¿Kʼuxi xuʼ jkoltatik li jchiʼiltik ta chol mantale?
1. ¿Kʼusi sbalil ta jtatik kʼalal oy jchiʼiltik ta chol mantale?
1 Jun veltae, li Jesuse «laj stacan jelavel ta chaʼchaʼvoʼ» 70 yajtsʼaklomtak sventa chcholik mantal (Luc. 10:1; Ti Achʼ Rextomento yuʼun ti Jesucristoe, ta skʼop Chamula). Ta melel, ti jech ta chaʼchaʼvoʼ batike xuʼ skolta sbaik xchiʼuk tspatbe sba yoʼontonik kʼalal chcholik mantale. Li voʼotik eke, ¿kʼusi xuʼ jpastik sventa jkoltatik li jchiʼiltik ta chol mantale?
2. ¿Kʼu yuʼun skʼan jchikintatik kʼalal chloʼilaj li jchiʼiltik ta chol mantale xchiʼuk kʼuxi chkakʼtik ta ilel?
2 Chikintao li kʼusi chale. Tsʼetano lek achikin kʼalal yakal chchol mantal li achiʼile (Sant. 1:19, Ch). Kʼelo ta aVivlia ek kʼalal tskʼel junuk tekstoe. Jaʼ xa kʼelbe sat li buchʼu junukal chkʼopoje, mi jaʼ li achiʼil ta chol mantale o mi jaʼ li yajval nae. Mi cha tsʼet chikintabe li sloʼilike, jaʼ me jech chtijbat-o yoʼonton spasel ek li yajval nae.
3. ¿Bakʼin xuʼ jkoltatik li jchiʼiltik ta chol mantale?
3 Jkʼeltik bakʼin xuʼ xi jkʼopoj. Kʼalal jaʼ yora chkʼopoj li achiʼil ta chol mantale, jaʼ senyail ti chavichʼ ta mukʼ mi la avakʼ kʼopojuk stuke (Rom. 12:10). Jaʼ xkaltik, mu xa tuchʼbe ta be li sloʼile. Mi la avil ti mu xa snaʼ kʼusi chal o mi la skʼanbot koltael sventa cha takʼ junuk sjakʼobil o sventa cha takʼ yoʼ mu xpaj li aloʼilike, koltao, jaʼ noʼoxe jaʼ xaval li kʼusi yakal toʼox tsloʼilta li achiʼile. Akʼo persa mu xa jel batel li kʼusi yakal toʼox tsloʼiltae (Pro. 16:23; Ecl. 3:1, 7). Mi jech cha pase mas to chakʼbe yip li kʼusi chal achiʼil ta chol mantale (1 Cor. 14:8).
4. ¿Kʼusi tskoltautik sventa jun xa koʼontontik chi jsut talel li ta chol mantale?
4 Kʼalal laj xaʼox xcholik mantal li 70 yajtsʼaklomtak Jesús ti ta chaʼchaʼvoʼ takatik batele «xmuyubajic xa sutic talel» (Luc. 10:17). Jun xa koʼontontik chi jsut talel ta chol mantal ek mi li jtojob skoltael li jchiʼiltike, mi la jchikintatik li kʼusi chale xchiʼuk mi la jkʼeltik bakʼin xuʼ xi jkʼopoje.