Chchapanutik lek li tsobajeletik sventa cholmantale
1. ¿Kʼusi stu li tsobajeletik sventa cholmantale?
1 Oy jun velta li Jesuse la stsob sba xchiʼuk jayvoʼ yajtsʼaklomtak kʼalal skʼan toʼox stak batel ta cholmantale (Luc. 10:1-11). La svulesbe ta sjol li yajtsʼaklomtak ti mu stukikuk oyike xchiʼuk ti jaʼ chchiʼinatik yuʼun li «Yajval cʼaoj» ti jaʼ li Jeovae. Jech xtok, laj yalbe batel mantaletik sventa chkoltaatik ta spasel li yabtelike xchiʼuk «ta chabchab» la stakan batel. Li tsobajeletik sventa cholmantal avi eke chtun sventa chkichʼtik chanubtasel, patbel koʼontontik xchiʼuk kʼuxi xuʼ lek chapalutik.
2. ¿Kʼu xa sjalil chjalij li tsobajeletik sventa cholmantal li ta yuilal avrile?
2 Li avie chjalij to lajuneb o voʼlajuneb minuto li tsobajeletik sventa cholmantale. Li kʼu sjalil taje, chichʼ chʼakel li grupoetike, chichʼ alel bu to chbat xcholik mantal xchiʼuk chichʼ pasel orasion. Pe li ta yuilal avrile chlik jeluk, jaʼ xa noʼox chjalij voʼob o vukub minuto. Mi laj yichʼ pasel junuk tsobajel sventa cholmantal kʼalal jaʼtik toʼox stsutsel li tsobajel ta tsobobbaile, skʼan me mas jlikel noʼox xichʼ pasel, yuʼun li jcholmantaletike naka to la xchikintaik mantal xchiʼuk xuʼ mas jal xcholik mantal kʼalal mi jlikel noʼox laj yichʼ pasel li tsobajele. Jech xtok, mi slikesojik xaʼox cholmantal li prekursoretik xchiʼuk li jcholmantaletik kʼalal skʼan toʼox li tsobajele jlikel noʼox me chkechanik.
3. ¿Kʼu yelan skʼan chapanel li tsobajeletik sventa cholmantale?
3 Yoʼ stabeik sbalil jcholmantaletik li tsobajeletik sventa cholmantale skʼan xichʼ chapanel lek. Oy ep tsobobbailetik yakʼojik venta ti oy sbalil kʼalal chʼakal tstsob sbaik li jujun grupoe, yuʼun xuʼ mas nopol chkom li bu ch-echʼ li tsobajel sventa cholmantale xchiʼuk li yosilal cholmantale. Mi jech laj yichʼ pasel taje xuʼ me mas kʼun ta kʼelel buchʼutik chchiʼinik ta cholmantal li ermanoetike xchiʼuk li jkʼelvanejetik ta grupo sventa cholmantale xuʼ xkoltaatik sventa skʼelik lek li ermanoetik ti oy ta sbaike. Li moletik ta tsobobbaile tsnopik kʼusi ti mas lek ta stojolal li ermanoetike xchiʼuk tskʼelik lek ti bu chcholik mantale. Kʼalal skʼan toʼox stsuts ta jun uni orasion li tsobajele, skʼan me snaʼojikuk xa bu chbat xcholik mantal xchiʼuk buchʼutik chchiʼinik.
4. Li tsobajeletik sventa cholmantale, ¿kʼu yuʼun toj tsots skʼoplal kʼuchaʼal li yan tsobajeletike?
4 Koʼol tsots skʼoplal kʼuchaʼal li yan tsobajeletik ta tsobobbaile. Li ta tsobajel sventa cholmantale jaʼ noʼox chkʼotik li buchʼutik chlokʼik ta cholmantale, mu skotoluk li ermanoetik ta tsobobbaile. Pe taje maʼuk me skʼan xal ti mu tsotsuk skʼoplal xkiltike o ti mas pekʼel skʼoplal xkiltik kʼuchaʼal li yan tsobajeletike. Yuʼun skotol li tsobajeletike jaʼ jun matanal yakʼojbutik Jeova sventa koʼol akʼo jkʼuxubin jbatik xchiʼuk koʼol akʼo jpastik kʼusi lek (Heb. 10:24, 25). Jaʼ yuʼun skʼan xchapan sbaik lek li buchʼutik chetʼesik li tsobajel sventa xichʼ muyubtael-o li Jeovae xchiʼuk sventa stabeik sbalil li buchʼutik chkʼotik li ta tsobajele. Li buchʼutik chlokʼik ta cholmantale skʼan xakʼik persa xkʼotik li ta tsobajel sventa cholmantale.
Li tsobajeletik sventa cholmantale jechuk me tsots skʼoplal xkiltik kʼuchaʼal li yan tsobajeletike
5. 1) ¿Kʼusitik tspas li jkʼelcholmantal kʼalal chchapan li tsobajeletik sventa cholmantale? 2) ¿Kʼu van yelan skʼan sjelubtasik ermanaetik li tsobajel taje?
5 Kʼuxi xuʼ xchapan sba li buchʼu chetʼese. Sventa xchapan sba lek li buchʼu oy spartee, skʼan xichʼ akʼbel kʼalal jal toʼox skʼan sjelubtase. Li tsobajeletik sventa cholmantal eke jaʼ me jech skʼan xichʼ pasel. Kʼalal jelajtik bu tstsob sbaik li jujun grupoe, jaʼ me oy ta sbaik sjelubtasel tsobajel li jkʼelvanej ta grupo sventa cholmantale xchiʼuk li yajkoltaobbae. Pe kʼalal jmoj chlokʼik ta cholmantal li tsobobbaile, li jkʼelcholmantale ta saʼ buchʼu xuʼ tsjelubtas li tsobajele. Oy junantik jkʼelcholmantale chakʼbe jujulik sprograma li buchʼutik oy ta sbaik sjelubtasel li tsobajel sventa cholmantale xchiʼuk tspakʼ ta tavlero. Ti kʼu yelan chjelav li tsobajele jaʼ me ti kʼu yelan xtojob li buchʼu tsjelubtase, jaʼ yuʼun li jkʼelcholmantale tstʼuj lek li buchʼutik tsjelubtase. Mi oy junantik kʼakʼal ti chʼabal junuk mol, yajkoltaobba mol o junuk ermano ti yichʼoj voʼ ti xtojob lek ta yetʼesel li tsobajele, li jkʼelcholmantale skʼan xalbe junuk ermana ti yichʼoj voʼ ti lek xtojobe. (Kʼelo li jvokʼ ti bu chal: «Kʼalal jaʼ tsjelubtas jun ermana li tsobajel sventa cholmantale».)
6. ¿Kʼu yuʼun skʼan xchapan sba lek li buchʼu tsjelubtas li tsobajel sventa cholmantale?
6 Kʼalal chkichʼtik akʼbel jpartetik li ta Chanob vun sventa Kabteltik yuʼun Dios o li ta Tsobajel sventa Tunelale toj tsots skʼoplal chkiltik xchiʼuk ta jchapan jbatik lek. Yuʼun toj jutuk van ti buchʼutik jaʼ to tsnopik kʼusi chalik kʼalal yakal xa chbatik ta tsobajele. Mi laj kichʼtik albel ti akʼo jelubtastik li tsobajel sventa cholmantale, skʼan me tsotsuk skʼoplal xkiltik ek. Li avi ti mas xa jlikel li tsobajele, tsots me skʼoplal ti jchapan jbatik lek sventa ta yorailuk noʼox stsuts kuʼuntik xchiʼuk ti stabeikuk sbalil li jcholmantaletike. Ti lek ta jchapan jbatike te snitojbe sba skʼoplal ti jnaʼojtikuk xa bu chbat jcholtik mantal kʼalal skʼan toʼox jlikestik li tsobajele.
7. ¿Kʼusitik xuʼ xichʼ albel skʼoplal li ta tsobajel sventa cholmantale?
7 Kʼusitik xuʼ xichʼ albel skʼoplal. Li j-abtel ti tukʼ yoʼontone muʼyuk slokʼesoj voskejo ta sventa li tsobajel ta cholmantale, ta skoj ti jelel ti butik ta jcholtik mantale. Li ta rekuadro «Kʼusitik xuʼ xichʼ albel skʼoplal li ta tsobajel sventa cholmantale» chal jaytosuk kʼusitik stakʼ pasel. Jutuk mu skotoluk velta li ta tsobajel taje chichʼik albel li jcholmantaletik ti akʼo xal sloʼilike. Bakʼintik xtoke, xuʼ xichʼ akʼel ta ilel junuk skʼelobil cholmantal o junuk video ta jw.org ti jtunel sventa cholmantale. Kʼalal chchapan sba li buchʼu tsjelubtas li tsobajele, skʼan me snop kʼusi xuʼ xpatbat-o yoʼontonik xchiʼuk ti jtuneluk yuʼun li buchʼutik chlokʼik ta cholmantale.
Kʼalal chchapan sba li buchʼu chetʼes tsobajele skʼan me snop lek kʼusi xuʼ xpatbat-o yoʼontonik xchiʼuk stabeik sbalil li buchʼu chlokʼik ta cholmantale
8. ¿Kʼusi xuʼ xichʼ albel skʼoplal ta tsobajel sventa cholmantal li ta sabado xchiʼuk domingoe?
8 Li ta jujun sabadoe, jutuk mu skotoluk li jcholmantaletike ta xakʼik li revista ¡Despertad! xchiʼuk Li Jkʼel osil ta toyole. Mi chʼabal ta akʼopik li revistaetike, xuʼ xavakʼbeik li buchʼutik chkʼopojik ta español li ta yosilal cholmantal mi chʼabal buchʼu chabtelan mi junuk tsobobbail ta españole. Pe jaʼ mas lek mi jaʼ noʼox chkakʼtik li vunetik ti oy ta jkʼoptike. Ep li buchʼutik chlokʼik ta cholmantal ta jujun sabadoe mu xuʼ yuʼunik chlokʼik ta yan kʼakʼal, jaʼ yuʼun xuʼ van mu xa xvul lek ta sjolik li skʼelobiltak cholmantal la xchanik li ta akʼobal sventa yichʼel ta mukʼ Jeova ta yutsʼ yalalike. Ta skoj taje, li buchʼu sbainoj yetʼesel li tsobajele lek ti xalbe skʼoplal li skʼelobil cholmantal ti te talem ta Kabteltik sventa Dios ta slajeb pajinae. Li yan kʼusi stakʼ pasel xtoke jaʼ ti xichʼ alel kʼuxi xuʼ jlikes-o jloʼiltik li kʼusitik chkʼotan ta pasel o li kʼusitik tspasik li bu nakalutik sventa xkakʼtik li revistaetike. Xuʼ xichʼ albel skʼoplal xtok kʼusi xuʼ jpastik sventa sut jchaʼvulaʼantik li buchʼu la xchʼamik li revistae. Jech xtok, mi oy te junuk jcholmantal ti yakʼoj xa li revista ta sventa li u taje, xuʼ xichʼ albel ti akʼo yal jlikeluk kʼu yelan ta pasel o akʼo yal kʼusi kʼotem ta pasel yuʼun ta cholmantal ti tspat oʼontonale. Li ta jujun domingo xtoke xuʼ jech xichʼ pasel ta sventa li vunetik ti yakal chichʼ akʼel li ta u taje. Li ta tsobajel sventa cholmantal xtoke xuʼ xichʼ albel skʼoplal kʼuxi ta akʼel li foyetoetik Lekil aʼyejetik yakʼoj Dios xchiʼuk Chikintao kʼusi chal Dios o li livro Chchanubtasvan ti ta kʼusiuk noʼox kʼakʼalil xuʼ chkakʼtike xchiʼuk ti ta jtunestik sventa chkakʼtik-o chanubtasel ta Vivliae.
9. Kʼalal mi yakal tspas junuk kampanya li tsobobbaile, ¿kʼusitik xuʼ xichʼ albel skʼoplal li ta tsobajel sventa cholmantal li ta sabado xchiʼuk domingoe?
9 Kʼalal mi yakal tspas junuk kampanya li tsobobbaile, li ta sabado xchiʼuk domingoe xuʼ xichʼ albel skʼoplal kʼuxi xuʼ jmoj xkakʼtik li revistaetik xchiʼuk li vun sventa takel ta ikʼele o li tratadoe xchiʼuk ti kʼusi xuʼ jpastik mi oy la jtatik junuk krixchano ti oy ta yoʼonton li mantale. Jech xtok xuʼ xkalbetik skʼoplal li kʼusitik lek kʼotemik ta pasel li ta kampanya ti chakʼ ta ilel ti solel tsots skʼoplal li kʼusi yakal ta jpastike.
10, 11. ¿Kʼu yuʼun tsots skʼoplal ti xchapan sbaik ta tsobajel li jcholmantaletike?
10 Kʼuxi xuʼ xchapan sbaik li jcholmantaletik eke. Sventa lek xjelav li tsobajele oy me kʼusi skʼan spasik li jcholmantaletik eke. Mi la xchapan sbaik baʼyel li ta cholmantale xuʼ me xakʼ lek sloʼilik li ta tsobajele, xuʼ jaʼo xchapan sbaik kʼalal chetʼesik li yichʼel ta mukʼ Jeova ta yutsʼ yalalike. Sventa lekuk chapalutike, skʼan me oyuk xa noʼox kuʼuntik li vunetik ti ta jtunestik ta cholmantal kʼalal skʼan toʼox xlik li tsobajele. Vaʼun chijkʼotutik noʼox ta anil li ta yosilal cholmantale.
11 Skʼan me xkakʼtik persa ti sobuk noʼox xijkʼot li ta tsobajel sventa cholmantale, jech kʼuchaʼal ta jpastik ta sventa li yan tsobajeletik ta tsobobbaile. Mi echʼem xa ora lijkʼote, maʼuk noʼox me ta jchʼaytik oʼontonal li ta tsobajele, yuʼun xuʼ me sok kuʼuntik li kʼusi chapanbil xaʼoxe. ¿Kʼuxi taje? Yuʼun li buchʼu tsjelubtas li tsobajele ep kʼusitik tstsak ta venta kʼalal muʼyuk toʼox chchʼak li jcholmantaletike. Jun skʼelobile, mi juteb kʼotik li ta tsobajele, xuʼ van xbat skotolik li ta yosilal cholmantal ti bu muʼyuk to tsutsem yuʼunike. Pe mi nom ti bu chbat xcholik mantale, li buchʼu chʼabal skaroe xuʼ jaʼ chakʼbe batel xchiʼin li buchʼu oy skaroe. Mi chbat xcholik mantal ti bu xibal sbae, xuʼ van chalbe junantik ermanoetik ti te noʼox nopol xcholik mantal ti bu oy ermanaetik sventa chchabiike. Mi oy junuk jcholmantal ti ip noʼox chaʼi sbae, xuʼ van xtakatik batel ta junuk kaye ti bu muʼyuk mas s-eskalerail li naetike o ti mu toj muyebaltikuke. O xuʼ van xalbe li jcholmantaletik ti lek xa xtojobik ti akʼo xchiʼinik batel li buchʼutik achʼik toe. Pe mi echʼem xa ora lijkʼote, li ermanoe xuʼ van tsjel li buchʼutik oy xa xchiʼilik ta cholmantale xchiʼuk tsjel li bu xaʼox snopoj chbatike. Melel onoʼox ti oy bakʼintik ti echʼem xa ora chijkʼot ta skoj ti oy kʼusi tsots skʼoplal chʼay-o koʼontontike. Pe mi yalel jech nopem xkaʼitik spasele, skʼan jnoptik lek mi yuʼun van muʼyuk mas tsots skʼoplal chkaʼitik li tsobajel sventa cholmantale o mi yuʼun van skʼan oy kʼusi jel ta jkuxlejaltik.
12. Mi nopem xkaʼitik ti jun noʼox li buchʼu ta jchiʼintik ta cholmantale, ¿kʼusi van skʼan jpastik?
12 Li jcholmantaletike xuʼ me baʼyel xchap skʼopik sventa xchiʼin sbaik li ta cholmantale o xuʼ smalaik akʼo x-albatik ti buchʼu chchiʼinike. Pe mi nopem xkaʼitik ti jun noʼox li buchʼu ta jchiʼintik ta cholmantale, ¿mi xuʼ van jchiʼintik ta cholmantal yan ermanoetik sventa xkojtikintik mas? (2 Cor. 6:11-13.) ¿Mi xuʼ van jchiʼintik ta cholmantal bakʼintik li buchʼutik achʼik toe xchiʼuk ti jkoltatik sventa xkʼotik ta lekil jchanubtasvaneje? (1 Cor. 10:24; 1 Tim. 4:13, 15.) Kʼalal jaʼo xyaket li tsobajele, skʼan me jtsʼetan lek jchikintik ta sventa li kʼusitik chkichʼtik albele, jech kʼuchaʼal ta sventa ti bu ta jlikestik li cholmantale. Mi laj xa kichʼtik albel li mantaletike, batik noʼox me li ta yosilal cholmantale xchiʼuk mu me jeltik li kʼusi chapanbil xae.
13. ¿Kʼuxi ta jtabetik sbalil li tsobajeletik sventa cholmantal mi la jpastik li kʼusi oy ta jbatik ta jujun tale?
13 Li yajtsʼaklomtak Jesús ti laj yichʼik takel batel ta cholmantale «xcuxet noʼox yoʼntonic isutic» tal (Luc. 10:17). Ti la stsob sbaik xchiʼuk yajtsʼaklomtak li Jesús kʼalal skʼan toʼox xbatik ta cholmantale jaʼ koltaatik sventa lek kʼusi kʼot ta pasel yuʼunik. Li jtsobajeltik sventa cholmantale jaʼ jech tskoltautik ek. Mi la jpastik li kʼusi oy ta jbatik ta jujun tal li ta tsobajel taje, chtun me sventa chkichʼtik chanubtasel, patbel koʼontontik xchiʼuk chtun sventa lek chapalutik ta xcholel ta «sbejel banamil li Lequil [Aʼyeje]» (Mat. 24:14).