Kʼuxi ta chanubtasel li achʼ jcholmantaletike
1. ¿Kʼu yelan avaʼi aba kʼalal la lokʼ ta sba velta ta chol mantale?
1 ¿Mi xvul ta ajol kʼalal la achol mantal ta naetik ta sba veltae? Ta melel toj echʼ xa noʼox van la xiʼ. Pe ¡xpatet to kʼot avoʼonton! Yuʼun te la skoltaot li avajchanubtasvanej ta Vivliae o junuk jcholmantal ti te achiʼuke. Li avi une lek xa chanemot li ta chol mantale; chapalot xa sventa cha chanubtas li yan achʼ jcholmantaletike.
2. ¿Kʼusi skʼan xchanik li achʼ jcholmantaletike?
2 Li achʼ jcholmantaletike skʼan xchanik kʼuxi tslikes sloʼilik ta tiʼna, kʼuxi tstunesik Vivlia ta jujupʼej na, xchaʼvulaʼanel li krixchanoetike, slikesel xchiʼuk yakʼel chanubtaseletik ta Vivlia. Maʼuk noʼox taje, skʼan xchanik xtok kʼuxitik ta cholel li mantale, jech kʼuchaʼal chol mantal ta kayeetik xchiʼuk ta pʼolmajebaletike. ¿Kʼuxi xuʼ xa koltaan li voʼote? Xuʼ xavalbe li kʼuxi xuʼ spasike xchiʼuk xuʼ jaʼ chchanik ti kʼuyelan cha pase.
3. ¿Kʼuxi xuʼ jkoltatik yantik ta sventa li kʼuyelan ta jcholtik mantale?
3 Chanubtasvanan ta sventa ti kʼuyelan cha pase. Li Jesuse laj yakʼbe yil yajtsʼaklomtak kʼuxi ta cholel li mantale (Luc. 8:1; 1 Ped. 2:21). Jech xa chan taje, kʼalal cha lokʼ ta chol mantal xchiʼuk junuk achʼ jcholmantale, chapano junuk skʼelobil chol mantal ti xchan noʼox yuʼune, xuʼ te xa lokʼes junantik kʼuchaʼal chal li ta vunetik lokʼemike. Kʼalal te xa oyoxuk ta naetike, cholo mantal baʼyel jun o chibuk velta sventa xaʼi li skʼelobil chol mantal achapanoje, vaʼun kʼalal cha batik xaʼox ta yan nae, xuʼ xa jakʼbe kʼuyelan laj yil li skʼelobil chol mantal la tunese, mi jtunel yil o mi moʼoj. Mi jech cha pase, li achʼ jcholmantale chakʼ venta kʼu yuʼun oy sbalil mi ta jcholtik mantal xchiʼuk li yantik ermanoetike xchiʼuk mas kʼun chaʼi ta chʼunel kʼalal chavalbe li bu to skʼan xchan mas mi laj xchol mantale.
4. ¿Kʼuxi xuʼ jkoltatik jun achʼ jcholmantal kʼalal mi laj kaʼibetik xaʼox kʼuyelan laj xchol mantale?
4 Albo kʼuxi xuʼ spas. Li Jesús eke laj yalbe mantal kʼuxi xuʼ xcholik mantal li yajtsʼaklomtake (Mat. 10:5-14). Jechtik xa pas ek. Kʼalal mi jaʼ xa chlik loʼilajuk li achʼ jcholmantale, tsʼetanbo xchikinal li kʼusi chale. Mi la batik xaʼoxe, muyubajan noʼox xchiʼuk kʼupil kʼoptao li kʼusi lek la spase, akʼo mi oy kʼusi la avil ti skʼan to xchane. Mu xavalbe ta anil li kʼusi skʼan spase, mas lek kʼelo mi jech chchaʼpas li ta yan nae. Xuʼ van jaʼ ta skoj ti chiʼe. Teuk ta ajol xtok ti mu koʼoluk xi jtojob li ta chol mantale xchiʼuk ti oy jaytosuk kʼuxitik lek ta pasele (1 Cor. 12:4-7).
5. Mi voʼot lik aval li kʼusi xuʼ spas li jcholmantale, ¿kʼusi xuʼ xavalbe?
5 Bakʼintike jaʼ stuk li jcholmantal cha skʼanbot koltaele. Mi moʼoje, voʼot lik albo, pe sabo lek smelolal. ¿Kʼuxi? Junantik jcholmantaletik ti lek xa chanemike, xi noʼox chlik yalike: «¿Mi xuʼ xkalbot kʼusi xuʼ xa pas?», o «¿Kʼu yelan la avaʼi aba ti kʼuyelan la pase?». Xuʼ xi xkaltik xtoke: «Kʼalal li lik ta chol mantal eke, toj tsots laj kaʼi ..., pe li kʼusi la skoltaune jaʼ ti ...». Bakʼintike lek ti jmoj xa kʼelik li livro Razonamientoe. Pe mu me toj ep kʼusitik xavalbe ti xuʼ xtavan xaʼie; jaʼ noʼox xa valbe jtosuk li kʼusi skʼan xchan mas avile.
6. Ta sventa li chol mantale, ¿kʼuxi ti skʼan juxbel ye ta takʼin li takʼine?
6 «Li taqʼuine tscʼan juxbel ye ta taqʼuin noxtoc.» Li Timoteoe chanem xaʼox lek ta chol mantal, akʼo mi jech, laj yichʼ albel yuʼun Pablo ti akʼo xchan to batel li chanubtasvaneje xchiʼuk ti xchʼi to batel ta mantale (1 Tim. 4:13, 15). Akʼo mi voʼne xa ti lik achol mantale, skʼan me xa chan-o batel mas. Chanbo li kʼuyelan chcholik mantal li achiʼiltak ta chol mantale, akʼo mi mas jutuk chanemik. Teuk asat sventa xa kolta ta slekil avoʼonton li avermanotake, mas li buchʼu achʼik toe, sventa xchanik lek xcholel li lekil aʼyeje (Pro. 27:17).