Lekubuk batel mas ti kʼu yelan xijtojob ta cholmantale: jkoltatik li jchiʼiltik ta cholmantale

Kʼu yuʼun tsots skʼoplal. Snaʼoj onoʼox Jesús ti toj tsots skʼoplal ti oyuk jchiʼiltik li ta cholmantale. Jaʼ yuʼun kʼalal la stak jelavel ta cholmantal li yajtsʼaklomtake, ta chaʼchaʼvoʼ la stak batel (Luc. 10:1). Li jchiʼiltik ta cholmantale xuʼ skoltautik kʼalal mu jnaʼtik kʼusi ta jtakʼbetik li jun krixchanoe o kʼalal oy kʼusi ta jnuptantike (Ecl. 4:9, 10). Jech xtok, xuʼ xkalbetik li kʼusi kilojtik ta cholmantale o li kʼusi skoltaojutik sventa xtojob batel mas li ta cholmantale (Prov. 27:17). Maʼuk noʼox taje, patbo yoʼonton kʼalal mu to chakʼotik ta jujupʼej nae (Filip. 4:8).

Kʼuxi ta pasel:

Kʼalal yakal chchol mantal li jchiʼiltik ta cholmantale jtsʼetan me lek jchikintik (Sant. 1:19). Mi yakal tskʼel junuk tekstoe jkʼeltik batel ta Jvivliatik ek. Vaʼun jaʼ jech xuʼ jkoltatik kʼalal mi tskʼan koltaele.
Jkʼeltik mi stakʼ xkal jloʼiltik xchiʼuk kʼusi ora xuʼ xkaltik (Prov. 25:11). Mi oy buchʼu bat jchiʼintik ta yakʼel junuk chanubtasel ta Vivliae toj ep me sbalil mi laj kal jpʼelchaʼpʼeluk jloʼiltike. Jech xtok, kʼalal jaʼo chchol mantal li jchiʼiltik ta cholmantale jaʼ van lek chaʼi ti mu jtuchʼbetik ta be li sloʼile. Pe mi achʼ to lik xchol mantale, mi mu snaʼ kʼuxi tstakʼ li kʼusi chjakʼbate o mi chtuchʼbat ta be li sloʼile, lek me chaʼi ti jkoltatike. Kʼalal chbat jchiʼintik ta cholmantal junuk ermanoe, kʼalal chbat jchaʼvulaʼantik junuk krixchanoe o kʼalal chbat kakʼtik chanubtasel ta Vivliae, mu me lekuk ti jtuchʼbetik ta be sloʼil li jchiʼiltike, ti voʼotik xa mas chijloʼilaje xchiʼuk mu me yanuk xa kʼusi xlik jloʼiltatik.
Kalbetik li kʼusi kiloj ta jkuxlejaltike. Mi sta-o chkiltik ti xkalbetik junuk tojobtasel li jchiʼiltik ta cholmantal sventa xtojob mase, lek me ti xkalbetike (Prov. 3:27). Xuʼ xi xkalbetik mi xuʼ chkiltike: «¿Kʼu yelan laj avaʼi kʼalal la acholbe mantal li yajval nae?», «¿Mi xuʼ oy kʼusi xkalbot jpʼelchaʼpʼeluk?» o xi xavalbee: «Kʼalal jaʼ jech ta jnuptane jaʼ chkalbe skʼoplal...». Teuk me ta joltik ti tstojbutik ta vokol jchiʼiltik ta cholmantal mi laj kalbetik junchibuk tojobtasele, pe xuʼ me svul-o yoʼonton mi jujulikel chkalbetik li kʼusi muʼyuk lek chbat yuʼun ta pasele.

Paso jech sjunul u liʼe:

Mi laj avoʼontonik ta cholmantal xchiʼuk li achiʼile, albo kʼusi laj yal o kʼusi la spas ti la skoltaote.