¿Kʼu yuʼun xmuyubaj avoʼonton?
1. ¿Kʼusi xuʼ xijmuyubaj-o li ta slajeb jujun ue?
1 Kʼalal chkakʼtik kʼuyepal la jcholtik mantal ta jujun ue jkotoltik oy srasonal kuʼuntik sventa xijmuyubaj noʼox (Gál. 6:4, Ch). Manchuk mi prekursor espesialutik ti 130 ora chkakʼtik ta ue o mi jaʼ noʼox jcholmantalutik ti xuʼ noʼox 15 minuto ta jcholtik mantale, skʼan me xijmuyubaj ti chijtun ta stojolal Jeova ta sjunul koʼontontike (Sal. 100:2).
2. ¿Kʼu yuʼun skʼan xkakʼ ta koʼontontik spasbel yabtel li Jeovae?
2 Ta skoj ti jaʼ Mukʼul Jpasmantal ta sjunul vinajelbalumil li Jeovae sta-o ti jaʼ xkakʼbetik li kʼusi mas toj lek oy kuʼuntike (Mal. 1:6). Laj kakʼ jkuxlejaltik ta stojolal sventa jpastik li kʼusi tskʼan yoʼonton ta skoj ti jkʼanojtike. Mi laj kakʼbetik «sba sat» kʼusitik oy kuʼuntik li Jeovae, jaʼ xkaltik, ti ta jtunes jkʼakʼaltik, kʼusitik jnaʼtik spasel xchiʼuk kipaltike xuʼ me xijmuyubaj noʼox, yuʼun jnaʼojtik ti jaʼ la jpastik ti kʼuyepal xuʼ kuʼuntik ta jun kʼakʼal o ta jun ue (Pro. 3:9). Pe mi te noʼox xvulvun li jol koʼontontik ta skoj ti jnaʼojtik ti xuʼ xij-abtej mas ta stojolal li Jeovae skʼan me jkʼeltik kʼusi xuʼ jpastik (Rom. 2:15).
3. ¿Kʼu yuʼun mu lekuk ti ta jkoʼoltas jbatik xchiʼuk li yantike?
3 «Maʼucuc scoʼoltas sba jech cʼu chaʼal ta spas ti yane.» Mu lekuk ti ta jkoʼoltas jbatik xchiʼuk li yantike o ti ta jkʼan ta jpastik li kʼusi laj toʼox jpastik kʼalal oy toʼox lek kipaltik o ti xuʼ toʼox kuʼuntike. Jelel li jkuxlejaltike xchiʼuk li kʼusitik spas kuʼuntike. Kʼalal ta jkoʼoltas jbatik xchiʼuk yantike jaʼ noʼox te chlik-o tsalbail o xuʼ chopol chkaʼi jbatik ta skoj ti mu xa spas kuʼuntik taje (Gál. 5:26; 6:4). Jech kʼuchaʼal li Jesuse muʼyuk koʼoltasvan. Moʼoj, li stuke la skʼupil kʼopta li kʼusi spas yuʼunik li krixchanoetike (Mar. 14:6-9).
4. ¿Kʼusi ta jchantik li ta lokʼolkʼop laj yal Jesús ta sventa talentoetike?
4 Li j-abteletik laj yalbe skʼoplal Jesús ta lokʼolkʼop ta sventa li talentoetike, jech yepal akʼbatik «ti cʼu yepal xuʼ yuʼun[ik]» ta jujun tale (Mat. 25:15). Kʼalal sut skʼel yabtel li yajvalike, la skʼupil kʼopta li buchʼutik ta sjunul yoʼonton abtejike, ti la stunes lek li kʼusitik snaʼ spasike xchiʼuk ti jeltos tspas yabtelike. Xi laj yalanbee: «Laʼ ochan, cuxetuc noʼox avoʼnton achiʼuc li avajvale» (Mat. 25:21, 23). Mi chkakʼ ta koʼontontik li cholmantal eke, lek chiluktik li Diose xchiʼuk xijmuyubaj noʼox.