Jtunes lek jkʼakʼaltik ta sventa li cholmantale
Li stestigoutik Jeovae la jcholtik mantal 1,945,487,604 ora li ta kabteltik chlik ta septiembre yuʼun 2013 kʼalal ta agosto yuʼun 2014, taje jaʼ chakʼ ta ilel ti chkakʼbetik yipal ta spasbel li yabtel Jeovae (Sal. 110:3; 1 Kor. 15:58). Ta skoj ti «toj komkom xa li yoraile», ¿mi xuʼ van jcholbetik mantal mas krixchanoetik ti kʼu sjalil chijlokʼ jujukoj ta cholmantale? (1 Kor. 7: 29.)
Sventa jtunestik lek li jkʼakʼaltik kʼalal chijlokʼ ta cholmantale, skʼan me jeltik li kʼusi nopem xkaʼitik spasele. Jun skʼelobile, mi ep ta velta muʼyuk ta jtatik ta chiʼinel ta loʼil junuk krixchano kʼalal chijlokʼutik ta cholmantal junuk ora o mas jutuke, ¿kʼusi van xuʼ jpastik sventa jtatik ta cholbel mantal yan krixchanoetik? Akʼo mi jelajtik ti bu ta jcholtik mantale, li junantik tojobtaseletik chichʼ alel liʼe xuʼ van xtun kuʼuntik yoʼ jtunestik lek li jkʼakʼaltik kʼalal ta jcholtik mantale, vaʼun mu jecheʼuk noʼox me li kʼusi ta jpastike (1 Kor. 9:26).
Cholmantal ta naetik. Li jcholmantaletike ta epal jabil xa onoʼox nopem xaʼiik ti te tslikesik cholmantal kʼalal mi kʼotik ta jujupʼej nae. Akʼo mi jech, ta skoj ti ep krixchanoetik ch-abtejik li ta kʼakʼaltike, ¿kʼu yuʼun mu jaʼuk to xbat jcholtik mantal ta naetik kʼalal mi mal xaʼox kʼakʼale o kʼalal ch-ikʼub xaʼox osile? Li vaʼ ora taje, li krixchanoetike mas xa jun yoʼonton te oy ta snaʼik. Pe li ta kayeetik o ta pʼolmajebaletike jaʼ van mas lek ti ta sob xbat jcholtik mantale.
Cholmantal ti bu chjelav ep krixchanoetike. Skʼan xichʼ akʼel mexaetik o yavil vunetik ti stakʼ jochel ti bu ch-echʼ ep krixchanoetike, pe jaʼuk me te xichʼ akʼel ti bu chchol mantal li tsobobbaile (kʼelo li Kabteltik sventa Dios yuʼun julio ta 2013, ta paj. 5). Pe mi muʼyuk xa bu chjelav ep krixchanoetik ti bu akʼbil li yavil vunetike, li Komite sventa Abtelal ta Tsobobbaile xuʼ me sjelbeik li yavile, xuʼ xbat yakʼik ti bu chjelav ep krixchanoetike.
Chaʼvulaʼanel xchiʼuk chanubtasel ta Vivlia. Buyuk noʼox ti ta jcholtik mantale oy junantik ora ti chʼabal mas krixchanoetike. ¿Mi xuʼ van jaʼo xbat chaʼvulaʼanvankutik xchiʼuk xbat kakʼtik chanubtasel li vaʼ ora taje? Jun skʼelobile, mi jaʼ te ta jtatik ta snaik li krixchanoetik li ta jujun sob sabadoe, xuʼ van jaʼ to xbat kakʼtik chanubtasel ta Vivlia li ta mal kʼakʼal o kʼalal ch-ikʼub xaʼox osile. Mi ta karo chijbat kʼalal chbat chaʼvulaʼanvankutike, jaʼ van mas lek ti jayvoʼ noʼox xijbat li ta jujukot karoe, vaʼun xuʼ me mas ep jcholtik mantal.
Melel onoʼox ti xuʼ jtsak koratik ti kʼu sjalil chijlokʼ ta cholmantale, pe mas me chakʼbutik muyubajel kʼalal mi oy kʼusi lek chkʼot ta pasel kuʼuntike. Mi oy junantik ora ti muʼyuk mas krixchanoetik kʼalal ta jcholtik mantale, jsaʼtik yan kʼuxi xuʼ jpastik. Jkʼanbetik koltael Jeova, ti jaʼ li «Yajval Abtel», yoʼ skoltautik ta stunesel lek li jkʼakʼaltik kʼalal chijlokʼ ta cholmantale (Mat. 9:38).