Lekubuk batel mas ti kʼu yelan xijtojob ta cholmantale: ti kʼuxi ta akʼel li livro Chchanubtasvan[e]

Kʼu yuʼun tsots skʼoplal. Li livro Chchanubtasvan[e] jaʼ jun abtejebal ti mas ta jtunestik ta cholmantale. Pe mi ta jkʼan ta jtunestik sventa jchanubtastik-o ta Vivlia li krixchanoetike, skʼan baʼyel xkakʼbetik komel ta skʼobik. Jaʼ yuʼun, skʼan xkakʼtik persa sventa xijtojob ta yakʼel ta cholmantal li livro taje (Prov. 22:29). Ep ta tos ti kʼu yelan xuʼ xichʼ akʼele, jaʼ yuʼun xuʼ jech jpastik ti bu mas jtunel ti bu ta jcholtik mantale.

Kʼuxi ta pasel:

Oyuk kʼusi xajakʼbe li krixchano sventa xatijbe yoʼonton ta xchanel junuk kapitulo li livroe. Xuʼ van jaʼ xatunes junuk li sjakʼobiltak ti tey chvinaj ta slikeb jujun kapituloe. Kʼalal mi laj xaʼox achikinta li kʼusi tstakʼ li krixchanoe, kʼelbo junuk teksto xchiʼuk chanik junuk parafo li ta livro ti chalbe smelolal li kʼusi la ajakʼbee, pe mu me masuk xajalij.
Xuʼ xatunes xtok sventa xalikes-o aloʼil li pajina 3 kʼalal ta 7 yoʼ xatijbe yoʼonton li krixchanoe, mi laje xuʼ xavakʼbe yil bu junukal kapitulo chalbe smelolal. Jech kʼuchaʼal liʼe, kʼalal mi laj xaʼox avalbe skʼoplal jtosuk kʼusi xibal sba kʼotem ta pasel ti lokʼ ta notisiae, xuʼ xavalbe ti ep krixchanoetik jech tsjakʼbe sbaik kʼuchaʼal chvinaj li sjakʼobiltak ta pajina 3. O xuʼ xavalbe li yajval naetik ti yakal chavalbe skʼoplal jun lekil spatobil oʼontonal ti chtal ta jelavele. Akʼbo yil li lokʼoletik te chvinaj ta pajina 4 xchiʼuk 5, vaʼun xi xajakʼbee: «Li kʼusitik chavil liʼe, ¿bu junukal ti chakʼan chkʼot ta pasele?». Jech xtok, xuʼ xavalbe ti yakal chavulaʼaj uni jlikel sventa chavalbe smelolal jlomuk li kʼusitik tsotsik skʼoplal ta jakʼbe jbatike. Akʼbo yil li sjakʼobiltak te chvinaj ta pajina 6 xchiʼuk jakʼbo bu junukal oy ta yoʼonton chchanbe skʼoplal.
Sventa xalikes junuk estudioe jakʼbo li krixchano mi tskʼan chchan Vivliae. Xuʼ xi xavale: «Yakal chkakʼkutik jlik vun sventa chichanubtasvankutik-o ta Vivlia. ¿Mi oy xa onoʼox aviloj? [Akʼo stakʼ.] Mi xokolot jlikeluke, ta jkʼan chkakʼbot avil kʼuxi xuʼ xatunes sventa skoltaot ta xchanel li Avivliae».

Paso jech sjunul u liʼe:

Kʼalal chapasik li yichʼel ta mukʼ Jeova ta avutsʼ avalalike, chanilanik kʼuxi xuʼ xapasik.
Kʼalal oy buchʼu chachiʼin ta cholmantale, albo kʼusi slikeb aloʼil anopoj chatunes (Prov. 27:17). Mi laj avakʼ venta ti muʼyuk sbalil li slikeb aloʼile, saʼo yan.