Jchanbetik li jcholmantaletik ti lek chanemike

Toj ep me sbalilik li buchʼutik lek chanemik ta cholmantale. Li jlome solel jal xa tunemik tal ta stojolal Jeova. Li yan xtoke, akʼo mi achʼik to pe chanemik xa lek ta cholmantal. Skotol li jcholmantaletike yakʼojik venta ti jaʼ tsbeiltas tsobobbail li Jesukristo li ta slajebaltik xa batel kʼakʼale xchiʼuk ti jaʼ chkoltavan ta spasel li abtelal ta cholmantale xchiʼuk li yakʼel chanubtasele (Mat. 28:19, 20). Ta skoj ti ta epal jabil xa chcholik mantale, akʼbilik «li juʼelal ti mu kʼusi xkoʼolaj-oe», taje jaʼ koltabilik-o sventa stsal yuʼunik li prevaetike (2 Kor. 4:7). Toj ep kʼusitik xuʼ jchanbetik li jcholmantaletik taje, yuʼun tskʼupinik tajek xchanubtasel yantik ta sventa li kʼusi xchanojike (Sal. 71:18). ¿Kʼuxi xuʼ jpastik?

Kʼalal ta jcholtik mantale. Sventa xtojobik lek ta cholmantal li buchʼutik achʼik toe skʼan me xkoltaatik yuʼun li buchʼutik lek xa chanemike. Ti kʼusi xuʼ xkoltaatik-oe jaʼo kʼalal tskʼelik kʼu yelan chcholik mantal li buchʼutik lek xa chanemike. (Kʼelo Li Jkʼel osil ta toyole 15 yuʼun fevrero ta 2015 li ta mantal « ¿Kʼuxi xuʼ xamuyubaj-o li ta cholmantale?», ta paj. 16, par. 1.) ¿Kʼusi sbalil ataojbe kʼalal chachiʼin ta cholmantal li buchʼutik lek xa chanemike?

¿Kʼu yuʼun mu xavalbe ti chakʼan chachiʼin ta cholmantal li ermanoetik taje? Mi jaʼo ip li jcholmantal taje, xuʼ te xabatik bakʼintik ta sna sventa te xachanunajik xchiʼuk li avaj-estudioe. Mi laj chanunajanike, jakʼbo li jcholmantal ti lek chanem bu skʼan xa-abteje xchiʼuk kʼanbo tojobtasel kʼusi xuʼ xapas.

Ojtikinano me lek. Akʼo persa yojtikinel li jcholmantaletik taje. Ikʼo kʼalal chapas li yichʼel ta mukʼ Jeova ta avutsʼ avalale xchiʼuk jakʼbo sloʼil. Jakʼbo kʼuxi och ta mantal, kʼuxi akʼbil bendision yuʼun Jeova, kʼuxi jelem talel li tsobobbail kʼalal och ta stestigo Jeovae xchiʼuk kʼusitik lek kʼotem ta xkuxlejal ti tunem talel ta stojolal Diose. Pe mi ip li jcholmantale, xuʼ me voʼot xabat ta sna sventa te xbat avetʼes li Akʼobal sventa Yichʼel ta Mukʼ Jeova ta Kutsʼ Kalaltike.

Pe mu me xanop ti snaʼik xa skotol li ermanoetik taje. Li buchʼutik jal xa chcholik mantale jelel me li spʼijilike, jech kʼuchaʼal li voʼotike (Rom. 12:6-8). Oy jlom ti oy xa sjabilalike, jech oxal, xuʼ van mu xuʼ yuʼunik sventa xchʼak mas skʼakʼalik ta jtojolaltik. Akʼo mi jech, xuʼ jchanbetik li kʼusitik snaʼik spasele xchiʼuk ti tukʼ tunemik tal ta stojolal Jeovae.