Oy kʼusi achʼ chlokʼ ti tskoltautik ta slikesel chanubtasele
1. ¿Kʼusi achʼ chlokʼ li ta revista Li Jkʼel osil ta toyole ti jaʼ sventa skotol krixchanoetike, xchiʼuk kʼusi sventa yichʼoj pasel?
1 Li ta revista Li Jkʼel osil ta toyole, ti ta ox-ox u chlokʼe, chlik lokʼuk bateltik jvokʼ kʼusi achʼ ti tskoltautik ta slikesel chanubtasel ta Vivliae, chlik lokʼuk ta avril. Jaʼ sbi «Chanubtaseletik ta sKʼop Dios». Jnaʼojtik ti ep krixchanoetik bu ta jcholtik mantale xmuyubaj tskʼel stukik kʼalal chbat kakʼbetike. Manchuk mi jech, li mantaletik taje yichʼoj pasel sventa koʼol xchanik xchiʼuk yajval na li jcholmantale.
2. ¿Kʼusitik yichʼoj talel li achʼ mantaletike?
2 Kʼusitik achʼ yichʼoj talel. Li sbi xchiʼuk sbikʼtal bi li mantaletike, tsʼibabil tal kʼuchaʼal sjakʼobil. ¿Kʼusi sventa? Jaʼ sventa xuʼ chichʼ jakʼbel yajval na kʼalal ta jchantik xchiʼuke. Li tekstoetik ti mas tsotsik skʼoplale jaʼ noʼox te tsʼibabil, muʼyuk lokʼtabil tal li kʼusi chale, yuʼun jaʼ sventa tstabe mas sbalil kʼalal tskʼel stuk ta sKʼop Dios li yajval nae. Bikʼitik noʼox li parafoetike sventa te noʼox ta tiʼna xuʼ xichʼ chanel. Jech xtok, jujuvokʼ li mantal taje chtakvan batel ta livro Chchanubtasvan. Taje jaʼ sventa mas xa kʼun chkaʼitik mi yuʼun sta-o xa chkiltik chlik jchantik xchiʼuk yajval na li livro taje.
3. ¿Kʼu yelan xuʼ jtunestik li achʼ mantal sventa jlikestik chanubtasel te noʼox ta stiʼ sna li krixchanoetike?
3 Kʼuyelan ta tunesel li mantaletike. Kʼalal chavakʼ li revistae, jakʼbo jtosuk kʼusi li yajval na ti xuʼ xtijbat-o yoʼonton ti te chalbe skʼoplal li ta mantale. Jech kʼuchaʼal liʼe, oy june jaʼ chalbe skʼoplal ti ep sbalil li Vivliae. Xuʼ van xi xavale: «¿Kʼusi cha nop voʼote, mi jaʼ van sKʼop Dios li Vivliae o mi jaʼ noʼox van jun lekil livro xa naʼ? [Akʼo stakʼ.] Oy kʼusi kichʼoj tal ti chalbe skʼoplal taje». Akʼbo yil li baʼyel sjakʼobile, kʼelo li baʼyel parafoe xchiʼuk saʼo li teksto te tsʼibabil tale. Chaʼjakʼbo xchiʼuk tijbo yoʼonton akʼo xakʼ sloʼil li yajval nae. Chanik ti kʼuyepal sta-o chavile, tuneso li sjakʼobiltak jech kʼuchaʼal cholol tale. Kʼalal skʼan toʼox xa bate, akʼbo yil li yan sjakʼobil te chtale, vaʼun albo kʼusi ora chbat akʼel yan velta sventa cha chanik. Sut kʼelo jujun xemana sventa xa chanilanik li mantal taje, jaʼ to mi la avichʼbe batel li yan revistae. Yan kʼusi stakʼ pasele, jaʼ ti tukʼ xavalbe yajval na mi tskʼan junuk chanubtasel ta Vivliae. Mi jeche, xuʼ jtunestik li achʼ mantal sventa xkakʼbetik yil kʼuyelan ta xkakʼtik li chanubtasel ta Vivliae.
4. Kʼalal chi jbat ta chaʼvulaʼale, ¿kʼu yelan xuʼ jtunestik li kʼusi chlokʼ ta revistae?
4 Jech noxtok, li jvokʼ mantale xuʼ jtunestik kʼalal chbat kakʼilanbetik revistaetik li krixchanoetike o kʼalal chbat jchaʼvulaʼantike. Xuʼ van xi xavale: «Oy jvokʼ kʼusi achʼ lokʼ talel li ta revista Li Jkʼel osil ta toyole. Chkakʼ avil kʼusi jaʼ». Ta jkʼanbekutik Jeova ta orasion ti jtuneluk li jvokʼ kʼusi achʼ chlokʼ ta revista sventa «acʼo lic yotquinic [...] cʼusi [melel]» li krixchanoetike (1 Tim. 2:4).