Ti bu laj yichʼ lokʼesel li stakʼobiltak li ta Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj
5-11 YUʼUN AGOSTO
KʼUSITIK KʼUPIL SBA TA VIVLIA | 2 TIMOTEO 1-4
«Li Diose maʼuk chakʼbutik chʼul espiritu sventa xiʼel»
Kerem-tseb, akʼo ta ilel ti cha chʼi ta mantale
9 Sventa skolta Timoteo li Pabloe, xi la svulesbe ta sjol ta mas tsʼakale: «Laj to cʼop maʼ ti ta xacʼ xiʼel ta coʼntontic maʼ ti Diose, yuʼun ti Diose ta xacʼ yip stsatsal coʼntontic, syail xcʼuxul coʼntontic, lec snopbenal» (2Ti 1:7, Ch). Ti «lec snopbenal», xie, jaʼ skʼan xal ti oy lek jpʼijiltik kʼalal ta jnoptike. Li talelalil taje jaʼ me tskoltaot ti lek chʼiemukot ta mantal sventa stsal avuʼun li vokoliletik cha nuptan ta akuxlejale, manchuk mi toj tsotsik. Kʼux ta alel, pe ep kerem-tsebetike muʼyuk bu yijubem li snopbenike xchiʼuk chʼabal stsatsal yoʼontonik ta stsalel li vokoliletik taje, jaʼ yuʼun tskʼan chjatavik ta stojolal. Ti kʼusi tspasike jaʼ ti te puchʼul ta stemik ch-echʼ kʼakʼale, ti puro kʼel television tspasike, tslajesik droga, chuchʼik pox, chbatik ta kʼinetik o chmulivajik. Pe li yajtsʼaklomutik Cristoe chi j-albat «ti acʼo jcomtsantic cʼusi chopole xchiʼuc li scʼupinel cʼusitic sventa banamile, yuʼun jech lec xa cʼusitic ta jpastic batel; tucʼ cʼusitic chlic jpastic, xchiʼuc jaʼ xa noʼox chquichʼtic o batel ta mucʼ li Diose» (Tit 2:12).
Tsotsuk avoʼonton xchiʼuk mu xaxiʼ
7 Xi la stsʼibabe batel Timoteo li Pabloe: «Li Diose maʼuk chakʼbutik chʼul espiritu sventa xiʼel, moʼoj, yuʼun chakʼ juʼelal [...]. Jech oxal, mu me xakʼexav ta xcholbel skʼoplal li Kajvaltike» (2Ti 1:7, 8; Mr 8:38). Kʼalal ta jkʼeltik li jaypʼel kʼop taje, lek ti xi jakʼbe jbatike: «¿Mi chikʼexav ta skoj li kʼusi jchʼunoj ta jrelijione o mi tsots koʼonton? ¿Mi chkalbe jchiʼiltak ta abtel o ta chanob vun ti stestigoun Jeovae o mi ta jmuk? ¿Mi chopol chkaʼi jba ti jelelun ta stojolal li yantike o mi jaʼ jun mukʼta matanal chkil ti chakʼik venta ti lek chkil jba xchiʼuk Diose?». Mi oy buchʼu chiʼ jutuk ta xcholel li lekil aʼyeje o ti mu skʼan xakʼ sba ta ojtikinel ta stojolal krixchanoetike, akʼo svules ta sjol li kʼusi albat yuʼun Jeova li Josuee: «Chacalbot ti acʼo oyuc lec stsatsal avoʼntone, mu me xaxiʼ». Mu me xchʼay ta joltik ti kʼusi mas tsots skʼoplale jaʼ ti kʼusi tsnop Jeova xchiʼuk Jesukristo ta jtojolaltike, maʼuk li kʼusi tsnop jchiʼiltaktik ta abtel o ta chanob vune (Gal 1:10).
Jsaʼtik lek li kʼusitik kʼupil sba ta Vivliae
Jsaʼtik li melel kʼulejale
13 Yan buchʼu laj yakʼ ta ilel ti oy xchʼunel yoʼontone jaʼ li Timoteoe. Li Pabloe laj yal ti Timoteoe jaʼ jun ‹lekil yajsoltaro Kristo Jesus›. Xi laj yalbe ta tsʼakale: «Skotol li buchʼu chtun ta soltaroe muʼyuk tstikʼ sba [li ta pʼolmajel ta jpas ta jkuxlejaltike], sventa lek ch-ilat yuʼun li buchʼu chapanat ta soltaroale» (2Ti 2:3, 4). Skotol li yajtsʼaklomtak Jesus avi eke, chakʼik persa ta yakʼel ta xkuxlejalik li beiltasel taje, ti te tsakal skʼoplalik li mas ta jun miyon ermanoetik xchiʼuk ermanaetik ti chtunik ta tsʼakal orae. Li yajtsʼaklomtak Kristoe chakʼ yipalik sventa mu stsalatik yuʼun li kʼusitik oy ta sba balumile xchiʼuk li kʼusitik chichʼ pukbel skʼoplal ta vunetik, ta television, ta Internet xchiʼuk ta yan kʼusitike. Tsvules ta sjolik xtok ti «jqʼuextaqʼuinetique mozoinbilic chcʼot yuʼun [li] bochʼo chacʼ ta qʼuexel staqʼuine» (Pr 22:7). Mi la smosoinutik li pʼolmajel ta balumile, jecheʼ noʼox ta jchʼay jkʼakʼaltik xchiʼuk kipaltik; taje jaʼ li kʼusi oy ta yoʼonton Satanase. Li jlome solel ep chchʼamunik takʼin sventa tsman jpʼejuk snaik, jkotuk skaroik, sventa xchanunajik ta universidad o sventa spasik mukʼta kʼin kʼalal chnupunike. Mi muʼyuk lijtojob lek ta snopel li kʼusitik ta jpastike, xuʼ me ta jtikʼ jbatik ta ilil ti mu noʼox xtoj ta jayibuk jabile. Pe mi ‹pʼij ti kʼu yelan ta jpas jbatike›, lek noʼox sba li jkuxlejaltike, muʼyuk mas ta jkʼextik takʼin xchiʼuk muʼyuk mas ta jlajes jtakʼintik. Mi jech ta jpastike, maʼuk me tsmosoinutik li pʼolmajeletik ta balumile xchiʼuk kolemutik sventa xijtun ta stojolal Dios (1Ti 6:10).
Li yajtuneltak Jeovae ta xiktaik li kʼusitik muʼyuk tukʼe
10 Li avie, muʼyuk mas ilbil ta tsobobbail ti buchʼutik tsvalopatinik li mantale. Jaʼ yuʼun chaʼa, kʼalal mi la jnuptantik chanubtaseletik ti muʼyuk jech chal Vivliae, skʼan me jpʼel koʼontontik jpʼajtik, mu ventauk bu xlik talel. Muʼyuk me lek mi ta jtsal jbatik xchiʼuk li buchʼutik svalopatinojik li mantale, mi jaʼuk kʼalal ta jkʼopontike, ta Internet xchiʼuk ta yan kʼusitik. Akʼo mi oy ta koʼontontik skoltael li krixchanoe, kʼalal ta jchiʼintik ta loʼil li krixchanoetik taje muʼyuk jech chal Vivlia jech kʼuchaʼal laj xa jchantike. Li yajtunelutik Jeovae muʼyuk me ta jchiʼintik li buchʼutik svalopatinojik mantale, jech, yuʼun ta xkiktatik li kʼusitik muʼyuk tukʼe.
12-18 YUʼUN AGOSTO
KʼUSITIK KʼUPIL SBA TA VIVLIA | TITO 1- FILEMON
«Kʼalal chichʼ biiltasel li moletik ta tsobobbaile»
w14 15/11 paj. 28 par. 5-paj. 29 par. 2
Li kʼusitik tsjakʼ jkʼelvunetike
Akʼo mi muʼyuk bu lek xchapet chalbe smelolal Vivlia ti kʼu yelan laj yichʼik biiltasel li ta voʼnee, pe xuʼ jnaʼtik jlomuk kʼuxi la spasik. Yuʼun jnaʼojtik ti kʼalal sutik talel ta baʼyel xanbal ta misioneroal li Pablo xchiʼuk Bernabee «la stʼujic jcholcʼopetic yuʼunic [o moletik] ta jujun nail tsobobbail. Laj yictaic ixim; la scʼopanic Dios. Li bochʼo la stʼujique laj yaqʼuic ta scʼob li Cajvaltic ti yichʼojic ta muqʼue» (Ech 14:23). Kʼalal echʼ xaʼox jayibuk jabile, xi laj yalbe li xchiʼil ta xanbal ti jaʼ li Titoe: «Ti te la jcomtsanot ta Creta banamile, jaʼ avabtel acʼo achapan li cʼusi scʼan chapanele, xchiʼuc ti acʼo atʼuj jcholcʼopetic yuʼun jchʼunolajeletic ta jujun lume. Jaʼ jech li mantal laj calbot comele» (Tito 1:5). Yaʼeluke jaʼ jech laj yichʼ yabtel ek li Timoteo ti jaʼ li buchʼu jal tajek la xchiʼin ta xanbal li jtakbol Pabloe (1Ti 5:22). Jamal lek xvinaj ti jaʼ biiltasvan li jkʼelvanejetike, maʼuk biiltasvanik li jtakboletik xchiʼuk li moletik ta Jerusalene.
Ta skoj ti jnaʼojtik xa kʼusi laj yichʼ pasel ta voʼone jech kʼuchaʼal chal Vivliae, li Jtsop Jbeiltasvanej yuʼun Stestigotak Jeovae laj xa sjel ti kʼu yelan chichʼ biiltasel li moletik xchiʼuk li yajkoltaobbatake. Lik xa onoʼox tal ta 1 yuʼun septiembre ta 2014 ti xi chichʼik biiltasel li moletik xchiʼuk li yajkoltaobbatake: li jujun jkʼelvanej ta sirkuitoe jaʼ tskʼel li buchʼutik laj yichʼ alel ti xuʼ xa xichʼik biiltasel li ta sirkuitoe. Kʼalal jaʼo tsvulaʼan li tsobobbailetike jaʼ te chojtikin li buchʼutik laj yichʼ alel ti xuʼ xa xichʼik biiltasele, chakʼ persa ti xchiʼin ta cholmantal bu kʼalal xuʼ yuʼune. Kʼalal mi laj xaʼox skʼel li kʼusi laj yal moletik te ta tsobobbaile, li jujun jkʼelvanej ta sirkuitoe jaʼ xa me oy ta sba sventa tsbiiltas moletik xchiʼuk yajkoltaobba li ta tsobobbailetik bu tskʼele. Kʼalal jech chichʼ pasele jaʼ xkoʼolaj kʼuchaʼal laj yichʼ pasel ta baʼyel sigloe.
¿Buchʼutik te tsakal skʼoplal kʼalal oy buchʼu chichʼ biiltasele? Jech onoʼox kʼuchaʼal spasoj talel li «jʼabtel ti jun [«tukʼ», TNM] yoʼnton [...], ti lec bije» jaʼo oy-o ta sba smakʼlinel li xchiʼiltak ta abtele (Mt 24:45-47). Taje te tsakal skʼoplal li sabel smelolal kʼusi chal Vivlia ti jaʼ chkoltavan li chʼul espiritu sventa tsbeiltasutik kʼuxi xuʼ xkakʼ ta jkuxlejaltik li beiltaseletik ta Vivliae, yuʼun jaʼ te chvinaj ti kʼu yelan lek chapal ta spʼejel Balumil li tsobobbaile. Li j-abtel ti tukʼ yoʼonton xtoke tsbiiltas jkʼelvanejetik ta sirkuito xchiʼuk Komiteetik sventa Betel. Li jujun Betel ek une jaʼ chkoltavan sventa xichʼ pasel li mantaletik laj yichʼ alele. Yan li jujutsop moletike jaʼ oy ta sbaik sventa tskʼelik lek li kʼusi chal Vivlia ta sventa li buchʼu tskʼanik akʼo xichʼ biiltasel ta stsobobbail Diose. Li jujun jkʼelvanej ta sirkuitoe tsots me kʼusi sbainoj ta spasel, tspas orasion sventa tskʼel lek li kʼusi laj yal moletike, vaʼun tsbiiltas li viniketik ti lek xa xichʼik biiltasele.
Jsaʼtik lek li kʼusitik kʼupil sba ta Vivliae
w89 15/5 paj. 31 par. 5
Li kʼusitik tsjakʼ jkʼelvunetike
Ta melel maʼuk skʼan xal ti yuʼun jmoj sjolik xchiʼuk li buchʼutik chchopol kʼoptaik yantik ta skoj stsʼunbalik o slumalik ti te tsakal skʼoplal li jkretaetike. Jpʼel koʼonton jchʼunojtik maʼ taje, yuʼun li Pabloe snaʼoj ti oy lekil yajtsʼaklomtak Kristo li ta Kretae, ti lek ch-ilatik yuʼun Dios xchiʼuk ti tʼujatik ta xchʼul espiritue (Ech 2:5, 11, 33). Oy ep yajtsʼaklomtak Kristo ti yichʼojik ta mukʼ Dios sventa tslikesik tsobobbailetik ta «jujun jteklum». Akʼo mi jmulavil krixchanoetik li yajtsʼaklomtak Kristo taje, xuʼ jchʼuntik ti maʼuk jutkʼopetike o ti mu x-echʼ yoʼontonik ta veʼele; yuʼun muʼyuk xa bu lek ilatik yuʼun Dios ti jechuke (Flp 3:18, 19; Ap 21:8). Jech kʼuchaʼal oy lekil krixchanoetik li ta jteklumetik avie, yikʼaluk van jech toʼox ek li ta Kretae, ti chat yoʼontonik ta skoj li xchopol talelal yantike xchiʼuk ti oy ta yoʼontonik chchʼunik li lekil aʼyejetike (Eze 9:4; koʼoltaso xchiʼuk Ech 13:48).
Li kʼusi mas tsotsik skʼoplal ta kartaetik sventa Tito, Filemón xchiʼuk sventa Hebreos
15, 16. ¿Kʼu yuʼun muʼyuk laj yalbe Filemón li Pablo ti akʼo skolta lokʼel li Onesimoe? Yuʼun li Pabloe jaʼ oy ta yoʼonton «xchol[el] cʼu xʼelan chventainvan li Diose, xchiʼuc ichanubtasvan lec ta sventa li Cajvaltic Jesucristoe». Jaʼ yuʼun la snop ti muʼyuk tstikʼ sba ta kʼusitik sventa kuxlejale, jech kʼuchaʼal ta sventa li mosoile (Ech 28:31).
19-25 YUʼUN AGOSTO
KʼUSITIK KʼUPIL SBA TA VIVLIA | EVREOS 1-3
«Jkʼantik li tukʼilale xchiʼuk jaʼ jpʼajtik li choplejale»
¡Kalbetik skʼoplal li Cristoe, li yan sba yutsil Ajvalile!
8 Li ta 1914, li Jeovae la svaʼan ta Ajvalilal yuʼun Mesías li Xnichʼone. «Li [xvaxton] [yi]chʼoje jaʼ sventa tuqʼuil chapanel», jaʼ yuʼun melel onoʼox ti tukʼ chchapanvane xchiʼuk ti muʼyuk tstʼuj krixchanoetik li ta Ajvalilal tspase. Tukʼ ti kʼu yelan ch-ajvalilaje, yuʼun jaʼ «Mucʼul ajvalil», jaʼ xkaltik, ti jaʼ la stʼuj stuk Jeova sventa xkʼot ta Ajvalile. Jech xtok, li Ajvalilal tspas Jesuse «jaʼ sventa sbatel osil». ¿Mi mu tspatuk avoʼonton ti chatun ta stojolal Jeova ti jaʼ chventainvan li Ajvalil ti tsots sjuʼel ti jaʼ yakʼoj stuke?
¡Kalbetik skʼoplal li Cristoe, li yan sba yutsil Ajvalile!
7 Kʼelo Salmo 45:6, 7. Ta skoj ti skʼanoj tajek tukʼilal li Jesuse xchiʼuk ti spʼajoj tajek skotol li kʼusitik chikʼubtasbe sbi li Stote, li Jeovae la stʼuj kʼuchaʼal Ajvalil li ta Ajvalilal yuʼun Mesiase. Laj yakʼbe ep «xcuxetel» yoʼonton ta aseite kʼalal la stʼuj li Jeovae, ti jaʼ mu sta jech kʼuchaʼal li yantik xchiʼiltake, jaʼ xkaltik, li ajvaliletik ta Judá ti jaʼ snitilultak Davide. ¿Kʼuxi ti jelel laj yichʼ tʼujel li Jesuse? Ta slikebale, jaʼ Jeova li buchʼu la stʼuje; maʼuk noʼox la stʼuj sventa chkʼot ta Ajvalil, moʼoj, yuʼun jaʼ sventa chkʼot ta Mero Bankilal Pale xtok (Sl 2:2; Evr 5:5, 6). Ta yan xtoke, li Jesuse muʼyuk laj yichʼ malbel aseite ta sjol kʼalal laj yichʼ tʼujele, yuʼun laj yichʼ tʼujel ta chʼul espiritu xchiʼuk maʼuk liʼ ta Balumil ch-ajvalilaje, moʼoj, yuʼun jaʼ te ch-ajvalilaj ta vinajel.
Jsaʼtik lek li kʼusitik kʼupil sba ta Vivliae
it-1 paj. 1211 par. 4
Lokʼol
¿Mi jech onoʼox laj yakʼ ta ilel Jesus ti xkoʼolajik xchiʼuk li Totile?
Li baʼyel Xnichʼon Diose, ti Jesus laj yichʼ ojtikinel ta tsʼakale, jaʼ slokʼol li Stote (2Ko 4:4). Ta skoj ti jaʼ onoʼox chalbe skʼoplal Nichʼonil kʼalal xi laj yal li Diose: «Jpastic cristiano jech chac cʼu chaʼal vuʼutic», ti kʼuxi laj yichʼ pasel ta slikebal li Jesuse jaʼ onoʼox jech xkoʼolaj kʼuchaʼal li Stote (Gé 1:26; Jn 1:1-3; Kol 1:15, 16). Kʼalal ay ta balumil kʼuchaʼal tukʼil krixchanoe, jaʼ jech laj yakʼ ta ilel stalelal kʼuchaʼal Stot ti bu kʼalal pas yuʼun kʼuchaʼal jun krixchanoe, jaʼ yuʼun xi laj yale: «Yiloj xa Totil ek li buchʼu yilojune» (Jn 14:9; 5:17, 19, 30, 36; 8:28, 38, 42). Akʼo mi jech, ti jech koʼol sba kʼuchaʼal Diose, mas to jamal vinaj kʼalal laj yichʼ chaʼkuxesel ta vinajele xchiʼuk ti akʼbat sventain «skotol li kʼusitik ta vinajel xchiʼuk ta sba [balumil]» yuʼun li Jeovae, li Stote (1Pe 3:18; Mt 28:18). Ta skoj ti «toybat yabtel yuʼun» Dios li Jesuse, mas to ep laj yakʼ ta ilel smukʼulal Stot kʼalal chaʼmuy batele, ti jaʼ mu sta kʼalal muʼyuk toʼox bu yalem talel ta balumile (Flp 2:9; Evr 2:9). Li avie «jaʼ skʼelobil lek ti kʼu yelan li Diose» (Evr 1:2-4).
it-1 paj. 478 par. 2
Vinajel
Li kʼusi chal Salmo 102:25, 26 jaʼ chalbe skʼoplal li Jeova Diose, pe li jtakbol Pabloe la stunes sventa chalbe skʼoplal li Jesukristoe. Li srasonale jaʼ liʼe: li jun noʼox Xnichʼon Diose jaʼ li Buchʼu la stunes Dios sventa tspas li vinajel ti xkiltike. Li Pabloe tskoʼoltas ti kʼu sjalil kuxul li Nichʼonil xchiʼuk li kʼusitik pasbile, ti xuʼ chpix li Dios jech kʼuchaʼal chpixvan jlik natil kʼuʼile xchiʼuk ti xuʼ slokʼes mi jech tskʼan yoʼontone (Evr 1:1, 2, 8, 10-12; koʼoltaso xchiʼuk 1Pe 2:3, tsʼib ta yok vun).
26 YUʼUN AGOSTO-1 YUʼUN SEPTIEMBRE
KʼUSITIK KʼUPIL SBA TA VIVLIA | EVREOS 4-6
«Kakʼtik persa sventa xij-och li ta kuxob oʼontonal yuʼun Diose»
¿Kʼusi jaʼ li kux oʼonton xchiʼuk Diose?
3 Oy chib srasonal ti xuʼ xkaltik ti yakal-o svukubal kʼakʼal li ta baʼyel sigloe. Li baʼyele te ta jtatik kʼalal la stakʼbe Jesús li buchʼutik laj yalik ti mu xichʼ ta mukʼ sabadoe. Li kʼusi chal yajkontratak Jesuse jaʼ ti kʼalal poxtavan ta skʼelobil juʼelale xkoʼolaj la kʼuchaʼal ti ch-abteje. Pe li ta Mantal i-akʼbat Moisese chal ti mu stakʼ x-abtejik li ta sabadoe. Xi laj stakʼ li Jesuse: «Li Jtote ta to xʼabtej. Jech ta xiʼabtej ec li vuʼune» (Jn 5:16, 17). Sventa tspoj-o sba li Jesuse xi jamal laj yale: «Li Jtote ta to xʼabtej». Xkoʼolaj ti xi laj yal yaʼeluke: «Jech-o jpasojkutik talel kabtelkutik li Jtot xchiʼuk voʼone. Jech-o ch-abtej talel li ta sabado yuʼune, ti oy xa jayibuk smilal jabil i-echʼe, jech oxal, ¿mi chopol van ti chi-abtej li ta sabado eke?». Vaʼun, li kʼusi laj yakʼ ta aʼiel Jesús ta sventa li Balumil li vaʼ kʼakʼal taje, jaʼ ti yokel-o chkux yoʼonton Diose, ti muʼyuk to tsutsem li svukubal kʼakʼale.
4 Li xchibal srasonale te ta jtabetik smelolal kʼalal i-akʼbat snaʼ yuʼun Dios li Pabloe. Kʼalal jaʼo yakal chalbe smelolal sventa li kuxob oʼonton yuʼun Diose xchiʼuk kʼalal muʼyuk toʼox chalbe smelolal li Génesis 2:2, xi la stsʼiba li jtakbole: «Yan li vuʼutic ti laj xa jchʼuntique, chijʼochutic ti bu ta jcux coʼntontique» (Evr 4:3, 4, 6, 9). Li kʼusi laj yichʼ alele jamal chakʼ ta ilel li kuxob oʼontonale muʼyuk toʼox bu tsutsem skʼoplal li vaʼ kʼakʼaletik taje. Vaʼun, ¿kʼu to sjalil chichʼ batel li kuxob oʼontonal taje?
5 Sventa xuʼ jnaʼtik kʼusi ora stsuts skʼoplal li svukubal kʼakʼale, skʼan jnaʼtik kʼu yuʼun la slikes talel li Diose. Li Jeovae xi jamal chalbutik ta Génesis 2:3: «Laj yacʼbe bendición li svucubal cʼacʼale, yuʼun jaʼ jun cʼacʼal ti vocʼbil yuʼune». Li kʼakʼal taje la svokʼ o la xchʼak Jeova yoʼ tspas li kʼusi tskʼan yoʼonton ta sventa li Balumile. ¿Kʼusi ox ti tskʼan tspase? Tskʼan ox tsnojes ta krixchanoetik ti jchʼunej mantaletik sventa xchabiik lek li Balumile xchiʼuk li chonbolometike (Gé 1:28). Taje jech «ta to xʼabtej[ik]» li Jeova xchiʼuk li Jesucristoe, ti jaʼ «yajval[...] li scʼacʼalil ta jcux coʼntonti[k]» xi li Vivliae (Mt 12:8). Li svukubal kʼakʼale jaʼ to tstsuts mi ipas li kʼusi oy onoʼox ta yoʼonton tskʼan tspas Dios ta sventa li Balumile. ¿Kʼusi ora chkʼot ta pasel taje? Jaʼo mi tsuts li Ajvalilal ta Jmil Jabil yuʼun Cristoe.
¿Kʼusi jaʼ li kux oʼonton xchiʼuk Diose?
6 Li Jeovae lek laj yalbe smelolal Adán xchiʼuk Eva li kʼusi tskʼan tspase, pe li stukike muʼyuk bu la skʼan la skolta sbaik. Li buchʼu baʼyel la stoy sbaike jaʼ li Adán xchiʼuk Evae, ta skoj taje ta smiyonal noʼox krixchanoetik jech tspasik ek. Jaʼ jech la spas li voʼne jteklum Israele, ti jaʼ toʼox li tʼujbil jteklume. Ta jelavele, li jtakbol Pabloe la spʼijubtas li baʼyel yajtsʼaklomtak Cristo ti xuʼ jech xkʼot ta stojolalik eke. Xi la stsʼiba batele: «Jaʼ yuʼun oyuc ta coʼntontic chijʼoch ti bu scʼoplal ta jcux coʼntontique. Yuʼun jech muʼyuc bochʼo chcʼot ta stojol cuʼuntic jech chac cʼu chaʼal icʼot ta stojol li jbajmantaletique» (Evr 4:11). Kakʼtik venta ti chal ti ta skoj li pʼajmantale mu xij-och li ta kux oʼonton xchiʼuk Diose. Li mantal liʼe tspʼijubtasutik. ¿Kʼusi xuʼ chkʼot ta pasel mi jtoy jbatik sventa li kʼusi tskʼan tspas Diose? ¿Mi xibal van sba sventa mu xij-och li ta kuxob oʼontonal yuʼun li Jeovae? Ta melel toj tsots skʼoplal tskʼan jnabetik stakʼobil li sjakʼobiltake. Ta xkalbetik mas skʼoplal li ta xchanobil liʼe. Pe baʼyele ta jkʼeltik batel kʼusi chopol la spasik li j-israeletike xchiʼuk ti kʼu yuʼun muʼyuk bu ochik li ta kux oʼontonal yuʼun Diose.
¿Kʼusi jaʼ li kux oʼonton xchiʼuk Diose?
16 Li avie mu xa junuk buchʼu chkaltik ti persa to ta jchʼuntik jlomuk li Mantaletik i-akʼbat Moisés sventa xijkolutike. Li ta skarta la stakbe batel j-efesoetik li Pabloe lek jamal chalbutik: «Yuʼun ta yutsil noʼox yoʼnton ti colemoxuc xa ta sventa xchʼunojel avoʼntonique. Muc ta aventauc atuquic ti laj ataic coltaele, jaʼ amotonic noʼox yuʼun li Diose. Muc ta sventauc cabteltic, yuʼun jech muʼyuc bochʼo xuʼ tstoy sba» (Ef 2:8, 9). Vaʼun chaʼa, ¿kʼusi skʼan jpastik mi ta jkʼan chij-och li ta kuxob oʼonton xchiʼuk Diose? Jvules ta joltik ti oy lek srasonal ti kʼu yuʼun la xchʼak li svukubal kʼakʼale o li skʼakʼalil chkux yoʼontone. Li kʼakʼal taje la svokʼ o la xchʼak yoʼ tspas li kʼusi tskʼan yoʼonton ta sventa li Balumile. Jech oxal sventa chij-och ta kux oʼonton xchiʼuk li Diose skʼan jchʼunbetik li smantaltake xchiʼuk skʼan jmojuk xij-abtej xchiʼuk li s-organisasione.
17 Skʼan mu jbikʼtajesbetik skʼoplal li mantaletik ta Vivlia ti chakʼbutik li j-abtel ti tukʼ yoʼontone, mi jaʼuk xkakʼ jbatik ta beiltasel ta jnopben jtuktik. Mi la jkontraintik li kʼusi tskʼan tspas Diose, xuʼ mu xa lekuk chilutik li Jeovae. Li ta xchanobil xtale, ta jkʼeltik kʼusitik xuʼ chkʼot ta pasel ti butik xuʼ xkakʼtik ta ilel mi ta jchʼuntik mantale xchiʼuk ta jchantik xtok kʼuxi xkakʼtik ta ilel ti ochemutik xa li ta kuxob oʼonton xchiʼuk Diose.
Jsaʼtik lek li kʼusitik kʼupil sba ta Vivliae
Li kʼusitik tsjakʼ jkʼelvunetike
Li ta Evreos 4:12 xi chale: «Kuxul li skʼop Diose [xchiʼuk] oy sjuʼel», ¿kʼusi smelolal taje?
▪ Kʼalal ta jkʼeltik li kʼusi yakal chalbe skʼoplal Pablo kʼalal ‹kuxul li skʼop Diose xchiʼuk ti oy sjuʼel›, xie, jaʼ tskoltautik ta yaʼibel smelolal ti jaʼ yakal chalbe skʼoplal li kʼusi tskʼan yoʼonton Diose, ti te ta jtatik ta Vivliae.
Li ta jvuntike ep ta velta chalbe skʼoplal Evreos 4:12 sventa chalbe smelolal ti oy sjuʼel sventa tsjel jkuxlejaltik li kʼusi chal Vivliae. Lek onoʼox ti jech chichʼ alele. Pe lek me ti xkaʼibetik smelolal kʼusi yakal chalbe skʼoplal Pablo kʼalal jech laj yalbe li j-evreoetik ti jaʼik yajtsʼaklomtak Kristoe. ¿Kʼusi yakal chalbe skʼoplal? Yakal tstijbe yoʼonton ti skʼan skolta sbaik ta spasel li kʼusi tskʼan yoʼonton Diose. Li ta Chʼul Tsʼibetike te chalbe smelolal kʼusitik smakoj li kʼusi tskʼan yoʼonton Diose. Jaʼ yuʼun, sventa xalbe smelolal li Pabloe, laj yalbe skʼoplal li j-israeletik ti koltaatik lokʼel ta Ejipto yuʼun li Diose. Li j-israeletik taje spatoj yoʼontonik ti te chbatik «ti bu chlocʼ ep yaʼlel xchuʼ vacax, xchiʼuc pom jech chac cʼu chaʼal chlocʼ voʼe», yuʼun jaʼ jech albilik yuʼun li Diose. Vaʼun jaʼ to te xuʼ xkux lek yoʼontonik (Éx 3:8; Dt 12:9, 10).
Taje jaʼ li kʼusi oy ta yoʼonton Diose. Pe li j-israeletike muʼyuk laj yakʼ xchʼunel yoʼontonik ta stojolal li Jeovae xchiʼuk muʼyuk la xchʼunbeik smantal. Jaʼ yuʼun, jutuk mu skotolikuk muʼyuk x-ochik li ta xkuxobil yoʼonton Diose (Nú 14:30; Jos 14:6-10). Manchuk mi jech, xi laj yal li Pabloe: «Oy to jtos kʼusi albil [...,] jaʼ ti chij-ochutik li ta xkuxobil [yoʼonton]» Diose (Evr 3:16-19; 4:1). Li «kʼusi albil» taje, jaʼ te tsakal skʼoplal li kʼusi tskʼan yoʼonton Dios ti yakʼoj xa ta ojtikinele. Jaʼ jech kʼuchaʼal la xchanbeik skʼoplal kʼusi tskʼan yoʼonton li yajtsʼaklomtak Kristoe, jaʼ jech xuʼ jchanbetik skʼoplal ek xchiʼuk ti jkolta jbatik ta spasel li kʼusi tskʼan yoʼonton Diose. Jaʼ yuʼun, sventa xalbe smelolal Pablo ti te chalbe skʼoplal ta Chʼul Tsʼibetik li kʼusi albil skʼoplal taje, laj yalbe skʼoplal li kʼusi chal Génesis 2:2 xchiʼuk Salmo 95:11.
Tspat koʼontontik ti ‹oy to jtos kʼusi albile›: «Jaʼ ti chij-ochutik li ta xkuxobil [yoʼonton]» Diose. Ta melel, jpatoj koʼontontik ti ta onoʼox xij-och li ta xkuxobil oʼontonal taje, yuʼun jaʼ jech chal li Vivliae. Jaʼ yuʼun, chkakʼbetik yipal ti bu kʼalal xuʼ kuʼuntike. ¿Kʼuxi? Maʼuk ti ta jpastik li kʼusi chal Smantal Moisese mi jaʼuk ti oy xa kʼusitik lekik ta jpastik sventa noʼox lek xilutik li Diose. Moʼoj, ti kʼusie jaʼ ti ta sjunul koʼontontik ta jkolta jbatik ta spasbel li kʼusi tskʼan yoʼonton Diose xchiʼuk ti jech-o ta jpastik batel ta skoj ti oy xchʼunel koʼontontik ta stojolal li Jeovae. Ta smilal xa noʼox krixchanoetik ta spʼejel Balumil yakal xa chchanik li Vivliae xchiʼuk yakal xa chchanbeik skʼoplal li kʼusi tskʼan yoʼonton Diose. Vaʼun jaʼ chtijbat yoʼontonik sventa sjel xkuxlejalik, ti xakʼ xchʼunel yoʼontonike xchiʼuk ti xichʼik voʼe. Taje jaʼ svinajeb ti ‹kuxul li skʼop Diose xchiʼuk ti oy sjuʼele›. Ta melel, li kʼusi yaloj Vivlia ta sventa li kʼusi tskʼan yoʼonton Diose, jaʼ skoltaojutik tajek xchiʼuk jech-o tskoltautik.
it-1 paj. 851 par. 1
Spatobil oʼontonal
Li spatobil oʼontonal sventa kuxlejal sbatel osil xchiʼuk li buchʼutik mu snaʼ xkʼaʼik ti te skʼoplalik li ta «takel ta ikʼel ta vinajele» (Evr 3:1) oy lek yoyal xchiʼuk xuʼ lek jpat koʼontontik ta stojolal. Oy chib srasonal ti chakʼ ta ilel ti mu snaʼ sjut kʼop li Diose: yaloj ta jamal ti jech chkʼot ta pasele xchiʼuk yakʼoj ye. Jech xtok, oy snakleb ta stojolal Kristo, ti mu snaʼ xcham ti te oy ta vinajel li avie. Jech oxal chaʼa, li spatobil oʼontonal taje chichʼ alel ti jech «kʼuchaʼal s-anklail jkuxlejaltik li spatobil koʼontontike, yuʼun lek tukʼ xchiʼuk staoj lek yav, jech xtok li spatobil koʼontontik taje ch-ikʼvan batel kʼalal to ta yut kortina [jech kʼuchaʼal ch-och toʼox ta mero Chʼul Kuarto li mero bankilal pale li ta Skʼakʼalil Chʼayob mulile] ti jaʼ te ochem batel jun jbabe ti jaʼ sventa jlekilaltike, ti jaʼ li Jesuse, ti kʼotem kʼuchaʼal mero bankilal pale sbatel osil jech kʼuchaʼal li Melkisedeke» (Evr 6:17-20).