Oy chaʼkuxesel ta skoj ti laj kichʼtik pojele

Li Snaʼobil slajel Kristoe chakʼ akʼo jnoptik ta sventa li kʼusitik lekik ta jtatik ta tsʼakal koliyal ti laj kichʼtik pojele. Jtos taje jaʼ li chaʼkuxesele. Li Jeovae mu onoʼox skʼan ti xijchamutike. Jaʼ yuʼun, li kʼusi toj kʼux chaʼi li jun krixchanoe jaʼo kʼalal chcham yutsʼ yalal ti skʼanoj tajeke (1Ko 15:26). Li Jesuse chopol tajek laj yil kʼalal okʼ yajtakboltak ta skoj ti cham li Lazaroe (Jn 11:33-35). Ta skoj ti xkoʼolaj tajek kʼuchaʼal Stot li Jesuse, jnaʼojtik ti chopol tajek chil Jeova ti chij-okʼ kʼalal chcham li buchʼu jkʼanojtik tajeke (Jn 14:7). Li Jeovae oy tajek ta yoʼonton ti xchaʼkuxes li tukʼil yajtuneltake xchiʼuk jaʼ jech ta jkʼantik ti xchaʼkuxiik eke (Job 14:14, 15).

Ta skoj ti lek xchapet kʼusi tspas li Jeovae, xuʼ jnoptik ti jech tspas ta sventa li chaʼkuxesel eke (1Ko 14:33, 40). Muʼyuk xa buchʼu chcham kuʼuntik, yuʼun jaʼ xa noʼox ta jchʼamtik li buchʼutik chchaʼkuxiike. Kʼalal oy buchʼu chchame, ¿mi oy anopojbe skʼoplal ta sventa li spatobil oʼontonale? (2Ko 4:17, 18). ¿Mi ta van xa tojbe ta vokol Jeova ta skoj ti yakʼojbutik jun matanal ta sventa li chaʼkuxesele xchiʼuk ti chalbutik Vivlia ti chchaʼkuxiik talel li buchʼutik chamemike? (Kol 3:15).

• ¿Buchʼu van junukal avutsʼ avalal o avamigo ti chakʼan chakʼel yan veltae?

• Li krixchanoetik ti chalbe skʼoplal ta Vivliae, ¿buchʼu chakʼan chavojtikin xchiʼuk ti chaloʼilaj xchiʼuke?