LI JKUXLEJALTIKE
Li kʼusitik xuʼ xichʼ pasel li ta tsobajeletik sventa cholmantale
Li tsobajeletik sventa cholmantale xkoʼolaj kʼuchaʼal li tsobajeletik jujun xemanae. Jaʼ jun matanal yakʼoj Jeova sventa xkakʼtik ta ilel ti jkʼanoj jbatike xchiʼuk sventa jpastik li kʼusitik leke (Ebr 10:24, 25). Li tsobajele jaʼ noʼox skʼan xjalij voʼob o vukub minuto ti te tsakal skʼoplal ti xichʼ chapanel li grupoetike, ti xichʼ alel bu chichʼ cholel mantale xchiʼuk ti xichʼ pasel orasione. Mi jaʼo chichʼ pasel kʼalal naka toʼox nel yan tsobajele, mas jlikel noʼox chjalij. Li buchʼu chetʼes li tsobajel sventa cholmantale skʼan jaʼ xalbe skʼoplal li kʼusi jtunel yuʼunik li buchʼutik chlokʼik ta cholmantale. Jech kʼuchaʼal liʼe, li ta jujun savado kʼalal jaʼo ep ermanoetik chlokʼik ta cholmantale, sta-o ti jaʼ xichʼ vulesel ta joltik ti kʼutik yelan xuʼ jcholtik mantale. ¿Kʼusitik yan xuʼ xkalbetik skʼoplal?
Xuʼ jtunestik li Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj ti bu chal: «Kʼuxi xuʼ jlikes jloʼiltik».
Kʼuxi xuʼ jlikes-o jloʼiltik li kʼusi jaʼ to kʼot ta pasel o junuk notisiae.
Kʼusi xuʼ jpastik kʼalal oy kʼusi chal jun krixchano ti xuʼ xpaj-o jloʼiltike.
Kʼuxi xuʼ jtakʼbetik jun krixchano ti muʼyuk xchʼunoj mi oy Diose, ti xchʼunoj ti ta kʼunkʼun kʼataj talel li kuxlejale, ti chkʼopoj ta yan kʼope o ti chkʼot ta jun relijion ti muʼyuk mas kaʼiojbetik skʼoplale.
Kʼuxi xuʼ jtunestik li pajina jw.org, li aplikasion JW Library® o li Vivliae.
Kʼuxi xuʼ jtunestik li abtejebaletik sventa xijchanubtasvane.
Kʼuxi xuʼ jcholtik mantal ta telefono, ta karta, ta karrito, kʼuxi xuʼ jpastik revisita o kʼuxi ta akʼel estudio.
Jvules ta joltik kʼuxi xuʼ jchabi jbatik, ti jtsaktik ta venta li kʼusi tsnuptan jun krixchanoe, ti lekuk jtalelaltike, ti xijmuyubajuke xchiʼuk yan kʼusitik.
Jkʼeltik junuk xchanobil o junuk video li ta foyeto Tojobkutik lek ta xchanel vun xchiʼuk ta chanubtasvanej.
Kalbetik skʼoplal kʼuxi xuʼ jpatbetik yoʼonton xchiʼuk kʼuxi xuʼ jkoltatik li jchiʼiltik ta cholmantale.
Jkʼeltik junuk teksto ti chalbe skʼoplal cholmantale o junuk loʼil ti tspat oʼontonale.