseb ta universidad ti tskʼan ox tstsʼiba ta sventa li stestigotak Jeovae muʼyuk la sta ta saʼel mi junuk Salon sventa Tsobobbail. Kʼalal echʼ jun xemanae, la sta ta kʼelel ta xchanob vun jun mexa ti te oy vunetike. Lik xchan Vivlia, li avi une jaʼ xa jun jcholmantal ti yichʼoj xa voʼe xchiʼuk chchol xa mantal ta buyuk noʼox xchiʼuk li grupoe.

3. ¿Kʼusi chalik li buchʼutik xcholojik mantal ta mexaetik o ta yavil vunetik ti stakʼ jochele?

³ Jun ermana ti jech la xchol mantal taje xi laj yale: «Oy buchʼutik chnopajik sventa ch-echʼ stsakik li revistaetik sventa jujun ue. Yan xtoke muʼyuk bu yaʼiojbeik skʼoplal li stestigotak Jeovae. Ta skoj taje, mas to ep buchʼutik xuʼ jcholbetik mantal». Xi laj yal yan ermanae: «Toj jelel tajek ti kʼu yelan chichʼ cholel mantale, pe toj kʼupil sba, yuʼun jaʼ chnopaj tal stukik li krixchanoetike, akʼo mi jaʼ noʼox chnachʼtaik kʼusitik oy».

4. ¿Kʼu yuʼun mas lek ti junuk noʼox yavil, skʼakʼalil xchiʼuk yorail xichʼ akʼel te li mexaetik o yavil vunetike?

⁴ Li kʼusi mas lek stakʼ pasele jaʼ ti junuk noʼox yavil, skʼakʼalil xchiʼuk yorail xichʼ akʼel te li mexaetik o yavil vunetike. Ta skoj ti chnop xaʼiik te chilutik li krixchanoetike, mas me chnopaj sventa oy kʼusi tsjakʼik o sventa tskʼanik jlikuk vun. ¿Mi oy xa jech snopoj chchol mantal li atsobobbaile? Akʼo persa spasel xchiʼuk kʼupino li vaʼ yelan cholmantal ti chalbe skʼoplal ta buyuk noʼox li «ventainel yuʼun Diose» (Luc. 9:60).