Maʼuk noʼox chbat chiʼinvankutik li ta cholmantale
1. ¿Kʼuxi xuʼ jchanbetik stalelal jtakbol Pablo kʼalal chijlokʼ ta cholmantal xchiʼuk yantike?
1 Kʼalal ta xchiʼinan yan jcholmantaletik li jtakbol Pabloe laj yakʼ persa ti «coʼol ta [s]tsatsubtasbe [s]ba [yoʼontonik] ta jujun tale» (Rom. 1:12, Ch). Kʼalal ta jchiʼintik ta cholmantal yantike, ¿mi mu tauk jtunestik sventa jkolta jbatik xchiʼuk jpatbe jba koʼontontik? Sventa maʼuk noʼox chbat chiʼinvankutike, ¿kʼu yuʼun mu jloʼiltatik kʼusi skoltaojutik yoʼ xlekub ti kʼu yelan ta jcholtik mantale?
2. ¿Kʼusitik van xuʼ jpastik yoʼ spat yoʼontonik ta jtojolaltik li jchiʼiltik ta cholmantale, xchiʼuk kʼu yuʼun tsots skʼoplal ti jech jpastike?
2 Akʼo ta ilel ti xuʼ spat yoʼontonik ta atojolale. Oy jlom jcholmantaletik ti vokol chaʼiik yakʼel ta ilel ti spatojuk yoʼontonik ta stojolal li yantike, taje chvinaj ta skʼopojelik xchiʼuk ta satik. Mi laj kalbetik ta sjunul koʼontontik ti lek li kʼusi tspase xuʼ me xkoltaat ti spat yoʼontonik ta jtojolaltike. ¿Kʼusitik van yan xuʼ jpastik yoʼ spat yoʼontonik ta jtojolaltike? Jun jkʼelvanej ta sirkuito chalbe xchiʼiltak ta cholmantal ti chiʼ li stuk eke xchiʼuk ti persa tspasilan orasion yoʼ spasbat ta jun yoʼonton yuʼun li Jeovae. Xi laj yal jun ermanoe: «Sventa xkakʼ ta ilel ti jun koʼontone skʼan stseʼetuk noʼox jsat. Pe bakʼintike chixiʼ tajek, jaʼ yuʼun persa skʼan jpas orasion yoʼ stseʼetuk noʼox li jsate». ¿Mi oy kʼusi skoltaojutik yoʼ junuk noʼox koʼonton xkaʼi jbatik li ta cholmantale? ¿Kʼu yuʼun mu xkalbetik jchiʼiltik ta cholmantal?
3. ¿Kʼusitik xuʼ xkalbetik jchiʼiltik ta cholmantal ti xuʼ xkoltaatik sventa xchanik lek li cholmantale?
3 Alo kʼusitik yan chatunes ti toj tunelike. ¿Mi oy van kʼusi skoltaojot yoʼ xachiʼin ta loʼil junuk krixchano kʼalal la avalbe skʼoplal jtosuk kʼusi kʼotem ta pasel ti bu nakaloxuke, o ti oy kʼusi la ajakʼbe o la avalbee? ¿Mi oy van kʼusitik yan chatunes ta cholmantal ti skoltaojot sventa lek chaʼibot li yajval nae? Albo li achiʼil ta cholmantale (Prov. 27:17). Kʼalal jaʼo chbat achaʼvulaʼanik junuk krixchanoe, xuʼ xavalbe li buchʼu achiʼuk batel ti kʼuxi anopoj chapase xchiʼuk ti kʼuxi chakolta ta mantale. Kʼalal mi laj xaʼox avakʼik junuk chanubtasel ta Vivliae, xuʼ van xavalbe li buchʼu ay xchiʼinot ti kʼu yuʼun jaʼ mas la avalbe smelolal jtosuk kʼusi o junuk tekstoe, o ti kʼu yuʼun jelel kʼusi la atunes sventa chakolta li jun buchʼu chavakʼbe chanubtasele.
4. ¿Kʼu yuʼun skʼan oyuk ta koʼontontik jkoltatik li jchiʼiltik ta cholmantale?
4 Li jcholmantaletik ta baʼyel sigloe maʼuk noʼox oy ta yoʼontonik li buchʼutik maʼuk jchʼunolajeletike. Yuʼun snaʼojik xtok ti tsots skʼoplal ti akʼo spatbe sba yoʼontonik ta jujuntale (Hech. 11:23; 15:32). Jaʼ yuʼun, li jtakbol Pabloe la xchapan li kerem Timoteoe xchiʼuk la stijbe yoʼonton yoʼ xalbe yantik li kʼusi la xchane (2 Tim. 2:2). Kʼalal te ta joltik kʼuxi xuʼ jkoltatik li kermanotik kʼalal jaʼo ta jcholtik mantale, maʼuk noʼox chmuyubaj kuʼuntik xchiʼuk chchan lek xcholel mantal, yuʼun jaʼ ta jmuyubtabetik yoʼonton li Jtotik ta vinajele (Heb. 13:15, 16).