¿Kʼusi xuʼ jchanbetik li ermanoetik ti ep xa kʼusi xchanojik tale?

Li ta jtsobobbailtike oy van ermanoetik ti jal xa tunemik tal ta stojolal Jeovae xchiʼuk ep kʼusi chakʼ jchantik ti kʼu yelan spatoj tal yoʼontonik ta stojolal Jeovae. Kalbetik ti akʼo sloʼiltabutik ti kʼu toʼox yelan li j-organisasiontike xchiʼuk ti kʼuxi koltaatik yuʼun Jeova sventa stsal yuʼunik li vokoliletike. ¿Kʼu yuʼun mu jtaktik ta ikʼel li ta yichʼel ta mukʼ Dios ta kutsʼ kalaltik sventa xalbutik li kʼusi xkuxlebinojike?

Mi jal xa chatun tal ta stojolal Jeovae, loʼiltabo li kʼusi aviloj talel ta akuxlejal li kerem tsebetike. Li Jakob xchiʼuk Josee laj yalanbe snitilulaltak li kʼusitik la spas Jeova ta stojolalike (Je 48:21, 22; 50:24, 25). Ta mas tsʼakale, li Jeovae laj yalbe totil meʼiletik ti xalbe yalab xnichʼnabik li kʼusitik labalik sba spasoj ta stojolalike (Dt 4:9, 10; Sl 78:4-7). Li avi eke, li totil meʼiletik xchiʼuk yan ermanoetik ta tsobobbaile xuʼ sloʼiltabeik kerem tsebetik li kʼusitik labalik sba spasoj tal Jeova ta stojolal li s-organisasione.

MI LA AKʼELIK LI VIDEO MU JCHʼAK JBATIK AKʼO MI XKICHʼTIK NUTSEL, TAKʼIK LI SJAKʼOBILTAK LIʼE:

• Li Betel ta Austriae, ¿kʼuxi la skolta li ermanoetik ti te nakalik ti bu mu stakʼ spasik li kabteltike?

• ¿Kʼusi la spasik li ermanoetik sventa tsotsuk-o li xchʼunel yoʼontonike?

• ¿Kʼu yuʼun la xchʼak sbaik lokʼel ta s-organisasion Jeova epal jcholmantaletik li ta Rumaniae, xchiʼuk kʼuxi laj yichʼik koltael sventa sutik tale?

• ¿Kʼuxi tstsatsubtas xchʼunel avoʼonton li video liʼe?