«Baʼyel bat lajesbo yoʼonton li avermanoe»

Nopo noʼox ti te nakalot ta Galilea li ta skʼakʼalil Jesuse. Nat laxanav batel yoʼ xakʼot ta Jerusalen sventa xapas li kʼin Yaxnaetike. Oy yantik yajtsʼaklomtak Kristo ti ta yan lum bu likemik talele, solel noj tajek li jteklume. Vaʼun chakʼan chavakʼbe jun matanal li Jeovae, jaʼ yuʼun chanopaj batel li ta templo yoʼ xavakʼ li jkot tentsun ti avichʼoj batele. Kʼalal te xa ox oyote chavakʼ venta ti noj ta epal krixchanoetik li yut temploe, yuʼun tskʼan chakʼik ek li matanale. Pe kʼalal jaʼo xa yorail chavakʼbe tentsun li paleetike, jaʼo chvul ta ajol ti oy akʼop xchiʼuk jun ermano ti xuʼ van te oy li ta temploe o li ta jteklume. Li Jesuse chalbe smelolal li kʼusi skʼan xapase (kʼelo Mateo 5:24). ¿Kʼusi van skʼan xapasik xchiʼuk li ermano ti oy akʼop achiʼuk sventa xachʼunbeik smantal Jesus xchiʼuk ti junuk noʼox avoʼontonike? Paso markar ti bu junukal li stakʼobil ti te talem ta rekuadroetike.

LI KʼUSI SKʼAN XAPASE

• Chiʼino ta loʼil li ermano mi anaʼoj ti oy lek srasonal ti chopol chaʼi sbae.

• Albo ti muʼyuk lek ti toj bikʼit yoʼontone xchiʼuk ti oy smul jutuk eke.

• Chikintao lek li kʼusi chalbote, akʼo mi mu xavaʼibe smelolal skotol li kʼusi chale mu me kʼusi chopolik xavalbe sutel xchiʼuk ta sjunuluk avoʼonton xakʼanbe perton.

LI KʼUSI SKʼAN SPAS LI ERMANOE

• Chalbe yan ermanoetik ta tsobobbail li kʼusi la apasbe sventa snopik ti muʼyuk smul li stuke.

• Chalbot ta asat li kʼusi kʼot ta pasele, xcholet chalbot li kʼusi la apasbee xchiʼuk tskʼan ti xaval ti voʼot ta amule.

• Bikʼituk xavakʼ aba, oyuk stsatsal avoʼonton sventa xbat achiʼin ta loʼil xchiʼuk skʼan ta sjunul avoʼonton xavakʼbe perton.

Akʼo mi muʼyuk xa chkakʼtik matanaletik sventa chkichʼtik-o ta mukʼ li Diose, ¿kʼuxi te stsakojbe sba skʼoplal li ichʼel ta mukʼ ti chchʼam li Diose xchiʼuk ti skʼan junuk koʼontontik xchiʼuk li kermanotaktike?