Jkoltatik sventa xrasonajik li krixchanoetike
1. ¿Kʼusi tskoltautik sventa lek kʼusi xkʼot ta pasel kʼalal ta jcholtik mantale?
1 ¿Kʼusi van ti mas lek chkʼot ta pasel ta cholmantal kuʼuntike: jaʼ ti ta jsujtik ta persa sventa xchʼamik mantal li krixchanoetike o jaʼ ti xijrasonaj xchiʼukik sventa jechuk lek xaʼibeik smelolale? Li jtakbol Pabloe rasonaj xchiʼuk li judioetik ta Tesalonicae, jaʼ yuʼun «oy jayibuc israeletic la xchʼunic Cajvaltic» (Hech. 17:2-4). Pe, ¿kʼusi smakoj ti chijrasonaj xchiʼuk li krixchanoetike?
2. ¿Kʼuxi xuʼ jchanbetik li kʼuyelan la spas Pablo kʼalal ta jcholtik mantale?
2 Jtsaktik ta venta li kʼusi tsnop krixchanoetike. Sventa jkoltatik li krixchanoetik bu ta jcholtik mantale, skʼan jnaʼtik li kʼusi tsnopike. Kʼalal la xchiʼin ta loʼil jtsop jgriegoetik ti maʼuk jchʼunolajeletik ta Areópago li Pabloe, jaʼ laj yalbe li kʼusi xojtikinik xa onoʼox xchiʼuk ti xchʼunojik xa onoʼoxe (Hech. 17:22-31). Jech xtok, kʼalal ta jchapan jbatik ta cholmantale skʼan teuk ta joltik li kʼusi xchʼunojike, ti xuʼ baʼyel oy kʼusi chopol tsnopik li krixchanoetik li bu ta jcholtik mantale (1 Cor. 9:19-22). Mi chalik ti mu skʼanik li mantale, skʼan jsaʼtik kʼusitik jmoj jchʼunojtik xchiʼuk li krixchanoetike xchiʼuk xuʼ jaʼ jlikes-o jloʼiltik xchiʼukik.
3. ¿Kʼuxi xuʼ xijrasonaj lek xchiʼuk yantik kʼalal ta jtunestik sjakʼobiltake?
3 Baʼyel lek jnoptik li kʼusi ta jakʼtike. Mu kʼunuk ti xkalbetik kʼuxi xuʼ xkʼot ti bu tskʼan chbat li jun krixchano ta telefono mi mu jnaʼtik bu xlokʼik batele. Taje jaʼ me jech mu kʼuxi xuʼ jkoltatik sventa xaʼibeik smelolal li krixchanoetik mi mu jnaʼtik li kʼusi tsnopike. Kʼalal skʼan toʼox xakʼ rasonajuk jun krixchano li Jesuse, baʼyel oy kʼusi ta sjakʼbe sventa tsnaʼ li kʼusi tsnope. Jun skʼelobile, jaʼo kʼalal xi jakʼbate: «¿Cʼusi tscʼan ta jpas ti xuʼ chicuxi o sbatel osile?», li Jesuse baʼyuk la skʼel li kʼusi ta snop kʼalal skʼan toʼox stakʼe (Luc. 10:25-28). Jun velta xtoke, li Pedroe oy kʼusi laj yal ti muʼyuk leke, pe li Jesuse baʼyuk la snop lek li kʼusi xuʼ sjakʼbe sventa stukʼibtas li kʼusi mu lekuk tsnope (Mat. 17:24-26). Jaʼ yuʼun chaʼa, mi laj yalbutik li kʼusi mu snabeik smelolale o ti chalbutik li kʼusi mu lekuk li buchʼu yakal chaʼibutike, jtunestik sjakʼobiltak sventa jkoltatik ti akʼo xrasonajike.
4. ¿Kʼu yuʼun skʼan jkoltatik sventa xrasonajik li buchʼu chaʼibutike?
4 Mi la jkoltatik sventa x-och ta rason junuk krixchanoe yakal me ta jchanbetik stalelal li Jesuse, ti jaʼ li Mukʼta Jchanubtasvanej kuʼuntike, xchiʼuk ta jchanbetik li jcholmantaletik ta baʼyel sigloe. Jech noxtok, ta me xkakʼtik ta ilel ti chkichʼtik ta muk li buchʼu ta jchiʼintik ta loʼile (1 Ped. 3:15). Mi jech ta jpastik taje, xuʼ me skʼanik ti jchaʼvulaʼantik ta yan veltae.