Lekubuk batel mas ti kʼu yelan xijtojob ta cholmantale: akʼo ta ilel kʼuxi ta chanel Vivlia xchiʼuk li livro Chchanubtasvane

Kʼu yuʼun tsots skʼoplal. Kʼalal chkalbetik krixchanoetik ti chkakʼtik jun matanal chanubtasel ta Vivliae ep buchʼutik mu xaʼibeik smelolal. Xuʼ van chtal ta sjolik ti skʼan xbatik ta junuk eskuelae. Jech oxal mu jaʼuk noʼox xkalbetik ti chkakʼtik jun chanubtasel ta Vivliae, jaʼ lek ti xkakʼbetik yilik kʼu yelan li jun chanubtasele. Kakʼbetik yil ti ep sbalil chichʼ taele xchiʼuk ti mu vokoluk ta chanel li Vivliae. Junchib noʼox minuto chjalij xchiʼuk xuʼ ta tiʼ na noʼox xichʼ pasel.

Kʼuxi ta pasel:

Mi laj xaʼox avalbe abie, jakʼbo mi oy kʼusi tsvul-o yoʼonton ta sventa ti kʼusi xuʼ snuptan ta xkuxlejal ta jelavele.
Albo ti ep buchʼutik jech tsvul yoʼontonik eke. Vaʼun akʼbo yil li saʼobil ta livro Chchanubtasvane. Albo ti kʼun noʼox ta aʼyel li kʼusitik chal li livroe xchiʼuk ti jaʼ tskoltautik ta yaʼibel smelolal kʼusi chal Vivlia ta sventa li kʼusi chkʼot ta pasel ta jelavele xchiʼuk ta sventa yan kʼusitik. Ta tsʼakale jakʼbo bu junukal kapituloal oy mas ta yoʼonton xchanel.
Akʼbo jlikuk slivro xchiʼuk jaʼ lik kʼelik li kʼusi kapituloal la stʼuje. Albo ti jaʼ te tstabe stakʼobil li sjakʼobiltak yichʼoj talel ta slikebal li kapituloe.
Albo mi tskʼan tskʼel li baʼyel parafoe. Mi laje jakʼbo li sjakʼobil yichʼoj talel sventa li parafo taje xchiʼuk koʼol xaloʼiltaik li stakʼobile. Kʼelo xchiʼuk albo skʼoplal li tekstoetik ti jaʼ chalbe skʼoplal li stakʼobile. Akʼbo yil kʼu yelan abonojbe stakʼobil li ta alivroe.
Kʼelik li yan parafoe. Pe li avi une, albo akʼo yakʼ persa stakʼ ta skʼop stuk li yajval nae.
Lekil kʼoptao xchiʼuk albo ti chbat avulaʼan yan velta sventa chatsutsesik xchanel li kapituloe.
Mi jaʼo yorail chavile, akʼbo skʼel li video ta jpajinatik ta jw.org/tzo ti xi sbie: ¿Kʼu yelan chichʼ pasel li chanubtasel ta Vivliae?

Paso jech sjunul u liʼe:

Kʼanbo Jeova ti akʼo yakʼbe bendision ti chavakʼ persa slikesel jun chanubtasele (Filip. 2:13).
Kʼalal chachol mantale, paso persa yakʼel ta ilel kʼuxi ta chanel Vivlia xchiʼuk li livro Chchanubtasvane o akʼo ta ilel li video ¿Kʼu yelan chichʼ pasel li chanubtasel ta Vivliae?, jech xapas akʼo mi jun noʼox velta.