Jchanbetik stalelal li Osease
1. ¿Kʼusi xuʼ jakʼbe jbatik?
1 Kʼalal ta jnopbetik skʼoplal li slekil yoʼonton xchiʼuk ti kʼu yelan chkʼuxubinvan li Jeovae xuʼ van xi jakʼbe jbatike: «¿Kʼusi xuʼ jpas ta stojolal Jeova ta sjunul koʼonton akʼo mi chkil jvokol?» (Sal. 103:2-4; 116:12). Li j-alkʼop Osease ta sjunul yoʼonton la spas li kʼusi albat yuʼun Jeovae, manchuk mi laj yil svokol ta skoj taje. ¿Kʼuxi xuʼ jchanbetik li stalelale?
2. ¿Kʼuxi xuʼ jchanbetik stalelal Oseas ti kʼu yelan la xchol mantale?
2 Jcholtik mantal akʼo «me yorail muʼyuc lec chaʼyic». Li mantal laj yal Osease jaʼ sventaik li lajunvokʼ nitilulal ta Israel ti yantik xaʼox xchʼay batel li melel yichʼel ta mukʼ Diose. Li ajvalil Jeroboam II, «toj chopol cʼusi la spas ta [stojolal] li Mucʼul Diose» xchiʼuk ti laj yal mantal ti skʼan ichʼel-o ta mukʼ li chʼiom vakaxetike, ti jaʼ la slikes li Jeroboam I (2 Rey. 14:23, 24). Li ajvaliletik ti ochik ta kʼexolil eke muʼyuk kʼusi la spasik sventa stsatsubik ta mantal li lajunvokʼ nitilulal ta Israele, jech-o lajik ta sjabilal 740 kʼalal maʼuk toʼox jkʼakʼaliltike. Akʼo mi noj ta yichʼel ta mukʼ jecheʼ diosetik li lumetik taje, li Osease tukʼ abtej ta j-alkʼop mas ta 59 jabil. ¿Mi jech van oy lek ta koʼontontik xcholel mantal jujun jabil jech kʼuchaʼal Oseas, akʼo mi mu skʼanik lek mantal li krixchanoetike o ti ta jtatik tajek nutsele? (2 Tim. 4:2.)
3. ¿Kʼuxi vinaj ta xkuxlejal Oseas ti kʼu yelan chkʼuxubinvan li Jeovae?
3 Teuk ta joltik ti kʼu yelan chkʼuxubinvan li Jeovae. Li Jeovae xi laj yalbe li Osease: «Bat icʼo jun jmulavil ants» (Os. 1:2). Laj yil jun xnichʼon xchiʼuk li Gomere, pe laj to yil chaʼvoʼ yalab Gomer ti maʼuk mero xnichʼnab yaʼeluk li Osease. Ti ta sjunul yoʼonton laj yakʼ ta perton yajnil li Osease, jaʼ skʼelobil kʼu to yelan la xkʼuxubin lajunvokʼ nitilulal ta Israel li Jeovae, ti la stoy sbaike xchiʼuk ti la sutes yoʼontonik ta mas tsʼakale (Os. 3:1; Rom. 9:22-26). ¿Mi ta sjunul koʼontontik chkalbetik skotol krixchanoetik ti kʼu yelan chkʼuxubinvan Jeova, akʼo mi chkil jvokoltike? (1 Cor. 9:19-23.)
4. ¿Kʼusi xuʼ jpastik sventa jtojbetik ta vokol Jeova akʼo mi chkil jvokoltik?
4 Oy junantik yajtuneltak Jeovae yiktaoj lekik yabtelik ta skoj ti tskʼanik oyuk mas yorail chcholik mantale. Oy yantike, muʼyuk nupunemik o muʼyuk chil yalab xnichʼnabik li nupultsʼakaletik ta skoj ti tskʼan chakʼbeik yipal chtunik ta stojolal Diose. Kʼalal ta jnoptik ti kʼusi la spas li Osease xuʼ van jnoptik ti mu spas kuʼuntik jeche. Akʼo mi jech, kʼalal ta jnopbetik skʼoplal li slekil yutsil yoʼonton Jeovae xchiʼuk ti ta jpat koʼontontik ti tstsatsubtasutik li xchʼul espiritue, xuʼ van stunesutik ti kʼu yelan muʼyuk toʼox jech jnopojtike, jech kʼuchaʼal tunesat li Osease (Mat. 19:26; Filip. 2:13).