Sbaliltak chichʼ tael kʼalal ta jujuvokʼ ta jcholtik mantale
1. ¿Kʼusi sbalil ta jtatik li ta jtsop bu ta jtsob jbatik sventa cholmantal jech kʼuchaʼal toʼox li ta Xchanel Livro yuʼun Tsobobbaile?
1 ¿Mi oy kʼusi chanaʼ li ta Xchanel Livro yuʼun Tsobobbaile? Li ta tsobajel taje toj lek toʼox sventa xuʼ xavojtikin mas li yantike (Prov. 18:24). Li buchʼu toʼox yichʼoj ta venta xchanel livro ta tsobajele oy ta yoʼonton chakʼbutik li koltael chtun kuʼuntike. (Prov. 27:23; 1 Ped. 5:2, 3). Li sbaliltak toʼox ta jtabetik taje, xuʼ te jtatik li ta jtsop bu ta jtsob jbatik sventa li cholmantale.
2. ¿Kʼusi xuʼ xapas sventa mas to xlekub ti kʼu yelan xavil abaik xchiʼuk li ermanoetik ta agrupoe?
2 Voʼot baʼyel alo. Li jujutsop sventa cholmantale jech yepal ta stsob sbaik jech kʼuchaʼal toʼox li ta Xchanel Livro yuʼun Tsobobbaile. Kʼalal «coʼol» chij-abtejutik ta cholmantal xchiʼuk li kermanotaktike, mas to chlekub ti kʼuyelan xkil jbatik xchiʼukike (Filip. 1:27). ¿Jayvoʼ xa ermanoetik achiʼinoj ta cholmantal li ta agrupoe? ¿Kʼu yuʼun mu xavakʼ persa yojtikinel skotolik xchiʼuk ti xalokʼ ta cholmantal xchiʼukike? (2 Cor. 6:13.) Jech xtok, xuʼ xavikʼ ta veʼel ermanoetik li ta agrupoe o jaʼo kʼalal ch-echʼ avuʼun li Akʼobal sventa Yichʼel ta Mukʼ Jeova ta Kutsʼ Kalaltike. Oy jlom tsobobbailetike, li ta jujutsop sventa cholmantale tsjel sbaik sventa xikʼik ta veʼel li jvulaʼal ti la sjelubtas mantale. Kʼalal jaʼo staoj chikʼik ta veʼel li jvulaʼale, tstsob sbaik sventa xkux yoʼontonik jlikeluk manchuk mi mu xbat ta veʼel li jvulaʼal ti la sjelubtas mantale.
3. ¿Kʼuxitik xuʼ xkichʼtik koltael ta mantal li ta jujutsop sventa cholmantale?
3 Ti jaʼ xa noʼox chib velta ta xemana tstsob sbaik li tsobobbailetike maʼuk skʼan xal ti jutuk xa noʼox chichʼik koltael yuʼun moletik li jcholmantaletike. Li kʼusi sbainojik li jkʼelvanejetik ta jtsop jcholmantale jaʼ ti spatbeik yoʼonton ta jujuntal li ermanoetike xchiʼuk ti xchapanik ta sventa li cholmantale. Mi muʼyuk to lokʼemot ta cholmantal xchiʼuk li jkʼelvanej avuʼune, ¿kʼu yuʼun mu xavalbe ti chakʼan chalokʼ ta cholmantal xchiʼuke? Xchiʼuk xtok, li jkʼelcholmantale tsvulaʼan jkoj ta u ta sabado o domingo li jujun grupoe. Kʼalal bikʼit noʼox li tsobobbailetike xuʼ van chib velta ta jabil tsvulaʼan. ¿Mi chachʼak van akʼakʼal sventa xalokʼ ta cholmantal kʼalal tsvulaʼan agrupo li jkʼelcholmantale?
4. 1) ¿Kʼuxitik xuʼ xichʼ chapanel li tsobajel sventa cholmantale? 2) ¿Kʼu yuʼun lek ti jnop xkakʼ jnatik sventa te x-echʼ li tsobajel sventa cholmantale?
4 Ti jujutsop xa tstsob sbaik sventa xlokʼik ta cholmantal li ta jujun sabado xchiʼuk domingoe ep sbalil chichʼ tael. Li baʼyel sbalile yuʼun kʼalal oy jayib ti bu xuʼ stsob sbaike xchiʼuk ti koʼoltik noʼox yorail yuʼunike jaʼ mas kʼun xa chaʼiik sventa xkʼotik li ta tsobajel sventa cholmantale xchiʼuk ti xbatik li ta yosilal cholmantale. Yan sbalil xtoke yuʼun jaʼ mas kʼun ta slokʼesel li grupoe xchiʼuk ti xbatik noʼox li ta cholmantale. Jech xtok, li jkʼelvanej ta jtsop jcholmantale jaʼ mas kʼun chaʼi ta skʼelel li grupo ti oy ta sbae. Pe akʼo mi jech, bakʼintike xuʼ van ta jun xa noʼox stsob sba li grupoetike. Mi jmoj chlokʼik ta cholmantal skotol li tsobobbail li ta baʼyel sabado yuʼun li ue o kʼalal mi laj xaʼox li Xchanel Li Jkʼel osil ta toyole jaʼ mas lek mi chʼakal chchotiik li jujun grupoe xchiʼuk kʼalal mu to chichʼ pasel li orasione skʼan me chapaluk xaʼox yuʼun sgrupo li jujun jkʼelvaneje. (Kʼelo li rekuadro «¿Mi xuʼ xavakʼ li anae?».)
5. Akʼo mi muʼyuk xa li Xchanel Livro yuʼun Tsobobbaile, ¿kʼusi xuʼ lek jpat-o koʼontontik?
5 Akʼo mi muʼyuk xa li Xchanel Livro yuʼun Tsobobbaile, li Jeovae chakʼbutik-o li kʼusitik chtun kuʼuntik sventa jpasbetik li kʼusi tskʼan yoʼontone (Heb. 13:20, 21). Yuʼun jaʼ chakʼbutik skotol li kʼusitik chtun kuʼuntike. (Sal. 23:1). Ti oy li jujutsop sventa cholmantale ep bendision chichʼ tael. Jaʼ yuʼun jkʼeltik kʼusi xuʼ jpastik xchiʼuk jvules ta joltik «li bochʼo ep tstsʼune ep tscʼaj» (2 Cor. 9:6).
[Rekuadro ta pajina 6]
¿Mi xuʼ xavakʼ li anae?
Oy junantik tsobobbailetike jmoj chetʼesik li tsobajel sventa cholmantal li ta sabado xchiʼuk domingoe, ta skoj ti muʼyuk snail bu xuʼ xetʼesike. Li tsobajeletik sventa cholmantale jaʼ jun chanubtasel ti te tsakal skʼoplal li kʼusi ch-echʼ ta tsobajele, jaʼ yuʼun jaʼ jun matanal ti te ch-echʼ ta jnatike. ¿Mi xuʼ te x-echʼ ta ana? Akʼo mi lek noʼox sba li anae xuʼ te x-echʼ li tsobajele. Li kʼusi tstsakik ta venta li moletik ta tsobobbaile jaʼ li kʼu snamal li anae xchiʼuk yantik ti jech xkoʼolaj kʼalal tstʼujik toʼox junuk na sventa li Xchanel Livro yuʼun Tsobobbaile. Mi oy ta avoʼonton ti xuʼ te ch-echʼ ta anae jaʼ albo li jkʼelvanej ta jtsop jcholmantal ti bu oyote.